Ghuljada türmidin chiqqan yaqup hesen harpa küni, oghli bilal yaqup héyt küni tügep ketken

Muxbirimiz shöhret hoshur
2022-05-19
Share
Ghuljada türmidin chiqqan yaqup hesen harpa küni, oghli bilal yaqup héyt küni tügep ketken Türmidin chiqip, rozi héytning harpa küni tügep ketken yaqup hesen(oyda) we rozi héyt küni tügep ketken 20 yashliq oghli bilal yaqup. 2022-Yili .
Oqurmen teminligen

Ötken hepte ijtima'iy taratqulardin féysbukta ghuljada yüz bergen dada-balining ölüm weqesi heqqide bir uchur tarqaldi. Uchurda türmidin chiqqan tijaretchi yaqup hesenning rozi héytning harpa küni, uning 20 yashliq oghli bilal yaqupning rozi héyt küni tügep ketkenliki, bu échinishliq weqening ghuljaning héyt keypiyatini téximu buruxtumlashturghanliqi bayan qilin'ghan. Muxbirimizning éniqlashliri dawamida, mezkur dada-balining ölüm uchurining toghriliqi aydinglashti.

Xitayning shunche qattiq uchur cheklimiliri turuqluq, Uyghur élida türme we lagérdin chiqip ölgenlerning uchurlri izchil halda tarqalmaqta. Köpinchisi widiyo yaki resimlik bu uchurlarda, ölgüchining yéshining téxi 50 ke barmighanliqi, hemmisining dégüdek oruqlap bir tére, bir ustixan haletke kélip qalghanliqi bayqilidu. Mana bu xil ölüm uchurliridin biri ghulja shehiridiki zerger yaqup hesen we oghli oghli bilal yaqup heqqididur.

Féysbukta bu heqte tarqalghan bir uchurda déyilishiche, yaqup hesen bu yil 43 yashta bolup, u türmidin késel halette chiqip, 20 kündin kéyin, yeni roza héytning harpa küni tügep ketken. Uning oghli bilal yaqup bu yil 20 yashta bolup, héyit küni dadisining méyitini uzitiwatqanda hushidin ketken we shu sa'ette hayatidin ayrilghan. Biz bu uchurlarning toghriliqini aydinglashturush üchün, yaqup hesen olturushluq ahaliler kométitigha téléfon qilduq ahalilerdin biri öz tewelikide türme we lagérdin chiqip tügep ketkenlerning köplikini bildürgen bolsimu, emma kimlikliri heqqide melumat bermidi.

Yaqup hesenni yéqindin tonuydighan yurtdashliridin nöwette türkiyede yashawatqan tursunjan ependi, uning ölümi heqqidiki uchurlarni féysbuktin körgendin kéyin ghuljagha téléfon qilip, bu uchurning toghriliqini sürüshte qilghan. Uning tonushliri isharetlik bayanlar bilen bu uchurning toghriliqini delilligen. Tursunjanning igilishiche, yaqup hesen 2018‏-yili tutqun qilin'ghan, bir yildin kéyin késiwétilip türmige tashlan'ghan. Bu yil roza héyttin 2-3 hepte awwal éghir késel halette qoyup bérilip, héytning harpa küni tügep ketken. Déyilishiche, héyt küni uning méyiti uzitiliwatqanda, uning 20 yashliq oghli bilal yaqup, bu musibetning azabigha berdashliq bérelmigen we méyitni depne qilish meydanida hushidin ketken péti hayatidin ayrilghan.

Yaqup hesenning özini ashkarilashni xalimighan yurtdashliridin yene birining inkas qilishiche, yaqup hesenning méyitini uzitish ishlirini sheherlik saqchi we dölet amanliq etritidin bashqa yene aptonum rayondin chüshken bir xizmet guruppisimu nazaret qilghan. Ene shu guruppidiki xadimlardin biri yaqup hesenning dawalash ünüm bermey buningdin 20 künche awwal, yeni roza héytning harpa küni tügep ketkenlikini delillidi. U yene yaqup hesenning ölümidin bir kün kéyin oghli bilalningmu tügep ketkenlikini ashkarilidi.

Melum bolushiche, yaqup hesen durust exlaqi we xeyr-saxawet ishliri bilen ghulja shehiride tonulghan kishilerdin bolup, uning we oghlining ölümi ghuljadiki ahalilerning héyt keypiyatini téximu buruxtumlashturghan.

Ghulja sheher könchi mehellidiki bir ahaliler kométitining xadimi yaqup hesenning tögep ketken künining etisi oghliningmu tügep ketkenlikini ashkarlidi. U yene yaqup hesenning ölümidin burun tutqunda ikenlikini bayan qilish bilen birlikte, uning tutulush sewebli'iridin birining namaz oqush ikenlikini bildürdi. Déyilishiche, yaqup hesen tutulushtin awwal salametlikide héchqandaq mesile yoq bolup, u türmide üch yil yatqandin kéyin, ornidin turalmas haletke kélip qalghan. Yaqup hesenning uruq-tughqanliri uni ghulja we ürümchidiki doxturxanilargha apirip dawalitip baqqan bolsimu, dawalash ünüm bermigen we 43 yéshida hayatidin ayrilghan. Oghlimu bu yil 20 yashta bolup, uning ölümige musibet azabidin bashqa yene némilerning tesir qilghanliqi hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet