"хәлқара вәзийәт вә шәрқий түркистан" намлиқ журналниң иккинчи сани йоруқ көрди

Ихтиярий мухбиримиз әркин тарим
2021-08-24
Share
Мәркизи әнқәрәдики уйғур тәтқиқат институти тәрипидин тәсис қилинған "хәлқара вәзийәт вә шәрқий түркистан" намлиқ журналниң иккинчи сани оқурмәнлири билән йүз көрүшти.
RFA/Erkin Tarim

Мәркизи түркийәниң пайтәхти әнқәрәдики уйғур тәтқиқат иниститути тәрипидин тәсис қилинған "хәлқара вәзийәт вә шәрқий түркистан" намлиқ журналниң иккинчи сани оқурмәнләр билән йүз көрүшти.

Мәзкур журнал сиясий, иқтисадий, иҗтимаий вә хәлқара мунасивәтләрни асаслиқ тема қилған илмий мәзмундики пәсиллик журналдур. Иккинчи санида мәзкур журналниң қануний вәкили, уйғур тәтқиқат иниститутиниң мудири вә истиратегийә мутәхәссиси доктор әркин әкрәмниң кириш сөзи билән у қәләм тәврәткән "шәрқий түркистандики җаза лагерлири вә хәлқараниң инкаси" намлиқ мақалиси, журналниң баш тәһрири мәвлан тәңриқут әпәндиниң "үзүлмәс ассимилатсийә: хитай мәдәнийити өз һакимийәт даирисидики башқа милләтләргә мәвҗут болуп туруш имканийити берәмду?" намлиқ мақалиси, америкадики уйғур зиялийси, тарих пәнлири доктори нәбиҗан турсунниң "хитайниң шинҗаңни бөлүп идарә қилиш тәдбирлири мусаписи: сәвәп-амил-мәқсәт", түркийәдики уйғур зиялийси доктор дилшат баришчи әпәндиниң "уйғурларниң оттуричә өмри", истанбул университети тилшунаслиқ кәспиниң аспиранти таҗигүл сәмәтниң "хитайниң шәрқий түркистан сияситидики тил оюнлириға қисқичә нәзәр" намлиқ мақалисини өз ичигә алған бир йүрүш мақалиләргә орун берилгән. Журналниң ахирида йеңи нәшир қилинған 4 муһим китаб тонуштурулған.

"хәлқара вәзийәт вә шәрқий түркистан" намлиқ журналниң 2-сани тоғрисида зияритимизни қобул қилған мәвлан тәңриқут әпәнди шәрқий түркистан дәваси хәлқараниң муһим мәсилисигә айланған бүгүнки күндә, журналниң бу санида нуқтилиқ һалда хитайниң уйғур сиясити, хәлқара мунасивәтләр тоғрисидики мақалиларға йәр берилгәнликини баян қилди.

Мәзкур журналниң баш тәһрири, истанбулдики ибни халдун университетиниң докторанти мәвлан тәңриқут әпәнди мәзкур журналниң хәлқара өлчәмдики бир журнал икәнликини, мақалиләрниң илмий өлчәмдә йезилиши керәкликини, әвәтилгән мақалиләр мәзкур журналниң әсәр баһалаш һәйити тәрипидин көрүлүп тәстиқланғандин кейин, андин рәсмий елан қилинидиғанлиқини баян қилди.

"хәлқара вәзийәт вә шәрқий түркистан" намлиқ мәзкур журналниң қануний вәкили, доктор әркин әкрәм әпәнди бу журналда мақалә елан қилмақчи болған мутәхәссисләрниң илмий салаһийәткә игә яки тәтқиқат саһәсидә мол тәҗрибигә игә кишиләр болуши керәкликини әскәртип өтти.

Мәвлан тәңриқут әпәнди, бу журналниң уйғур тилиниң хәлқара мунасивәтләргә охшаш илмий тәтқиқат саһәсидә қоллинилишиға, шундақла йеңидин пәйда болған аталғуларни уйғурчә илмий саһәдә ишлитишкә земин һазирлап беридиғанлиқини тәкитләп өтти.

"хәлқара вәзийәт вә шәрқий түркистан" намлиқ бу журналниң тунҗи сани 2021-йили 4-айда йоруқ көркән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт