Yaponiyediki Uyghurlar yaponiye tébbiy sahesidikilerni qollash herikiti élip barmaqta

Muxbirimiz méhriban
2020.04.17
yaponiye-uyghur-jemiyiti-virus-yardem-1.jpg Yaponiye Uyghur jem'iyitining re'isi ilham mexmut ependi qatarliqlar sagamixara sheherlik hökümet ishxanisigha maska we türlük i'ane buyumlirini yetküzüp berdi. 2020-Yili 16-aprél, yaponiye.
Yaponiye Uyghur Jem’iyiti teminlidi

Yaponiye Uyghur jem'iyitining ijra'iye hey'et re'isi xalmet ependi 16-aprél radiyomiz ziyaritini qobul qilip, ikki hepte ilgiri yaponiye Uyghur jem'iyitining chaqiriqi bilen bashlan'ghan “Maska i'ane qilish” pa'aliyitining 15-aprél küni ghelibilik tamamlan'ghanliqini bildürdi.

Uning bildürüshiche, yaponiye Uyghur jem'iyitining teshkillishide bashlan'ghan “Maska i'ane qilish” pa'aliyitige yaponiyediki Uyghurlar aktipliq bilen awaz qoshqan. Uyghur pida'iylirining tirishchanliqi bilen ikki hepte ichide yighilghan ölchemlik maska 1224 tal, tikilgen maska 196 tal, dézinféksiye suyuqluqi 28.8 Litirgha yetken.

Xalmet ependining bildürüshiche, ularning bu heriketni bashlishigha yaponiyede xitaydin tarqalghan korona wirusi yuqumining kündin-kün'ge éghirlashqanliqi seweb bolghan.

Melum bolushiche, yaponiye hökümiti xitaydin tarqalghan korona wirusi yuqumi seweblik yaponiyedimu karantin tedbirlirini yolgha qoyghan bolup, nöwette yaponiyediki barliq ammiwi pa'aliyetler emeldin qalghan. Bundaq shara'itta yaponiyede Uyghur mesilisige bolghan diqqetni tartish üchün yaponiye Uyghur jem'iyiti ikki hepte ilgiri yaponiyediki Uyghurlar arisida maska yighish pida'iylar pa'aliyitini bashlighan iken.

Yaponiye Uyghur jem'iyiti namidin chiqirilghan uqturushta maskilarni yaponiyede yuqumlinish xewpi éghir bolghan aldinqi septe késel dawalawatqan tébbiy xadimlar we yashan'ghanlargha i'ane qilinidighanliqi bildürülgen.

Melum bolushiche, Uyghur pida'iyliri teripidin teyyarlan'ghan maska we dizénfiya suyuqluqliri yaponiye Uyghur jem'iyitining re'isi ilham mexmut we mu'awin re'isi exmetjan bashchiliqidiki ikki guruppa teripidin 15-aprél küni kanadawa rayonining zushi sheherlik hökümitige, 16-aprél küni sagamixara sheherlik hökümet ishxanisigha tapshurup bérilgen.

Yaponiye Uyghur jem'iyitining mu'awin re'isi exmetjan ependi 15-aprél küni kanadawa rayonigha qarashliq zushi sheherlik hökümet xadimlirining özlirini kütüwalghanliqini bildürdi.

Yaponiye Uyghur jem'iyitining re'isi ilham mexmut ependining bildürüshiche, 15-16-aprél künliri her ikki sheherning sheher bashliqi bashchiliqidiki bir guruppa hökümet xadimliri Uyghur pida'iyliri guruppisini qobul qilghan. Sheherlik hökümet xadimliri yaponiye Uyghur jem'iyiti teripidin teshkillen'gen Uyghur pida'iylirigha rehmitini bildürüsh bilen bille Uyghurlar bilen bolghan dostluqni téximu kücheytidighanliqini we Uyghur mesilisi heqqidiki pa'aliyetlerni köpeytidighanliqini bildürgen.

Yuqiriqi awaz ulinishidin tepsilatini anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.