"Yawropa magnitiskiy qanuni" layihesi d u q rehberlirining yaxshi bahasigha érishti

Ixtiyariy muxbirimiz ekrem
2020-10-21
Share
Maros-Sefcovic-Maros-sefchowic-1.jpg Yawropa komissiyisining mu'awin prézidénti maros séfchowich(Maros Sefcovic) ependi yawropa parlaméntida sözlimekte. 2020-Yili 19-öktebir, biryussél, bélgiye.
AFP

Kishilik hoquqni depsende qilghuchilargha sayahet cheklimisi we mal mülkini tonglitish jazasini yürgüzüsh teshebbus qilin'ghan.

19-Öktebir yawropa ittipaqida yawropa komissiyonining mu'awin re'isi maros séfchowich teripidin "Yawropa magnitiskiy qanuni" ning deslepki layihisi otturigha qoyulghan. Dunya Uyghur qurultiyi mezkur qanun layihesining otturigha qoyulushini alqishlidi.

Mezkur layihede dunyaning herqaysi jayliridiki kishilik hoquqni depsende qilghuchi shexslerge qarita yawropagha sayahet qilish cheklimisi qoyush we ularning yawropa miqyasidiki mal-mülkini tonglitish asasiy mezmun qilin'ghan.

"Yawropa magnitiskiy qanuni" maqulluqtin ötse, buning Uyghurlargha qandaq paydisi bölishi mumkin?

D u q re'isi dolqun eysa ependi bu so'algha jawab bergende, buning xitay üchün éghir bir zerbe bolidighanliqini, bu qanun yolgha qoyulsa, nurghunlighan xitay shirketlirining put-qollirining baghlinip qalidighanliqini, buning xitayning sherqiy türkistandiki jaza lagérlirigha qeder tesir körsitishi mümkinlikini ilgiri sürdi.

D u q ning mu'awin re'isi perhat muhemmidi ependimu "Yawropa magnitiskiy qanuni" layihesining otturigha qoyulghanliqigha ijabiy baha berdi. U sözide, bu qanunning maqullinishigha ümid bilen qaraydighanliqini bayan qildi.

Gérmaniyediki Uyghur ziyaliysi enwer ehmet ependi bu heqte toxtalghanda, yawropa ittipaqining amérikadin ülge élip "Yawropa magnitiskiy qanuni" arqiliq sherqiy türkistandiki Uyghurlar üstidin yürgüzülüwatqan zulum bilen alaqidar bolghan xitay mustebit emeldarlirigha we mejburiy emgekke chétishliq xitay shirketlirige jaza tedbiri qollinishini barliq Uyghurlarning arzu qilidighanliqi we qizghin qollaydighanliqini eskertti. U sözide yawropa ittipaqining eslidiki xitay siyasitini tedrijiy özgertiwatqan bir mezgilde otturigha qoyulghan bu layihening ijabiy bir qedem ikenlikini tekitlidi.

Melumatlargha qarighanda, yawropa ittipaqida bezi mustebit hakimiyetlerge we kishilik hoquq depsendichilikige chétishliq shexslerge qarita amérika kebi jaza tedbirliri qollinish mesilisi uzundin buyan talash tartish qilin'ghan bolsimu, hazirgha qeder bir netije chiqmighan. Rusiyediki siyasiy aktip nawalny zeherlik gaz bilen zeherlen'gende, türkiyediki siyasiy aktiplar, muxbirlar qolgha élin'ghanda, xitayda 1 milyondin artuq Uyghurlar jaza lagérlirida qirghinchiliqqa uchrawatqanda, xongkongdiki siyasiy pa'aliyetchiler basturuliwatqanda, bélarusiyede namayishchilar tutqun qilin'ghanda yawropa parlaméntining bir bölük ezaliri bu jinayetlerge munasiwetlik shexslerge qarita jaza tedbirliri qollinishni teshebbus qilghan. Biraq yawropa ittipaqining bolupmu dunyadiki mustebit shexslerge yürgüzidighan ayrim bir "Jaza qanuni" bolmighanliqi üchün charisiz qalghan.

Emma yawropa ittipaqining émbargo qanuni hélimu mewjut bolup, 1989-yilidiki tyen´enmén qirghinchiliqidin kéyin xitaygha qarita yolgha qoyghan "Qoral-yaraq we yuqiri téxnika émbargosi" hazirgha qeder küchke ige bolup kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.