Yaponiyede Uyghurlar bilen xongkongluqlarning birleshme namayish ötküzüldi

Muxbirimiz méhriban
2020-07-13
Share
yaponiye-chong-namayish-2.jpg Yaponiye Uyghur jem'iyitining orunlashturushida ötküzülgen Uyghurlar bilen xongkongluqlarning xitaygha qarshi birleshme namayishidin körünüsh. 2020-Yili 12-iyul, tokyo.
Yaponiye Uyghur Jem'iyiti teminligen

Yaponiye paytexti tokyoda shu jay waqti 12-iyul yekshenbe küni yaponiye Uyghur jem'iyitining orunlashturushida Uyghurlar bilen xongkongluqlarning xitay hökümitige qarshi zor kölemlik birleshme namayishi ötküzüldi.

Namayish yétekchiliridin biri bolghan, yéqinda yaponiye Uyghur jem'iyitining mu'awin re'isi bolup saylan'ghan exmetjan ependi ziyaritimizni qobul qilip, 12-iyul küni yaponiye paytexti tokyoda ötküzülgen birleshme namayish heqqide melumat berdi.

Exmetjan ependining bildürüshiche, esli bu namayish "5-Iyul ürümchi weqesi" ni xatirilesh üchün yaponiye Uyghur jem'iyiti teripidin pilanlan'ghan bolsimu, emma 5-iyul küni tokyo shehiride saylam ötküzülgini üchün namayish bir hepte kéchiktürülüp, 12-iyul yekshenbe küni ötküzülgen. Bu namayish yaponiyediki xongkongluq pa'aliyetchiler bilen birlikte élip bérilghan.

Exmetjan ependining bildürüshiche, yekshenbe küni ötküzülgen bu namayishini yaponiyediki parlamént ezalirimu qollighan. Namayish jeryanida yaponiyede Uyghurlar pa'aliyitini qollighuchi siyasiy erbablardin "Yaponiye Uyghur dostluq guruppisi" ning bashliqi, parlamént ezasi naga'u takashi ependining mektupi bilen xongkongluqlarni qollighuchi parlamént ezasi yama'u xanimning mektupi oqup ötülgen.

Yaponiye Uyghur jem'iyitining yéngidin saylan'ghan ijra'iye re'isi xalmet rozaxun ependimu 13-iyul küni radiyomiz ziyaritini qobul qilip, bu qétimqi namayishning teyyarliq xizmiti heqqide melumat berdi.

Xalmet ependining bildürüshiche, 12-iyuldiki birleshme namayish üchün yaponiye Uyghur jem'iyitining teshebbusi bilen yaponiyediki xongkongluq pa'aliyetchilerning hemkarliqida bir ay ilgirila "Teyyarliq guruppisi" qurulghan. Mezkur guruppining teyyarliqi mezgilide Uyghurlarni yéqindin qollap kelgen yaponiyelik siyasiy pa'aliyetchiler bilen yaponiyediki tibet we teywenlik pa'aliyetchilermu qollaydighanliqi we namayishqa qatnishidighanliqini bildürgen.

Uning bildürüshiche, 12-iyuldiki namayishqa yaponiye Uyghur jem'iyitining yéngidin saylan'ghan re'isi abdukérim abduraxman, mu'awin re'isi exmetjan létip yétekchilik qilghan. Yaponiye Uyghur jem'iyitining sabiq re'isi, nöwette mezkur jem'iyetning pexriy re'isi süpitide jem'iyetning pa'aliyetlirige yéqindin yardemde boluwatqan dunya Uyghur qurultiyining yaponiyediki wekili ilham mexmut ependimu bu qétimqi namayishni orunlashturushta yéqindin hemkarlashqan.

Melum bolushiche, 12-iyul yekshenbe küni tokyoda ötküzülgen Uyghur we xongkongluqlarning birleshme namayishi korona wirusi yuqumidin mudapiye körüsh mezgilide yaponiyede élip bérilghan zor kölemlik ammiwi namayishlarning biri hésablinidiken.

Yaponiye Uyghur jem'iyitining mu'awin re'isi exmetjan ependi we ijra'iye re'isi xalmet ependilerning bildürüshiche, 12-iyul künidiki birleshme namayishqa 350 tin 400 ge qeder kishi qatnashqan. Namayishchilar sépining aldida sherqiy türkistan bayriqi ésilghan kök renglik aptomobilda sherqiy türkistan marshi, xongkong marshi we yaponiyening dölet marshi anglitilghan. Andin bir minuttin tekrar-tekrar Uyghur we xongkong weziyiti heqqide yapon tilida awazliq anglitish élip bérilghan. 4. 5 Kilométirdin 5 kilométirdek musapini piyade mangghan namayishchilar sherqiy türkistanning ay-yultuzluq kök bayriqi, xongkong, tibet, yaponiye we amérika bayraqlirini kötürüp, yol boyi xitay hökümitige qarshi sho'arlarni towlap mangghan.

Ularning bildürüshiche, xitay hökümitige qarshi élip bérilghan Uyghurlar we xongkongluqlarni qollash namayishi ikki kündin buyan yaponiye taratqulirida diqqet qozghighan. 12-Iyul yekshenbe küni yaponiye döletlik téléwiziyesi qatarliq birqanche muhim taratqularning muxbirliri namayish meydanigha kélip, neq meydandin melumat bergen.

Yuqiriqi awaz ulinishidin tepsilatini anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet