Японийәдики уйғурлар японийә теббий саһәсидикиләрни қоллаш һәрикити елип бармақта

Мухбиримиз меһрибан
2020-04-17
Share
yaponiye-uyghur-jemiyiti-virus-yardem-1.jpg Японийә уйғур җәмийитиниң рәиси илһам мәхмут әпәнди қатарлиқлар сагамихара шәһәрлик һөкүмәт ишханисиға маска вә түрлүк ианә буюмлирини йәткүзүп бәрди. 2020-Йили 16-апрел, японийә.
Yaponiye Uyghur Jem’iyiti teminlidi

Японийә уйғур җәмийитиниң иҗраийә һәйәт рәиси халмәт әпәнди 16-апрел радийомиз зияритини қобул қилип, икки һәптә илгири японийә уйғур җәмийитиниң чақириқи билән башланған «маска ианә қилиш» паалийитиниң 15-апрел күни ғәлибилик тамамланғанлиқини билдүрди.

Униң билдүрүшичә, японийә уйғур җәмийитиниң тәшкиллишидә башланған «маска ианә қилиш» паалийитигә японийәдики уйғурлар актиплиқ билән аваз қошқан. Уйғур пидаийлириниң тиришчанлиқи билән икки һәптә ичидә йиғилған өлчәмлик маска 1224 тал, тикилгән маска 196 тал, дезинфексийә суюқлуқи 28.8 Литирға йәткән.

Халмәт әпәндиниң билдүрүшичә, уларниң бу һәрикәтни башлишиға японийәдә хитайдин тарқалған корона вируси юқуминиң күндин-күнгә еғирлашқанлиқи сәвәб болған.

Мәлум болушичә, японийә һөкүмити хитайдин тарқалған корона вируси юқуми сәвәблик японийәдиму карантин тәдбирлирини йолға қойған болуп, нөвәттә японийәдики барлиқ аммиви паалийәтләр әмәлдин қалған. Бундақ шараитта японийәдә уйғур мәсилисигә болған диққәтни тартиш үчүн японийә уйғур җәмийити икки һәптә илгири японийәдики уйғурлар арисида маска йиғиш пидаийлар паалийитини башлиған икән.

Японийә уйғур җәмийити намидин чиқирилған уқтурушта маскиларни японийәдә юқумлиниш хәвпи еғир болған алдинқи сәптә кесәл давалаватқан теббий хадимлар вә яшанғанларға ианә қилинидиғанлиқи билдүрүлгән.

Мәлум болушичә, уйғур пидаийлири тәрипидин тәйярланған маска вә дизенфия суюқлуқлири японийә уйғур җәмийитиниң рәиси илһам мәхмут вә муавин рәиси әхмәтҗан башчилиқидики икки гуруппа тәрипидин 15-апрел күни канадава райониниң зуши шәһәрлик һөкүмитигә, 16-апрел күни сагамихара шәһәрлик һөкүмәт ишханисиға тапшуруп берилгән.

Японийә уйғур җәмийитиниң муавин рәиси әхмәтҗан әпәнди 15-апрел күни канадава райониға қарашлиқ зуши шәһәрлик һөкүмәт хадимлириниң өзлирини күтүвалғанлиқини билдүрди.

Японийә уйғур җәмийитиниң рәиси илһам мәхмут әпәндиниң билдүрүшичә, 15-16-апрел күнлири һәр икки шәһәрниң шәһәр башлиқи башчилиқидики бир гуруппа һөкүмәт хадимлири уйғур пидаийлири гурупписини қобул қилған. Шәһәрлик һөкүмәт хадимлири японийә уйғур җәмийити тәрипидин тәшкилләнгән уйғур пидаийлириға рәһмитини билдүрүш билән биллә уйғурлар билән болған достлуқни техиму күчәйтидиғанлиқини вә уйғур мәсилиси һәққидики паалийәтләрни көпәйтидиғанлиқини билдүргән.

Юқириқи аваз улинишидин тәпсилатини аңлиғайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.