Явропа парламентидики "уйғур достлуқ гурупписи" кона әзалирини узитип, йеңи әзалирини күтүвалған

Ихтиярий мухбиримиз әкрәм
2019-06-28
Share
dolqun-dostluq.jpg RFA/Ekremявропа парламентидики "уйғур достлуқ гурупписи" ниң йеңи әзаларни қарши алған вә кона әзалирини узатқан мурасимда (оңдин соға) д у қ рәиси долқун әйсявропа парламентиниң муавин рәиси вә уйғур достлуқ гурупписиниң әзаси фабио массимо часталдоа, лусийә парручи ханим вә рян барри әпәндиләр. 2019-Йили 26-июн, бирюссел.
RFA/Ekrem

Явропа парламентидики "уйғур достлуқ гурупписи" мурасим өткүзүп, йеңи әзаларни қарши алған вә кона әзалирини узатқан.

26-Июн явропа парламентида дуня уйғур қурултийи, "уйғур достлуқ гурупписи" вә вакаләтсиз милләтләр тәшкилатиниң һәмкарлиқида "уйғур достлуқ гурупписи" ниң йеңи әзаларни қарши елиш, кона әзалирини узитиш мурасими болуп өткән.

Игилишимизчә, д у қ рәиси долқун әйса, қурултайниң бирюсселда турушлуқ вакаләтчи хадими рян барри һәмдә вакаләтсиз милләтләр тәшкилатиниң хадими лусийә парручи қатарлиқлар 25-июндин башлап белгийә пайтәхти бирюсселдики явропа парламентида җаза лагерлири мәсилисини аңлитиш билән биргә "уйғур достлуқ гурупписи" ға мунасивәтлик паалийәтләр билән мәшғул болуп кәлмәктә иди.

Долқун әйса әпәндиниң билдүрүшичә, явропа парламентидики "уйғур достлуқ гурупписи" 2017-йили 19-өктәбир күни қурулған. Бу гуруппиға һазирғичә 19 нәпәр парламент әзаси рәсмий әза болуп қатнашқан һәмдә уйғурлар мәсилисиниң явропа иттипақиға әза 28 дөләт ичидә күнтәртипкә көтүрүлүши вә уйғурларға мунасивәтлик қарарларниң қобул қилиниши үчүн көп әҗирләр сәрп қилған.

Һалбуки, бу йил 26-май явропа иттипақиға әза барлиқ дөләтләрдә парламент сайлими өткүзүлүп, "уйғур достлуқ гурупписи" ға әза болған бир қисим парламент әзалири сайламға қатнашмиған яки сайлиналмиған. Бу сәвәбтин явропа парламентидики "уйғур достлуқ гурупписи" ни тәртипкә селиш, кона әзаларни узитиш билән биргә йеңидин әза қобул қилиш зөрүрийити туғулған.

26-Июн явропа парламентида өткүзүлгән бу мурасимға "уйғур достлуқ гурупписи" ниң рәиси, явропа парламентиниң әзаси согар әпәнди риясәтчилик қилған. Долқун әйса әпәнди йиғинда нутуқ сөзләп, "уйғур достлуқ гурупписи" ға әза болуп узундин буян шәрқий түркистан хәлқиниң аһу-зарини явропа иттипақиға тәвә 28 дөләткә аңлитиш үчүн әҗирләр сәрп қилған, явропа парламентида 3 муһим қарарниң, җүмлидин 2018-йили 10-айда шәрқий түркистандики җаза лагерлири мәсилиси тоғрисида 15 маддилиқ қарарниң қобул қилинишиға һәссиләр қатқан кона парламент әзалириға уйғур хәлқи намидин рәһмәтлирини билдүргән. Долқун әйса әпәнди бу йиғинда йәнә уйғур достлуқ гурупписидин айриливатқан парламент әзалириға д у қ намидин "тәшәккүр ләвһәси" тәқдим қилған, йеңи әзаларни күтүвалған.

Қурултайниң бирюсселдики хизмәтчи хадими рян барри әпәнди бу һәқтә тохталғанда, "уйғур достлуқ гурупписи" ниң уйғурлар мәсилисини, болупму нөвәттә шәрқий түркистанда һөкүм сүрүватқан җаза лагерлири паҗиәсини явропа парламентиға тонутуштики ролиниң наһайити зорлиғини тилға алди. У мундақ деди: "‹уйғур достлуқ гурупписи', болупму 2017-йили хитай һакимийитиниң шәрқий түркистанда җаза лагерлирини тәсис қилип, милйонлиған уйғурлар үстидин еғир зулум сиясити йүргүзүватқанлиқи ашкариланғандин кейин, явропа парламентида уйғурлар мәсилисини җиддий бир тема һалида оттуриға көтүрүп чиқишта зор рол ойниди. явропа иттипақи рәһбәрлириниң хитай билән болған диялоглар вә сөһбәтләрдә җаза лагерлири мәсилисини тәкрар оттуриға қоюшиға түрткә болди. Җаза лагерлирини шәртсиз тақаш һәққидә парламентта қарарлар қобул қилишқа һәйдәкчилик қилди. ‹Уйғур достлуқ гурупписи' ниң мәвҗутлуқини сақлаш вә уни даима күчләндүрүш уйғурлар мәсилисиниң явропа иттипақидики тәсиригә капаләтлик қилишниң алдинқи шәрти. Хитай һакимийити алдинқи йили явропа парламентида уйғур достлуқ гурупписиға қарши ‹хитай достлуқ гурупписи' ни қуруп чиқти. Чүнки хитай уйғурларниң явропа парламентидики тәсиридин чөчүгән иди. Униң билән тиғму-тиғ елишиш үчүн бизниң уйғур достлуқ гурупписини техиму тәрәққий қилдурушқа еһтияҗимиз бар."

Мәркизи бирюсселдики UNPO ниң хизмәтчи хадими лусийә ханим бу һәқтә тохталғанда, "уйғур достлуқ гурупписи" ниң бир қисим кона әзалиридин айрилип қалғанлиқидин әпсуслинидиғанлиқини билдүрди. У мундақ деди: "‹уйғур достлуқ гурупписи' ға әза болған явропа парламентиниң бир қисим хадимлири уйғурлар мәсилисигә өз миллитиниң мәсилисигә көңүл бөлгәндәк көңүл бөләтти. Улар хитайниң бесимлириға писәнт қилмиған, совға-саламлириға алданмиған, сахта тәшвиқатлиридин қаймуқмиған, адаләт мәйданида чиң туруп, шәрқий түркистандики хитай зулумиға хатимә берилиши, уйғурларниң әркин һаяти үчүн зор бәдәлләр төлигән иди. Әпсус, явропа иттипақиға әза 28 дөләттә елип берилған парламент сайлими түпәйлидин уйғур достлуқ гурупписиниң бу бир исим пидакар әзалиридин айрилип қалдуқ. Бизниң әмдики вәзипимиз 700 дин артуқ парламент әзалири ичидин шәрқий түркистан мәсилисигә уларға охшаш көңүл бөлидиған парламент әзалирини издәп тепип йеңидин әза қилиш арқилиқ уйғур достлуқ гурупписиниң мәвҗутлуқи һәм тәрәққиятиға капаләтлик қилиштур."

Д у қ рәиси долқун әйса әпәндиниң явропа парламентидики паалийәтлири 29-июн ахирлишидикән. У йәнә шәрқий түркистандики җаза лагерлири мәсилиси вә "уйғур достлуқ гурупписи" ға аит хизмәтлирини давамлаштуридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт