“Yettisu Uyghur muzika mektipi” 4-oqush yilini muweppeqiyetlik bashlidi

Muxbirimiz gülchéhre
2019.09.05
Yettisu-Uyghur-Muzika-Mektiwi.jpg “Yettisu Uyghur muzika mektipi” ning bir qisim oqughuchi we oqutquchiliri. 2019-Yili awghust. Qazaqistan.
Social Media

Bundin 3 yil muqeddem “Yettisu Uyghur muzika mektipi” namidiki muzikiliq terbiye kursi, en'gliye agaxan fondining yardimi bilen qazaqistanning almuta wilayiti bayséyt yézisida qurulghanidi. Yettisu Uyghur muzika mektipide terbiyilen'gen ikki Uyghur oqughuchi bu yil qazaqistan chaykowiski muzika institutigha qobul qilin'ghaniken. Shundaqla yéngi oqush mewsümide yettisu Uyghur muzika mektipige yéngidin yene 20 oqughuchi qobul qilin'ghan bolup, ular Uyghur muzika we usul kurslirida heqsiz terbiyelinidu. Yettisu Uyghur muzika mektipining utuqlirini muxbirimiz gülchéhre teyyarlighan programmidin anglaymiz.

Bash shtabi en'gliyediki agaxan muzika fondining yardimi bilen 2016-yili séntebirde deslep qazaqistan almuta wilayitining bayséyt yézisidiki qurulghan “Yettisu Uyghur muzika mektipi”, 6yashtin 11 yashqiche bolghan 30 neper bashlan'ghuch mekteptiki Uyghur balilarni qobul qilip terbiyeligen bolsa, ikkinchi yilidin bashlap, gheyret yézisidiki ottura mektepke yötkelgen. Bu mektepning bu yilqi muzikiliq oqutush programmisining yéngi oqutush mewsumida milliy saz we usul kurslirigha yene 20 oqughuchi qobul qilin'ghan. 

Mezkur muzika mektipining qurulushigha biwasite küch chiqarghan londondiki musteqil tetqiqatchi eziz eysa ependi we uning xanimi Uyghur muzika tetqiqatchisi doktor rachel xarris xanimlar, gheyret ottura mektipide tesis qilin'ghan “Yettisu muzika mektipi” namidiki sen'et terbiye programmisining netijilirini közdin kechürüsh üchün yéqinqi künlerde gheyret yézisida mexsus ziyarette bolghan. 27-Awghust “Yettisu Uyghur muzika mektipi” ning oqughuchiliri ulargha özliri ögen'gen muqam we Uyghur milliy muzikiliri hem usullirini körsitip bergen.

Bu heqte ziyaritimizni qobul qilghan yettisu Uyghur muzika mektipining yardemchi oqutquchiliridin klara xanim, oqughuchilarning tetil waqti bolushigha qarimay, tekshürüsh guruppisini intayin qizghin qarshi alghanliqini we qisqa waqit ichide teyyarliq qilip konsért körsetkenlikini sözlep berdi:

Gheyret yéziliq ottura mektepke tesis qilin'ghan “Yettisu Uyghur muzika mektipi” ning mudiri dilmurat ependi, mektepning bezi oqughuchiliri 3 yilliq muzika kursida terbiyelinip oqushlirini püttürgen bolsa, yéngidin yene oqughuchilarning tizimlatqanliqini, emma chalghu eswablarning yétishmeslikidek qiyinchiliqlar seweblik, oqughuchilar sanini melum chekte kontrol qilip kéliwatqanliqini bildürdi. 

Qazaqistanda ziyarette boluwatqan eziz eysa ependi téléfon ziyaritimizni qobul qilip, hazir oqughuchilargha péshqedem tejribilik kespiy sen'et oqutquchiliridin bashqa almuta nur muzika mektipining kespiy oqutquchilirimu kélip, sattar, dutar, tembür, dap qatarliq sazlarni chélishni, Uyghur muqamlirini yenimu kespiy sewiyede oqushni ögitiwatqanliqini bildürdi. 

Eziz ependi yene, balilarning muqam we Uyghur xelq muzikilirini mukemmel chalidighan sewiyede ögen'genliki, Uyghur chalghulirini öginiwatqan qiz oqughuchilarning köpeygenliki, qazaq oqughuchilarningmu kursqa qatnashqanliqi, bu kurslarda muzika terbiyisi alghan oqughuchilardin ikki oqughuchining almutadiki chaykowiski muzika institutigha qobul qilin'ghanliqi qatarliqlarni “Yettisu Uyghur muzika mektipi” ning xushallinarliq utuqliri dep tonushturdi.

“Yettisu Uyghur muzika mektipi” qazaqistanning Uyghurlar eng zich olturaqlashqan almuta wilayitining bayséyt, gheyret, qaratoruq, malway dégendek chet yéziliridiki Uyghur yash ösmürlirige Uyghur chalghu eswabliri, Uyghur muqam we naxshiliri hem usullirini ögitidighan tunji heqsiz muzika mektipi bolup, bu mektepning qurulushining ehmiyiti heqqide eziz ependi köz qarashlirini bayan qildi. U: “Yettisu Uyghur muzika mektipi yalghuz bu yézilardiki Uyghur muzika eswablirini tutupmu hetta körüptu baqmighan balilar üchün, Uyghur muzika eswablirini öginidighan, özining muzika medeniyitini chüshinidighan, muzika jehettin heqsiz terbiyelinidighan shundaqla kelgüsige köp pursetlerni yaritidighan bir mektep. Bu mektepning Uyghur kimliki, Uyghur sen'iti we muzika medeniyitining warislirini yétishtürüshte rol oynaydighanliqigha ishinimiz” deydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.