Зумрәтай әркин рузвелт фонди җәмийитиниң “етиқад әркинлики мукапати” ға еришкән

Вашингтондин мухбиримиз нуриман тәйярлиди
2024.02.01
zumretay-erkin-mukapat-1 Д у қ хәлқара алақә бөлүминиң директори зумрәтай әркин ханим розвелит фонди җәмийити тәрипидин тарқитилидиған “төт әркинлик мукапати” (Four Freedoms Awards) ниң “етиқад әркинлики мукапати” ға еришкән. 2024-Йили 31-январ.
X/Roosevelt Foundation

Дуня уйғур қурултийи хәлқара алақә бөлүминиң директори зумрәтай әркин йиллардин буян хәлқара сәһниләрдә уйғурлар дуч келиватқан ирқий қирғинчилиқини аңлитишта авангартлиқ ролини ойнап келиватқан уйғур паалийәтчилирини бири. У, б д т ни өз ичигә алған хәлқара сәһниләрдә уйғур мәсилисини дадиллиқ билән оттуриға қоюши, аңлитиши вә бир қатар актип тәшкилатчилиқ паалийәтлири билән муһаҗирәттики уйғурларға тонулған.

Зумрәтай әркин 31-январ күни розвелит фонди җәмийити тәрипидин тарқитилидиған “төт әркинлик мукапати” (Four Freedoms Awards)ға еришкән. Мәзкур фонди җәмийәт зумрәтайниң йиллардин буян уйғурларниң һәқ-һоқуқи үчүн елип бериватқан изчил күрәшлирини тәқдирләш йүзисидин униңға “төт әркинлик мукапати” ичидики “етиқад әркинлики мукапати” ни бәргән.

Д у қ хәлқара алақә бөлүминиң директори зумрәтай әркин ханим розвелит фонди җәмийити тәрипидин тарқитилидиған “төт әркинлик мукапати” (Four Freedoms Awards) ниң “етиқад әркинлики мукапати” ға еришкән. 2024-Йили 31-январ.

Мәлум болушичә, рузвелт фонди җәмийитиниң “төт әркинлик мукапати” һәр йилда бир қетим тарқитилидикән. Бу мукапат америка президенти франклин делано розвелтниң 1941-йили 1-айниң 6-күни америка парламентида қилған “төт әркинлик” намлиқ мәшһур нутуқида тәкитлигән “төт әркинлик” йәни пикир әркинлики, етиқад әркинлики, тәләп әркинлики вә җасарәт әркинликини тәкитләш үчүн тәсис қилинған. Розвелит фонди җәмийити һәр икки йилда бир қетим мушу төт түрлүк әркинлик җәһәттә көрүнәрлик нәтиҗә көрсәткән төт нәпәр шәхс вә бир тәшкилатқа бу мукапатни беридикән.

Мәзкур мукапат тунҗи қетим 1982-йили тарқитилған болуп, тунҗи қетимлиқ мукапат голландийә мәликиси җулиянаға берилгән. Униңдин кейинки йилларда бу мукапатқа еришкәнләрниң тизимликидә нилсон мандела, һилари килинтон, анҗила меркил қатарлиқ мәшһур кишиләрму йәр алған.

Мәзкур мукапатни тарқитиш мурасими америка пуқралири үчүн американиң ню-йорк шәһиридә, америка пуқраси болмиғанларға голландийәниң миделбург шәһиридә һәйвәтлик мурасим билән тарқитилидикән.

Зумрәтай әркинниң билдүрүшичә, у бу йил апрелда голландийәниң миделбург шәһиридә өткүзүлидиған мукапат тарқитиш мурасимиға қатнишидикән. Мукапат тарқитиш мурасимға голландийә хан җәмәти вә голландийә һөкүмитиниң юқири дәриҗилик әмәлдарлири қатнишидикән.

Зумрәтай әркин зияритимиз давамида өзиниң мәзкур мукапатқа намзатлиққа көрситилиш җәряни вә уйғур дәвасиға қәдәм қоюш мусаписи тоғрилиқ тәпсилий мәлумат бәрди.

Сөһбитимизниң тәпсилатини юқириқи авази улинишидин аңлиғайсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.