Германийәдә «йәркән қирғинчилиқи» ниң 5 йиллиқини хатириләш намайиши өткүзүлди

Ихтиярий мухбиримиз әкрәм
2019-07-29
Елхәт
Пикир
Share
Принт

Германийәниң мюнхен вә шитутгарт шәһәрлиридә «йәркән қирғинчилиқи» ниң 5 йиллиқини хатириләш намайиши өткүзүлди.

28-Июл күни 2014-йили 7-айниң 28-күни йәркән наһийәсиниң елишқу йезисида йүз бәргән қанлиқ вәқәниң 5 йиллиқини хатириләш йүзисидин германийәниң һәрқайси шәһәрлиридин кәлгән уйғурлар мюнхен вә шитутгарт шәһәрлиригә җәм болуп, хитайға қарши наразилиқ намайиш елип барди.

Германийәниң карлсруһе шәһиридә яшайдиған дуня уйғур қурултийи тәтқиқат мәркизиниң мудири әнвәр әһмәт әпәндиниң билдүрүшичә, шитутгарт шәһиридә өткүзүлгән намайишқа карлсруһе, манһайим, шитутгарт вә әтраптики шәһәрләрдин кәлгән көплигән уйғурлар қатнашқан.

Шитутгарттики намайишчилар шәһәрниң ават мәркизидә ай-юлтузлуқ көк байрақлирини ләпилдитиш билән биргә җаза лагерлиридики тутқунларниң рәсимлириниму көргәзмә қилған болуп, саяһәтчиләрниң күчлүк диққитини җәлип қилған.

Германийәдә йәккә намайишни давамлаштуруп келиватқан абдулланиң билдүрүшичә, шотутгарт шәһиридики бу қетимқи намайиш йәркән қирғинчилиқиниң 5 йиллиқини хатириләш билән биргә «ақ-көк 19 һәрикити» гә аваз қошуш һәмдә хитайда өткүзүлмәкчи болған қишлиқ олимпик мусабиқисигә қарши турушниму мәқсәт қилған икән.

28-Июл күни йәнә мюнхен шәһиридиму «йәркән қирғинчилиқи» ниң 5 йиллиқини хатириләш мунасивити билән рәсим көргәзмисини асас қилған намайиш өткүзүлди. Намайишта җаза лагерлириға қамалған уйғурларниң рәсимлири, уйғур өсмүрлириниң хитайлишишқа мәҗбурлиниватқан көрүнүшлири, уйғур диярида чеқилған мәсчитләрниң вә җаза лагерлириниң сүний һәмраһтин тартилған сүрәтлири көргәзмә қилинған иди. Бу қетимқи намайишни уюштурған гүлзирә ханим бу һәқтә өз қарашлирини баян қилип өтти.

Сиңлиси гүлгинә җаза лагериға қамалғандин буян лагердики уйғурларниң әркинлики үчүн паал һәрикәтләрдә болуп келиватқан гүлзирә ханим алдинқи йәкшәнбә күни бир бөлүк уйғурлар билән биргә «ақ-көк 19 һәрикити» гә аваз қошуп намайиш өткүзгән иди. Улар бундин кейин һәр йәкшәнбә күни мюнхен шәһириниң ават орунлирида намайиш қилишни давамлаштуридикән.

Пикирләр (0)
Share
Толуқ бәт