Osman batur heqqide

“Men, xitay teshkilati méni tutuwalmisun we yaki charwichilarni xarlimisun depla urushmaywatimen, 11 yildin béri xitay pütkül sherqiy türkistanni ishghal qildi we alte chong siyasetni bu yerde yürgüzüwatidu. Bizning bashqa milletler oxshash ikenlikimizni éytidu, emma 10 nechche yildin béri biz buninggha qarshi chiqmiduq. Mana emdi sözining del eksiche ish qiliwatqan xitay teshkilati bilen qarshilishiwatimiz, xitay teshkilati ewetken atalmish yaxshi niyetlik kishiler bizni tutqun qildi. Bizdin bir armiye qurushning ornigha, qollirimizdiki qorallarni tartiwaldi. Dinni qoghdashning ornigha meschitlerni yiqitti, charwa mallarni tartiwaldi. Bajni töwenlitishning ornigha köpeytti, tijaret qilish cheklinip, xelqimiz kembeghel halgha chüshüp qaldi. Biz charwa mal emes, biz insan. Biz pütkül milletlerge oxshash hoquqqa ige bolushni telep qilimiz. Xitay teshkilati xelqqe zulum qiliwatqan tursa, biz néme üchün küresh qilmaydikenmiz?”

Kichikidin tartip ikki düshmen-yeni rus bilen xitaygha qarshi nepret we öchmenlik idiyisi bilen chong bolghan, yéshining kichiklikige qarimay özining chebdes, hoshyarliqi bilen ustazi böke baturning eng yéqin adimi we sirdishi bolup qalghan bu kishi nechche on yil ezgendin sirt, xelqni aldap, ow miltiqlirini yighiwalmaqchi bolghan hiyliger xitayning rezil suyiqestni körüp yétip: “Qoral méning ippet-nomusum, men ippitimni düshmen'ge tapshurup bermeymen. Küchi yetse, tartip éliwalsun” dep, a'ilisi, jilgha-jilgha mal-charwisi, issiq chédiri, yurt-mehellini tashlap, özi yalghuz bir yilning yérimidin tolisi qehritan qish bolidighan altay téghigha chiqip ketken we anche köp ötmey etrapigha yighilghan palwan, mergenlerning gheyriti bilen awwal rus, andin xitaygha qaqshatquch zerbe bérip, altay we chöchekni düshmendin tazilighan. Bu urushlarda körsetken aqilane taktikiliri, chidamchan rohi, diniy we xelqige bolghan sadiqliqi bilen tonulup, xelqning “Batur” gha, kéyinche: “Altay qazaqlirining xani” dégen namgha layiq körülgen bu kishi hayatining axirighiche öz xelqi üchün düshmen'ge qarshi tinimsiz küresh qilghan, bolupmu kommunist xitaygha qarshi küreshte on minglighan eziz xelqi, a'ilisi, mal-bayliqi we axirida öz jénidin juda boldi.

Meyli gomindang we meyli kommunist xitaylar bolsun osman baturni bu dunyadiki barliqidin, hetta jénidin juda qilish bilenla boldi qilmay, uning obrazini xunükleshtürüsh üchün öz xelqi we ewladlirigha “Bandit”, “Qaraqchi”, “Inqilab düshmini” dégendek betnamlar bilen set körsitishke tirishti. Emma sherqiy türkistan xelqi uni herda'im özining baturi, altayning bürküti, hörlük abidisi dep qarap keldi. Sherqiy türkistan xelqi, bolupmu chet'ellerdiki muhajir qérindashlirimiz uning nami we ish-izlirini hergiz untup qalmidi, her yili uni eslep murasim we pa'aliyetler orunlashturup keldi, kitab-maqaliler yézip, neshr qildurdi, chet'el kishilirige uning namini tonutti. Démek, xelq öz baghridin chiqqan bu batur, ezimetni héchqachan untup qalmidi, kelgüsidimu hem untup qalmighusi!