Японийәниң сабиқ баш министири шинзо абе уйғур һәйитини қобул қилди

Ихтиярий мухбиримиз әркин тарим
2020-10-08
Share
shinzo-abe-ilham-mexmut.jpg Японийәниң сабиқ баш министири шинзо абе әпәнди парламенттики ишханисида уйғур җәмийитиниң рәиси доктор абдукерим абдурахман вә д у қ японийәдики вәкили илһам мәхмут әпәндиләрни қобул қилди. 2020-Йили 7-өктәбир, японийә.
RFA/Erkin Tarim

Японийәниң сабиқ баш министири шинзо абе әпәнди 7-өктәбир күни японийә вақти чүштин кейин саәт үчтә парламенттики ишханисида японийә уйғур җәмийитиниң рәиси доктор абдукерим абдурахман әпәнди, башқуруш һәйити әзаси хәлмәт розахун әпәнди, гүлистан әзиз ханим вә дуня уйғур қурултийиниң японийәдики вәкили илһам мәхмут әпәнди қатарлиқларни қобул қилған. японийә уйғур җәмийитиниң башқуруш һәйити әзаси хәлмәт розахун әпәнди учришишниң интайин үнүмлүк өткәнликини билдүрди.

Хәлмәт розахун әпәнди уйғур һәйитиниң шинзо абе әпәндигә уйғурларниң һазирқи еғир вәзийити тоғрисида, җүмлидин һәйәт әзалириниң өзлириниң уруқ-туғқанлириниң әһвали тоғрисидиму мәлумат бәргәнликини оттуриға қойди.

Бу қетимқи учришишта шинзо абе уйғур һәйитигә немиләрни деди? дуня уйғур қурултийиниң японийәдики вәкили илһам мәхмут әпәнди бу һәқтә зияритимизни қобул қилди. Униң ейтишичә, шинзо абе әпәнди уларни қизғин күтүвалған. Шинзо абе японийәниң баш министири болуп вәзипә өтәватқан мәзгилләрдә, болупму хитай рәиси ши җинпиң билән учрашқанда, хоңкоң мәсилиси билән уйғур мәсилисини оттуриға қойған икән. Шу чағда ши җинпиң хоңкоң мәсилисигә инкас қайтурмиған болсиму, әмма уйғур мәсилисини оттуриға қойғинида, қаттиқ җиддийләшкән икән. Илһам мәхмут бу һәқтә мәлумат бәрди.

Ундақта, японийәниң сабиқ баш министири шинзо абе уйғурлар үчүн немиләрни қилған киши иди?

Хәлмәт розахун әпәнди шинзо абе партийә рәиси, парламент әзаси болуп вәзипә өтәватқан 2007-йили 11-айда тунҗи қетим японийәни зиярәт қилған д у қ ниң сабиқ рәиси рабийә қадир ханимни қобул қилғанлиқини, хитай рәиси ху җинтав японийәни зиярәт қилғанда тарихчи тохти музарт әпәндиниң мәсилисини тилға алғанлиқини, японийә парламентида «уйғур достлуқ гурупписи» қурушқа зор төһпә қошқанлиқини оттуриға қойди.

«Шинзо абе иккинчи қетим баш министир болған мәзгилидә уйғурлар үчүн немиләрни қилип бәрди?» дегән соалимизға халмәт розахун әпәнди мундақ җаваб бәрди: «иккинчи қетимлиқ абе шинзо һөкүмити мәзгилидә у дөләт башлиқлири учришиши вә бирләшкән дөләтләр тәшкилати йиғини қатарлиқ сәһниләр арқилиқ уйғур мәсилисини яхшилаш үчүн көп күч чиқарди.»

Хәлмәт розахунниң тәкитлишичә, 2018-йили 26-өктәбир вә 2019-йили 12-айниң 23-күни хитай рәиси ши җинпң билән болған сөһбәттә шинзо абе шәрқий түркистандики кишилик һоқуқ дәпсәндичиликини биваситә оттуриға қойған икән.

Хәлмәт розахун йәнә мундақ деди: «2019-йили 7-айда 22 дөләт йиғинида бөсүш характерлик бирләшмә баянат елан қилип, кәң көләмлик тутуп турушни әйиблиди вә тәкшүрүшни тәләп қилди. японийә ғәрб дөләтлиридин башқа бирләшмә баянатқа имза қойған асиядики бирдин-бир дөләт. Буларниң һәммиси шинзо абениң уйғур мәсилисини яхшилашқа көңүл бөлидиғанлиқиниң испати сүпитидә тарихқа йезилиду. Уйғур хәлқигә вакалитән йәнә бир қетим униңға рәһмәт ейтимиз.»

Шинзо абе бу йил 8-айниң 28-күни баш министирлиқ вәзиписидин истепа бәргәнликини елан қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.