Yaponiyening kawaguchi shehiride Uyghur qirghinchiliqini tonutush pa'aliyiti élip bérilghan

Ixtiyariy muxbirimiz erkin tarim
2021-10-12
Share
Yaponiyening kawaguchi shehiride Uyghur qirghinchiliqini tonutush pa'aliyiti élip bérilghan Yaponiyening saytama ölkisi, kawaguchi shehiridiki eng chong métro békitining kirish we chiqish nuqtilirida ötküzülgen namayishta yaponiye Uyghur jem'iyitining mu'awin re'isi xalmet rozaxun ependi(ongda) sözlimekte. 2021-Yili 9-öktebir.
RFA/Erkin Tarim

Xitayning qirghinchiliq siyasetlirige qarshi naraziliq namayishliri dunyaning herqaysi jaylirida dawamlishiwatqinidek yaponiyedimu izchil halda dawamlashmaqta. Yaponiyede bu yil 2-ayda bashlan'ghan mezkur pa'aliyet hazirghiche oxshimaydighan 20 ölke we sheherde 75 meydan élip bérilghan bolup, pa'aliyet jeryanida jem'iy 79 ming etrapida waraqche tarqitilghan. 9-Öktebir küni yaponiyening saytama ölkisi, kawaguchi shehiridiki eng chong métro békitining kirish we chiqish nuqtilirida yaponlargha Uyghurlarning hazirqi éghir weziyitini anglitish üchün teshwiqat pa'aliyiti ötküzülgen.

Yaponiyening saytama ölkisi, kawaguchi shehiridiki eng chong métro békitining kirish we chiqish nuqtilirida ötküzülgen namayishtin körünüsh. 2021-Yili 9-öktebir.
Yaponiyening saytama ölkisi, kawaguchi shehiridiki eng chong métro békitining kirish we chiqish nuqtilirida ötküzülgen namayishtin körünüsh. 2021-Yili 9-öktebir.

Yaponiye Uyghur jem'iyitining orunlashturushi bilen ötküzülgen mezkur pa'aliyetke yaponiye Uyghur jem'iyitining rehberliri, ezaliri we yaponiyelik pida'iylar qatnashqan. Pa'aliyetke Uyghurlardin köprek yaponlar qatnashqan bolup, yaponiye Uyghur jemityi wekilliridin biri exmetjan litip ependi yéqinqi mezgillerde yaponiyede Uyghur mesilige bolghan sezgürlükning éship méngiwatqanliqini, yaponiyening her qaysi jaylirida xitaygha naraziliq bildürüsh pa'aliyetliriningmu köpiyiwatqanliqini éytti.

Exmetjan litip ependining éytishiche, mezkur pa'aliyet yaponiye Uyghur jem'iyitining teshkillishi bilen bu yil 2-aydin buyan her hepte axirida oxshimighan ölke we sheherlerde 2-3 sa'et Uyghurlarning éghir weziyiti tonushturulghan teshwiqat wariqi tarqitish, kochilarda sözlesh, sho'ar towlash we luzunkilarni kötürüsh pa'aliyiti élip bériliwatqan bolup, 9-öktebir küni yaponiyening saytama ölkisi, kawaguchi shehiri, kawaguchi métro békitining kirish we chiqish nuqtilirida Uyghurlarning hazirqi éghir weziyitini anglitish üchün teshwiqat pa'aliyiti ötküzülgen. Exmetjan litip ependi bu heqte tepsiliy melumat berdi.

Exmetjan litip ependi bu yil 2-aydin 10-ayning 9-künigiche 70 qétimdin artuq Uyghurlarning hazirqi éghir weziyitini tonushturush pa'aliyiti élip barghanliqini, 9-öktebir küni yaponiyening kawaguchi shehiride ötküzülgen pa'aliyetning burunqi pa'aliyetlerge oxshimaydighan terepliri toghrisida toxtaldi.

Exmetjan litip ependi Uyghur dewasining yaponiyede natonush emeslikini, xitay bilen qoshna dölet bolghanliqi üchün Uyghur mesilisining yaponiyede keng ammiwi asasqa ige ikenlikini, 2-aydin buyan izchil halda bu xil pa'aliyetni élip bérish arqiliq yapon parlamént ezaliri we xelq ammisining zor qollishigha érishkenlikini bayan qildi.

Yaponiye Uyghur jem'iyitining mu'awin re'isi xalmet rozaxun ependi ziyaritimizni qobul qilip, bu pa'aliyet bashlan'ghanda nahayiti az kishi qatnashqan bolsimu, bügünki kün'ge kelgende 70 yaponiyeliktin teshkil tapqan Uyghurlarni qollash guruppisi qurulghanliqini bildürdi. U, mundaq dédi: "Biz her hepte axiridiki pa'aliyetke az dégende 7-8 Uyghur qatnishiwatimiz. Lékin bizning yapon qollighuchilirimiz bar. Hazir yaponiye Uyghur jem'iyitini qollaydighan 70 kishidin terkib tapqan Uyghurlarni qollash guruppisi bar. Bulardin sirt, her qaysi sheherlerde pa'aliyet ötküzsek sheherlik parlamént ezaliri, döletlik parlamént ezalirimu qatniship bizni qollaydighanliqini tekitlewatidu. Bular zimistan qish we issiq künlerdimu kélip pa'aliyitimizge qatnishiwatidu. Bulargha rehmet éytimiz".

Xalmet rozaxun ependi9-öktebir künidiki pa'aliyetke yaponiyening eng chong dölet téléwiziyesi "NHK" ning muxbirliri we bashqa köp sanda muxbirning ishtirak qilghanliqini bayan qildi. U, mundaq dédi: "Bu qétim biz pa'aliyet ötküzgen kawaguchi shehiri xitaylar eng köp sheher. Mezkur sheherning sheherlik parlamént ezaliri kélip qatnashti we söz qildi. Yaponiyening eng chong téléwiziye istansisi bolghan n h k téléwiziyesining muxbirliri neq meydandin xewerlerni aldi. 70 Qétimdin köprek bu pa'aliyetni ötküzduq, her qétimliqi köp sanda waraqche tarqitimiz. Bu pa'aliyetlerde kishiler biz silerni tebrikleymiz we qollaymiz, tirishchanliq körsitishni dawam qilinglar déyishidu".

Mezkur pa'aliyet 10-ayning 23-küni kündüzi yaponiyening iwati ölkiside ötküzülidighan bolup, shu küni axsham Uyghurlar toghrisida doklat bérish yighini ötküzülidiken. 24-Chésla yekshenbe küni yaponiyening awumori ölkiside Uyghur qirghinchiliqini tonushturush pa'aliyiti ötküzülidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet