Tonulghan zhurnalist sakura'i yoshiko: “Yapon hökümiti derhal xitayni eyibleydighan bir qararni maqulluqtin ötküzüshi kérek”

Ixtiyariy muxbirimiz erkin tarim
2022-01-18
Share
Tonulghan zhurnalist sakura'i yoshiko: “Yapon hökümiti derhal xitayni eyibleydighan bir qararni maqulluqtin ötküzüshi kérek” Yaponiyediki dangliq zhurnalist sakura'i yashiko(Sakurai Yoshiko) xanim yaponiye Uyghur jem'iyitining teklipige bina'en “Uyghur qirghinchiliqigha yaponiye qandaq mu'amile tutushi kérek” namliq doklat bérish yighinidin körünüsh. 2022-Yili 15-yanwar, yaponiye.
RFA/Erkin Tarim

Yaponiyening tokyo shehiride dangliq zhurnalist Sakura'i yoshiko (Sakurai Yoshiko)Xanim yaponiye Uyghur jem'iyitining teklipige bina'en bergen “Uyghur qirghinchiliqigha yaponiye qandaq mu'amile tutushi kérek” namliq doklatida yaponiye hökümitining derhal xitayni eyibleydighan bir qararni maqulluqtin ötküzüshi kéreklikini tekitligen. Mezkur yighinda yene 6 neper Uyghur, Uyghurlarning hazirqi éghir ehwali, shundaqla lagérdiki ata-ana we uruq-tughqanliri toghrisida guwahliq bergen.

15-Yanwar küni ötküzülgen pa'aliyetke yaponiye awam palatasi ezaliri, nahiye, sheher we wilayetlik parlamént ezaliridin bolup üch yüzge yéqin kishi ishtirak qilghan. Yaponiye Uyghur jem'iyitining bash katipi exmetjan létip ependi bu heqte ziyaritimizni qobul qilip, mundaq dédi: “Bu yighin'gha döletlik parlamént ezaliri, nahiye we sheherlik yerlik parlamént ezaliri, jama'et erbabliri we awam puqralardin bolup üch yüzge yéqin kishi ishtirak qildi. Buning aldinqi yérimida tonulghan zhurnalist sakura'i yoshiko xanim yaponiye hökümitining Uyghur qirghinchiliqigha qarita qandaq bir mu'amilide bolushi toghrisida sözlidi. Kéyinki yérimida yaponiyede turuwatqan Uyghurlardin qiz-oghul bolup 6 neper Uyghur, özlirining we uruq-tughqanlirining ziyankeshlikke uchrishi toghrisida guwahliq bérip ötti.”

Yaponiyediki dangliq zhurnalist sakura'i yashiko(Sakurai Yoshiko) xanim yaponiye Uyghur jem'iyitining teklipige bina'en “Uyghur qirghinchiliqigha yaponiye qandaq mu'amile tutushi kérek” namliq doklat bérish yighinidin körünüsh. 2022-Yili 15-yanwar, yaponiye.

Sakura'i yoshiko xanim doklatida yaponiyening dunyaning üchinchi chong iqtisadiy küchi ikenlikini, yaponiye parlaméntining xitayning Uyghurlargha élip bériwatqan irqiy qirghinchiliqini eyiblep qarar maqullishi kéreklikini tekitligen. Exmetjan létip ependi bu heqte mundaq dédi: “Sakura'i xanim bu qétimqi nutqida yaponiyening dunyaning üchinchi chong iqtisadiy küchi bolush salahiti bilen, shundaqla gherb döletliri bilen oxshash qimmet qarashlirini özige ölchem qilghan asiyadiki küchlük dölet bolush salahiti bilen, nöwette köz aldimizda yüz bériwatqan Uyghur irqiy qirghinchiliqigha nahayiti keskin we qattiq rewishte jawab qayturushining zörür ikenlikini bildürdi. U yaponiye siyasetchilirining kallisini silkiwétishi kéreklikini, kéler hepte bashlinidighan yaponiye parlaméntining yighinida yapon hökümitining bu mesilide xitayni eyibleydighan qararni choqum maqulluqtin ötküzüshning zörürlükini tekitlep ötti.”

Tonulghan yapon zhurnalist sakura'i yoshiko xanim nutqida yapon xelqining Uyghurlargha hésdashliq qilip, xitaygha qattiq naraziliq bildürüwatqan bir peytte, yapon hökümitining sükütte turushini qattiq eyibleydighanliqini otturigha qoyghan we köz yéshini tutalmay yighlap ketken. Exmetjan litip ependi bu toghriliq melumat bérip, mundaq dédi: “Yaponiye hökümiti, puqralar arisida xitaygha qarshi shundaq köp naraziliq bolushigha qarimay, téxiche hökümet namidin keskin inkas qayturmay, nahayiti passip, éhtiyatchan mu'amilide bolup kéliwatqanliqi üchün, köp sandiki yapon puqralirining hökümetke bolghan naraziliqining küchlük ikenlikini tekitlidi. Shuning bilen birge özining bu mesilide bir yaponluq bolush, bir insan bolush hemde wijdan igisi we exlaq igisi bolush süpiti bilen, yaponiye hökümitining bu passip pozitsiyesidin qattiq epsuslinidighanliqini éytip yighlap ketti. Uning sözliri zaldikilernimu yighlatti.”

Yaponiyediki dangliq zhurnalist sakura'i yashiko(Sakurai Yoshiko) xanim yaponiye Uyghur jem'iyitining teklipige bina'en “Uyghur qirghinchiliqigha yaponiye qandaq mu'amile tutushi kérek” namliq doklat bérish yighinidin körünüsh. 2022-Yili 15-yanwar, yaponiye.

Ötken yili yaponiye parlaméntidiki bezi siyasiy partiyeler ikki qétim parlaméntqa teklip layihesi sun'ghan bolsimu, emma hazirghiche xitayni eyibleydighan bir qarar maqulluqtin ötmigen. Buninggha qarita yaponiye Uyghur jem'iyiti bezi yapon siyasiyonlar we ammiwi teshkilatlar bilen birlikte pa'aliyetler élip barghan. Awam palatasidiki parlamént ezaliri we yerlik parlamént ezaliridin bolup, 83 parlamént ezasining qollishigha érishken. Ular bu qétim 83 parlamént ezasi imza qoyghan teklip layihesini yapon parlaméntigha sun'ghan. Exmetjan litip ependi bu heqtimu melumat berdi.

Yaponiye Uyghur jem'iyitining re'isi, doktor abdukérim abduraxman ependi ötken yili peqet yaponiye parlaméntidila 15 qétimgha yéqin pa'aliyet ötküzgen bolsimu, emma yaponiyediki dangliq shexslerning téxiche bu mesilide téxiche éniq pozitsiye bildürmigenlikini, bu qétim tonulghan shexislerdin sakura'i yoshiko xanimning “Uyghur qirghinchiliqigha yaponiye qandaq mu'amile tutushi kérek” namliq doklatining yaponiyede Uyghur dewasi yolidiki zor bir ilgirilesh bolghanliqini bayan qildi.

Yaponiye Uyghur jem'iyiti idare hey'itining ezasi xelmet ruzaxun ependining bildürüshiche, tonulghan zhurnalist sakura'i yoshiko xanimning yaponiye siyasitige bolghan tesirimu zor iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet