Dölitige qaytalmaywatqan türkiye wetendishi yehya qurbanning ariliqta ikki yil lagérda yatqanliqi ashkarilandi

Muxbirimiz shöhret hoshur
2021-05-18
Share
Dölitige qaytalmaywatqan türkiye wetendishi yehya qurbanning ariliqta ikki yil lagérda yatqanliqi ashkarilandi 45 Yilning aldida türkiyege wetendash, yeni puqra bolghan yehya qurban we uning türkiye puqrasi ayali amine qurban. 2016-Yili ürümchi.
Photo: RFA

44 Yilliq türkiye wetendishi yehya qurban ürümchide tutqun qilinip ana yurti qaghiliqqa élip kétilgendin kéyin, uning qanuniy salahiyiti heqqide türkiye hökümitimu, uning türkiyediki perzentlirimu uchur alalmay kéliwatqan idi. Roza héytning birinchi küni saqchilarning nazariti astida perzentliri bilen ötküzgen widéyoluq söhbette u qizining qistap sorishi netijiside, özining nöwette "Erkin" ikenliki, "Terbiyelesh" tin 2019-yilining axiri chiqip bolghanliqini bayan qilish arqiliq, özining 2017-yildin bashlap ikki yil lagérda yatqanliqini ashkarilighan.

44 Yilliq türkiye wetendishi yehya qurban ayali bilen ürümchide tutqun qilin'ghandin kéyin, ikki yilgha qeder ularning qaghiliqqa ekitilgenlikidin bashqa hiéchqandaq uchur bolmighan. Türkiye tashqiy ishlar ministirlikimu yehya qurban we ayali heqqide héchqandaq uchur alalmighan. Ular2019-yilning axiridin bashlap türkiyediki perzentliri bilen arilap ikki-üch minutche téléfonda sözlishish pursitige ige bolghan bolsimu, emma ular bu söhbette özlirining saq-salametlikidin bashqa uchur bérelmigen.

Bu yil roza héytning birinchi küni saqchilarning nazaritide ötküzülgen widéyoluq söhbette, yehya qurbanning chong qizi xanqiz qurban dadisining jazamudditini ötewatqan yaki ötimeywatqanliqini, yeni késilgen yaki késilmigenlikini qistap sorishi netijiside, u özining jaza ötimeywatqanliqi we "Erkin" yashawatqanliqini bildürgen. U körüshüshte qizigha özining "Terbiyelesh" tin aliqachan chiqip bolghanliqini bayan qilish arqiliq özlirining ariliqta ikki yil lagérda yatqanliqini ashkarilighan.

Özining 2019-yili 10-ayda lagérdin chiqip bolghanliqini tilgha alghan yehya qurban, qizining ularning néme üchün, yeni qandaq bir xataliq bilen lagérda yatqanliqi heqqidiki so'aligha jawap bérelmigen.

Melum bolushiche, 2017-yili lagér tutquni bashlan'ghanda, xanqiz qurban ata-anisining türkiyege qaytip kéliwélishini telep qilghan. Emma yehya qurban özining türkiye puqrasi ikenlikini we özige xewp yetmeydighanliqini bildürüp, perzentlirini xatirjem qilghan.

Yehya qurban özining lagérdin chiqip bolghanliqini bildürgen bolsimu, néme üchündur, yenila cheklime ichide yashawatqanliqining, döliti türkiyegila emes, hetta ürüchige bérishqimu ruxset alalmaywatqanliqining sewebini chüshendürüp bérelmigen.

Xanqiz qurban widéyo söhbiti dawamida ata-anisini nazaret qilip turuwatqan kök kiyimlik ikki xadimnimu körüp qalghan.

Yehya qurbanning söhbettiki bayanliridin melum bolushiche, ular lagérdin chiqip bolghan, "Qarliq" namidiki bir a'ililikler qorosida olturuwatqan bolsimu, emma ular yenila nazaret we cheklimilerdin qutulup bolalmighan.

Ötken yili mekit nahiyeside lagérdin chiqqanlar üchün qurulghan "14-‏Ahaliler kométiti" namidiki bir a'ililikler lagérining barliqi, bu lagérda mexsus "Terbiyelesh" tin qoyup bérilgenlerning orunlashturulghanliqi, ularning a'ile ezaliri bilen birlikte yashash hoquqigha érishken bolsimu, emma yenila uruq-tughqanliri bilen ixtiyari körüshüsh we jem'iyetke arilishish hoquqi cheklen'genliki ashkarilan'ghan idi.

Yehya qurban we ayali turuwatqan "Qarliq" qorosuningmu ene shundaq mexsus lagérdin chiqqanlar üchün qurulghan a'ililikler lagéri bolushi éhtimalliqi otturigha chiqmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet