Dozax mesh'ili

Ixtiyariy muxbirimiz abduweli ayup
2017-08-29
Élxet
Pikir
Hembehr
Print
  • Print
  • Hembehr
  • Pikir
  • Élxet
Memetjan tursunning 2008-yili xitayda ötküzülmekchi bolghan olimpik tenheriket yighining mesh'ilini istanbuldiki galata köwrükide tartiwélishqa urun'ghan körünüshi.
Memetjan tursunning 2008-yili xitayda ötküzülmekchi bolghan olimpik tenheriket yighining mesh'ilini istanbuldiki galata köwrükide tartiwélishqa urun'ghan körünüshi.
Photo: RFA

"heqiqiy siyasiy mehbus" dégen eslimem élan qilin'ghandin kéyin abduraxmanning xewiri tépildi. Merhumning türkiyede yashawatqan ikki dosti manga uchur yetküzdi. Ularning déyishiche, abduraxman 1981-yili ghuljida tughulghan bolup, chélek mehelliside olturattiken. 2007-Yili u seyidexmet we qurban dégen ikki dosti bilen teyyarliqni bashlap xitayda ötküzülmekchi bolghan olimpik musabiqisini tosmaqchi we shu arqiliq dunyaning nezirini uyghurgha burimaqchi bolghan.

Epsus, shu yili ular ürümchide jiddiy teyyarliq qiliwatqanda rabiye qadir soda sariyida tijaret qilidighan almas dégen dostining öyide tutulup qalghan. Almas soraqtin chiqip uzun ötmey sewebsiz ölüp ketken. Seyid'exmet we qurban muddetsiz qamaq jazasigha höküm qilin'ghan. Abduraxman ölüm jazasigha höküm qilinip 2013-yili ijra qilin'ghan.

Dostlirining eslishiche, abduraxman kichikidin qorqmas, heqqaniyetchi bala bolup, köz aldida yamanliqlarning bolushigha her qachan süküt qilalmaydiken. Abduraxmanning hazir türkiyede turuwatqan dosti sawutning éytishiche, 2004-yili aq meschitning aldida abduraxman bir oghriliqni tosimen dep meydan'gha chiqip tayaq yep ketken. U ürümchide sawut bilen bille turghan chaghlarda özi japa tartsimu dostlirini tenglikte qoymighan. Tapqan pulini otturigha tashlap, qolida barini qiynilip qalghan dostliridin ayimighan iken.

2007-Yilning béshida abduraxman olimpikning mesh'ilini öchürüshni pilan qilghan. U bu pilan'gha xoten, ürümchi we ghuljadiki dostlirini dewet qilghan. Shu yili baharda abduraxman dostlirini élip hazir türkiyede yashawatqan sawutning öyige kelgende olimpik mesh'ilini öchürüshning muhimliqi heqqide dostlirigha chüshenche bergen iken. Sawutning éytishiche abduraxman shu küni:

‏-‏ Bu hökümet dunyaning közini boyap olimpik ötküzmekchi. Olimpik mesh'ilini giritsiyedin yandurup dunyani aylanmaqchi. Yoruqluq, erkinlik we yashashning simwoli bolghan mesh'elni kötürüsh xitaydek puqralirini ölüm, zulum we qarangghu zindan bilen qorqutup bashquruwatqan hökümetning xaraktérige zit. Hökümet olimpik ötküzimen dep dunyani aldap zalim xaraktérini yoshurmaqchi. Biz bu mesh'elni öchürelisek, bu hökümetning shérin xiyalini berbat qilghan bolimiz. Bu yolda shéhit bolushimiz mumkin, emma dunyagha bu yerde chidighusiz bir zulumning barliqini shu ölüm bilen ispatlaymiz.

‏-‏ Qarap turunglar, olimpikning mesh'ili zéminimizdin ötkende pütün dunyaning közi bizge chüshidu, kompartiye xelqimizni usulgha salidu, dunyagha uyghurlar shad-xuram, kompartiyedin xursen, dep teshwiq qilidu. Biz mesh'elni öchürelisek, dunyagha bizning millet hökümetning usulchisi emes, zulumgha qarshi jengchi bolup tonulidu. Uyghurning ghezep-nepriti dunyagha ashkara bolidu.

‏-‏ Hökümet eger mesh'elni zéminimizdin xatirjem ötküzüp ketsichu? mushu zémin'gha kömülgen, biz üchün jan bergen ejdadlirimizning pak rohi qorunidu. Biz zalimning qoyghan oyunigha süküt qilghan, chawak chalghan, shérik bolghan qarayüz ewladlargha aylinimiz.

‏-‏ Aghiniler, hökümetning zéminimizdin ötküzmekchi bolghini olimpik mesh'ili emes, dozax mesh'ili. Eger biz bu otni öchürelmisek, bu hökümet ashu mesh'el bilen jénimizni, imanimizni, ewladimizni köydüridu. Yurtimiz bu dunyadiki dozaxqa aylinidu, -dégen iken. Bularni dewatqan sawutning awazi deslep boghulup chiqip, axiri chiqmay qaldi.

Ölüm jazasi ijra qilinishtin bir kün burun, sawut abduraxmanning ayali bilen chiqip képenlik xese aptu. Abduraxmanning oghli anisining péshigha ésilip bille chiqiptu. Shéhit dadisi yörgilidighan képenlikke domilap oynawatqan bu sebiy bala dadisi yoqitalmighan naheqchilik, barawersizlik we xorluqlarning özige miras qalidighanliqini nedin bilsun!?

Pikirler (0)
  • Print
  • Hembehr
  • Élxet
Toluq bet