Gérmaniyede "Yerken qirghinchiliqi" ning 5 yilliqini xatirilesh namayishi ötküzüldi

Ixtiyariy muxbirimiz ekrem
2019-07-29
Share

Gérmaniyening myunxén we shitutgart sheherliride "Yerken qirghinchiliqi" ning 5 yilliqini xatirilesh namayishi ötküzüldi.

28-Iyul küni 2014-yili 7-ayning 28-küni yerken nahiyesining élishqu yézisida yüz bergen qanliq weqening 5 yilliqini xatirilesh yüzisidin gérmaniyening herqaysi sheherliridin kelgen Uyghurlar myunxén we shitutgart sheherlirige jem bolup, xitaygha qarshi naraziliq namayish élip bardi.

Gérmaniyening karlsruhé shehiride yashaydighan dunya Uyghur qurultiyi tetqiqat merkizining mudiri enwer ehmet ependining bildürüshiche, shitutgart shehiride ötküzülgen namayishqa karlsruhé, manhayim, shitutgart we etraptiki sheherlerdin kelgen köpligen Uyghurlar qatnashqan.

Shitutgarttiki namayishchilar sheherning awat merkizide ay-yultuzluq kök bayraqlirini lepilditish bilen birge jaza lagérliridiki tutqunlarning resimlirinimu körgezme qilghan bolup, sayahetchilerning küchlük diqqitini jelip qilghan.

Gérmaniyede yekke namayishni dawamlashturup kéliwatqan abdullaning bildürüshiche, shotutgart shehiridiki bu qétimqi namayish yerken qirghinchiliqining 5 yilliqini xatirilesh bilen birge "Aq-kök 19 herikiti" ge awaz qoshush hemde xitayda ötküzülmekchi bolghan qishliq olimpik musabiqisige qarshi turushnimu meqset qilghan iken.

28-Iyul küni yene myunxén shehiridimu "Yerken qirghinchiliqi" ning 5 yilliqini xatirilesh munasiwiti bilen resim körgezmisini asas qilghan namayish ötküzüldi. Namayishta jaza lagérlirigha qamalghan Uyghurlarning resimliri, Uyghur ösmürlirining xitaylishishqa mejburliniwatqan körünüshliri, Uyghur diyarida chéqilghan meschitlerning we jaza lagérlirining sün'iy hemrahtin tartilghan süretliri körgezme qilin'ghan idi. Bu qétimqi namayishni uyushturghan gülzire xanim bu heqte öz qarashlirini bayan qilip ötti.

Singlisi gülgine jaza lagérigha qamalghandin buyan lagérdiki Uyghurlarning erkinliki üchün pa'al heriketlerde bolup kéliwatqan gülzire xanim aldinqi yekshenbe küni bir bölük Uyghurlar bilen birge "Aq-kök 19 herikiti" ge awaz qoshup namayish ötküzgen idi. Ular bundin kéyin her yekshenbe küni myunxén shehirining awat orunlirida namayish qilishni dawamlashturidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet