Әркинликкә созулған узақ йол: қачқундики һаят (5)

Алмасбәг һиндистанлиқ содигәрниң йол башлиши билән непалға өткәндин кейин йәнә нурғун тәкшүрүш өткәллиридин бир - бирләп өтүп ахири катмандуға йетип бариду. Шундақ қилип униң муһаҗирәттики һаяти башлиниду.
Ихтиярий мухбиримиз қутлан
2013-01-26
Елхәт
Пикир
Share
Принт
Алмасбәгниң непалдики б д т ишханисидин алған сияси паналиқ гуваһнамиси
Алмасбәгниң непалдики б д т ишханисидин алған сияси паналиқ гуваһнамиси
RFA/Qutlan


У һиндистанлиқ содигәрниң ремонтчилиқ билән шуғуллинидиған туғқининиң өйидә туруп қалиду. Һечқандақ тонуши болмиған, қолида йетәрлик пулиму қалмиған, нәгә берип, нәдә туруши намәлум болған әһвалда мәвһум келәчәкни күтүп бир топ натонуш һиндистанлиқ ишчилар арисида мусапирчилиқ һаятини башлайду.

Алмасбәг вәтәндики чеғида б д т ниң нурғун дөләтләрдә сиясий мусапирларға ярдәм қилидиған ишханилириниң барлиқини аңлиған болсиму, лекин непалдин ибарәт бу ят әлдә тил қийинчилиқи түпәйли қандақ қилип бу ишханини издәп тепишни биләлмәйду. Һиндистанлиқ содигәрдин бу тоғрилиқ ярдәм болсиму, лекин уму билмәйдиғанлиқини ейтиду. Амалсиз қалған алмасбәг қандақ қилишини билмәй тәмтирәп қалиду. Һиндистанлиқ содигәр ахири уни башлап непалдин һиндистанға өтүп, биһар штати тәвәсидики өз йезисиға елип бариду.

Қачқундики һаят уни йәнә бир ят әлгә елип бариду. У биһар штатиниң мусулманлар билән һинди динидикиләр арилишип яшайдиған бир йезисида 28 күнни өткүзиду. Һиндистанлиқ содигәрниң аилисидә туруп, һиндистан мусулманлириниң йеза һаятини бешидин кәчүриду. Охшаш болмиған динларға етиқад қилидиған һиндистан хәлқиниң һаятта инақ - иттипақ өтидиғанлиқини һес қилиду.

Аридин бир айға йеқин вақит өткәндин кейин, һиндистанлиқ содигәр уни башлап йәнә непалға қайтип келиду. Алмасбәг һиндистанлиқ содигәрниң катмандудики туғқиниң ремонтханисида йәнә мусапирлиқ һаятини давамлаштуриду. Бир күни һиндистанлиқ содигәр уни катмандуниң тамил районидики бир мәсчиткә башлап берип имамға тонуштуруп қойиду. Имам униңға бирқанчә уйғур мусапирларниң бу йәрдә яшайдиғанлиқини ейтиду. Бу гәптин илһамланған алмасбәг бирқанчә күндин кейин йәнә һелиқи мәсчиткә бариду һәмдә мәсчит ичидә икки уйғур яшниң параңлишип олтурғанлиқини көриду. Әпсус уйғур тилида параңлишип олтурған бу икки натонуш яш алмасбәгдин хәвпсирәп өзлириниң уйғур икәнликидин тенивалиду. Амалсиз қалған алмасбәг роһий чүшкүн һалдә йәнә ремонтханиға қайтип келиду.

Аридин бир қанчә күн өткәндә а XX исимлик бир уйғур киши һелиқи икки нәпәр уйғур яшни башлап алмасбәгни издәп келиду. Алмасбәг уларниң ярдими билән б д т мусапирлар мәһкимисиниң катмандудики ишханисини издәп тепип, өзиниң сиясий панаһлиқ илтиҗасини тапшуриду. Шундин кейин сиясий мусапирлиқ салаһийитигә еришкән алмасбәг катмандудики йеңи һаятини башлайду. Лекин иқтисадий қийинчилиқ һәмдә кәлгүси үчүн чиқиш йоли издәш истики уни һәрвақт издинишкә мәҗбур қилиду. Ахири нурғун амаллар билән германийиниң мюнхен шәһиридики уйғур тәшкилатлири билән алақилишиду һәмдә ярдәм сорайду. Непалға қечип чиққан уйғурларниң әһвалидин хәвәр тапқан мюнхендики дуня уйғур яшлири қурултийи уларға игә чиқидиғанлиқи һәққидә вәдә бериду.

(Давами бар)

Толуқ бәт