Явропа уйғурлар үчүн қозғалмақта

Ихтиярий мухбиримиз әкрәм
2019-12-23
Елхәт
Пикир
Share
Принт

Явропада хитайниң җаза лагерлири вә хитайниң уйғурларға йүргүзүватқан зулумлириға қарши һәрикәтләр кәң көләмдә әвҗ алмақта.

Мушу бир һәптә ичидә германийә, австрийә, голландийә қатарлиқ дөләтләрдә яшаватқан йәрлик хәлқләр вә түркләр өзлүкидин қозғилип, хитайниң җаза лагерлири вә уйғурларға йүргүзүватқан зулумлириға қарши һәр хил паалийәтләрни қанат яйдурди.

20-Декабир истанбулда, 22-декабир хоңкоңда қанчә 10 миңлиған кишиләр уйғурлар үчүн қозғилип намайиш елип барғанға охшаш явропа әллиридиму уйғурларни қоллаш, хитайниң җаза лагерлириға қарши туруш мунасивити билән һәр түрлүк паалийәтләр мәйданға кәлмәктә.

19-Декабир германийәниң һамбург шәһиридики түркләр өзлүкидин қозғилип, хитайниң җаза лагерлири сияситигә қарши намайиш елип барған. Ундин илгири германийәниң франкфурт шәһиридики түркләрму хитайға қарши қозғалған иди. 22-Декабир берлиндики түрк җамаитиму хитай әлчиханиси алдида намайиш елип берип «шәрқий түркистанға азадлиқ! хитай җаза лагерлирини дәрһал тақисун!» дегәндәк шоарларни товлашқан.

21-Декабир иҗтимаий таратқуларда голландийәдики университет оқуғучилириниң уйғурларни қоллаш йүзисидин елип барған паалийәтлиригә аит көплигән учурлар тарқалди. Алий мәктәп оқуғучилири видейо филимлири арқилиқ хитайдин «етник қирғинчилиқни тохтитишни, җаза лагерлирини тақашни» тәләп қилған. 21-Декабир күни австрийәниң салзбург шәһиридиму хитайға қарши намайиш елип берилған. 21-Декабир йәнә германийәниң мюнхен шәһиридики яшлар елип барған намайиштин башқа йәнә германийәниң нүрнберг шәһиридики университет оқуғучилириму өзлүкидин қозғилип, шәһәр мәркизидики чоң мәйданда хитайниң җаза лагерлириға қарши намайиш елип барған.

Д у қ рәиси долқун әйса әпәндиниң билдүрүшичә, явропадики бу қозғилишларға хитайниң җаза лагерлириға мунасивәтлик мәхпий һөҗҗәтлириниң ашкарилиниши, германийәлик даңлиқ путбол чолпини мәсут өзилниң 13-декабир елан қилған чақириқи, 18-декабир явропа парламентида өткүзүлгән илһам тохтиға «сахароф мукапати» бериш мурасими қатарлиқларму бәлгилик тәсир көрсәткән.

Нүрнбергда өткүзүлгән алий мәктәп оқуғучилириниң намайишиға мюнхен шәһиридики бир қисим уйғурларму берип қатнашқан. Д у қ ниң явропаға мәсул вәкили, явропа шәрқий түркистан бирлики тәшкилатиниң рәиси әсқәрҗан әпәнди нүрнбергда өткүзүлгән намайиш һәққидә бизни бәзи мәлуматлар билән тәминлиди. Униң билдүрүшичә, нүрнберг университети оқуғучилириниң өзлүкидин тәшкиллиши билән өткүзүлгән уйғурларни қоллаш, хитайниң җаза лагерлири сияситигә қарши туруш намайиши наһайити яхши елип берилған. Намайишчилар җараңлиқ шоарлири һәм нутуқлири билән хитай һакимийитигә қарши ирадилирини ипадә қилиш билән биргә, униң җаза лагерлири сияситини қаттиқ әйиблигән.

Бу намайишқа мюнхендики уйғур җамаәт әрбаби аблимит турсун әпәндиму берип қатнашқан болуп, у германийәдики алий мәктәп оқуғучилириниң уйғурлар мәсилисигә қизиқип, өзлүкидин хитайға қарши бундақ намайишларни елип беришиниң явропада яхши бир башлиниш болғанлиқини тилға алди.

Д у қ рәиси долқун әйса әпәнди 21-декабир тәклипкә бинаән берлинда, 22-декабир мюнхенда университетларда әрәб, түрк қатарлиқ мусулман милләтләрниң яшлириға уйғурлар тоғрисида доклат берип, уларни хитайға қарши паал қозғилишқа вә сүкүтлирини тәрк етип өз дөләтлирини қозғашқа дәвәт қилған.

Д у қ рәһбәрлириниң билдүрүшичә, алдимиздики күнләрдә йәнә явропадики чоң шәһәрләрдин берлин, лондон, париж қатарлиқ бир қанчә җайларда көлими зор болған намайишлар елип берилидикән.

Пикирләр (0)
Share
Толуқ бәт