Istanbuldiki "Sherqiy türkistan yéngi ewlad herikiti" jem'iyiti özining 2019-yilliq xizmetlirini xulasilidi

Ixtiyariy muxbirimiz arslan
2020-02-04
Élxet
Pikir
Share
Print
Istanbulda ötküzülgen "Sherqiy türkistan yéngi nesil herikiti" ning 2019-yilliq xizmet doklati yighidin bir körünüsh. 2020-Yili 1-féwral. Istanbul türkiye.
Istanbulda ötküzülgen "Sherqiy türkistan yéngi nesil herikiti" ning 2019-yilliq xizmet doklati yighidin bir körünüsh. 2020-Yili 1-féwral. Istanbul türkiye.
RFA/Arslan

2-Ayning 1-küni, merkizi istanbulgha jaylashqan, özini "Sherqiy türkistan yéngi ewlad herikiti" dep atighan yéngi ewlad Uyghur yashlirining teshkilati 2019-yilliq xizmet-pa'aliyetlirini xulasilesh yighini ötküzdi.

Yighin'gha mezkur jem'iyetning idare hey'iti we ezaliridin bolup, 100 din artuq yash qatnashti. Yighinda aldi bilen "Sherqiy türkistan yéngi ewlad herikiti" ning re'isi doktor abdusalam teklimakan échilish sözi sözlep, bu qétimqi yighinning asasiy meqsiti we ehmiyiti toghrisida toxtaldi. 

Mezkur jem'iyet türkiyediki Uyghur yashlirini, yeni yéngi ewladlarni uyushturushni meqset qilghan ammiwi jem'iyettur. 

Doktor abdusalam teklimakan "Sherqiy türkistan yéngi ewlad herikiti" jem'iyitini qisqiche tonushturup ötti. Uning bildürüshiche, bu teshkilat bir qanche bölüm boyiche xizmet élip bériwatqan bolup, buning ichide teshwiqat we ijtima'iy alaqe bölümliri Uyghurlarni mesilisini türkiye we islam dunyasigha tonushturush, teshkilat we partiyeler bilen alaqe ornitish, chet'ellikler üchün yighin orunlashturup, Uyghurlar mesilisi toghrisida léksiye bérish xizmetlirini élip barmaqtiken. 

Yighin'gha qatnashqan sherqiy türkistan teshkilatlar birliki re'isi hidayetulla oghuzxan söz qilip, yashlardin kütidighan ümid-arzulirini bayan qilish bilen birge Uyghur yashlirining "Sherqiy türkistan dewasining kelgüsi iz basarliri we ümid nurliri ikenliki" ni tekitlidi.

Hidayetulla oghuzxan, Uyghur yashlirining bek köp mes'uliyiti barliqini, buning biri öginish, yeni özini terbiyelesh bilen birge sherqiy türkistan mesilisini xelqlerge anglitish we xelq'ara sehnide Uyghurlargha wekillik qilip dawa üchün xizmet qilishtin ibaret ikenlikini bildürdi. 

Yighinda yene Uyghur tetqiqatchi abduraxman jamal ependi söz qilip, yashlarning mes'uliyiti toghrisida toxtaldi. 

Uyghurlardin hal sorash we Uyghurlarning ehwalidin xewer tépish meqsitide kanadadin istanbulgha kelgen, kanada fédératsiye hökümiti teripidin tizimgha élin'ghan "Xelq'ara insaniy yardem" (Human Concern International) namidiki teshkilatining mes'ulliridin abduraxman hüseyin we hesen elbadi qatarliq kishilermu bu yighin'gha qatniship, Uyghurlar toghrisida söz qildi we Uyghurlarni maddiy hem meniwi jehetlerdin qollaydighanliqini bildürdi. 

Hesen elbadi ependi Uyghur mesilisining hazir dunyaning diqqitini jelp qiliwatqanliqi we buning kanadadimu kishilerning diqqitini tartiwatqan bir mesile ikenlikini, nurghunlighan meshhur shexslerning bu toghrisida sözlewatqanliqini, shu sewebtin özlirining Uyghurlargha yardem bérish we qollash üchün istanbulgha kelgenlikini bildürdi.

Yighinda "Sherqiy türkistan yéngi ewlad herikiti" jem'iyitining idare hey'et ezaliridin abdulla arman söz qilip, teshkilatning qurulghandin buyanqi ikki yil jeryanida qolgha kelgen netijiler we uchrighan tosalghularni bayan qilip ötti. 

Abdullaning bildürüshiche, "Sherqiy türkistan yéngi ewlad herikiti" jem'iyiti qurulghan ikki yildin buyan öz ezalirini guruppilargha bölüp, her xil xizmet élip barghan, teshkilatni tertipke sélish, kesipleshtürüsh, idare hey'et ezalirining xususiy we ijtima'iy jehettiki sapasini we qabiliyitini östürüsh qatarliq türlük pa'aliyetlerni élip barghan. Mezkur teshkilat yene Uyghurlar mesilisi toghrisida yighin échish, namayish uyushturush, teshwiqat wariqi tarqitish, türkiyede échilghan bir qisim yighinlargha qatniship Uyghurlar mesilisi toghrisida doklat bérish qatarliq pa'aliyetler élip barghan.

Bu jem'iyet 2019-yili Uyghur mesilisini türk xelqige anglitish meqsitide 70 tin artuq yighin, murasim we namayish qatarliq her xil pa'aliyetlerni uyushturghan.

Igilinishiche, "Sherqiy türkistan yéngi ewlad herikiti", istanbulning her qaysi uniwérsitétlirida oquwatqan yaki oqush püttürgen bir guruppa yashlar teripidin 2017-yili istanbulda qurulghan we istanbul waliy mehkimisi teripidin resmiy tizimgha élinip testiqlan'ghan.

Toluq bet