Қамалған ибадәт вә қурбанлиқ

Ихтиярий мухбиримиз абдувәли аюп
2017-09-26
Елхәт
Пикир
Share
Принт
Шаярдики хитай түрмисиниң дәрвазиси.
Шаярдики хитай түрмисиниң дәрвазиси.
Oqurmen teminligen

Бешимға сүйдүклүк қара халта кийдүрүлгәндин кейин, һәр қандақ қилипму чилә пуриқидин қутулалмидим. Күндә үстүмдин қанчә челәк су қуйсамму, кийимлиримни һәр күни юсамму тенимдин, кийимлиримдин сүйдүк пурайтти. 19-Авғуст тутулғандин башлап сақал-бурутумға тиғ тәгмигәч, өсүп тамақ йесәм путлашқудәк болған иди. Һәр қетим қошуққа еңишсәм, һелиқи күни ниҗасәт тамчиған бурутлирим ләвлиримгә тегип көңлүмни елиштуратти.

2013-Йили 6-өктәбир тунҗи қетим чач, сақал вә бурутлар толуқ елинди. Мәһбуслар пүтүн ююнуп болғучә һәммисигә су тошуп, учисиға қуйдум. Нөвәт маңа кәлгәндә сопун қалмапту. Өмрүмдә тунҗи қетим ун сопун билән ююндум. Чилә пурайдиған чач-сақал вә бурутлиримдин толуқ қутулуп, тутулғандин бери тунҗи қетим өзүмни пүтүнләй пакланғандәк, аллаһқа йүзлинишкә һәқиқий лайиқтәк һес қилдим. Бешимдин шарқиритип қуюлуватқан муздәк соғуқ су билән ой пикирлирим сүзүлди. Қәлбимни қиздурувәткән ғәзәп-нәпрәт вә изтирапларму совушқа башлиди.

Сәгәк олтуруп ойландим. Әмди мән қамақтин қандақ қутулушни әмәс, қамақта қандақ қилип сағлам, үмидлик, мәнилик яшашни өгинишим керәк иди. Қәлбимдики қәрздарлиқтин қутулуш үчүн сақ чиқишим керәк иди. Ана тилни қоғдашта мәндин үмидләнгән, мән билән бир сәптә турған шу кишилиримизгә қәрздар идим. Өзүмни уйғурдики һәқни қоллайдиған пидакар роһқа, адаләткә мәдәткар болидиған мәрданә хисләткә қәрздар һес қилаттим. Тенимни сақ, иштиһайимни чағ вә уйқумни саз қилған аллаһқа шүкүрләр ейтишим керәк иди. Шу күни һәр қандақ шараитта намазни толуқ оқуш вә қәтий чениқишни қарар қилдим.

Камерда әң хәтәрлик ишлар уйғурчә гәп қилиш, чениқиш вә намаз оқуш иди. Мәһбусларға йиғин ечилсила намаз оқумаслиқ, қаттиқ һәрикәт қилмаслиқ вә уйғурчә сөзләшмәслик һәққидә тәһдит болатти. Камерда чениқиш усулум тохтимай меңиш, җайимда туруп сәкрәш вә қорсақ қатлаш иди. Людаван қамақханисида уйғур мәһбуслар аз болуп, һәр камирида бирдин болғач бәкла уйғурчә сөзлигүм келип кетәтти. Тәлийимгә бәзидә тәрҗиманлиқ қилған болуп бирәр уйғур киргән һаман икки еғиз сөзлишивалаттим.

Камерда таһарәт елиш үчүн ююнуштин башқа бихәтәр усул тапалмидим. Шуңа һәр күни әң аз икки қетим ююнушқа тоғра келәтти. Һава совуғанчә бундақ һәр күни икки рәт ююнушниң сәвәбини чүшәндүрүп болалмай аварә болаттим. Ибадәт үчүн паклиқ вә тинчлиқтин башқиға еһтияҗим йоқ иди. Һәр күни икки саәт болидиған кечә нөвәтчилики маңа қамақтин чиққанда язидиған язмилар һәққидә ойлинидиған вә қаза қилған намазлиримни оқуйдиған тепилмас пурсәт иди.

Қамақтики тунҗи қурбан һейтниң ениқ күнини уқалмай йүрсәм гундипай дәп бәрди. Мән туруватқан 1-корпусқа мәсул ге чяң атайин келип әтики қурбан һейтта намаз оқумаслиқ һәққидә маңа кәскин агаһландуруш берип кетип қалди. Ге чяң пакизлиққа әһмийәт берәтти, мәһбусларниң халада ююнушлириға йол қоятти. Һейт күни сәһәрдә ююнувалдим вә камердики бадашқан қуруп олтуруп җинайәтни тонуш вақтида ишарәтму қилмай үнсиз намизимни оқувалдим.

Хиялимға қурбан һейт күнидә ғулҗа кочилири, қәшқәр рәстилири, хотән базарлири, қумул йоллири вә ақсу мәһәллилирини толдуруп өтидиған топ топ қойлар кәлди. Тәпәккур қилип бақсам, һәр йили қурбанлиқ қилинғини қой болғач, еришилгини гөшла бопту. Әгәр қойлар әмәс, қанмас нәписләр мушундақ бир күндә, бирла вақитта милләт бойичә қурбанлиққа аталған болсичу? қурбанлиқ қилинғини йилда бир қой әмәс, йил бойи өксүмәс тиришчанлиқ, пидакарлиқ вә тәмәсиз ярдәм болсичу? қурбан қилғинимиз қой турса, еришкинимиз гөш болмай һөрлүк болаттиму? ибраһим әләйһиссаламдәк атилар исмаил әләйһиссаламдәк сөйүмлүк оғулни қурбанлиққа атимиған болса алланиң мөҗизиси болған көк қочқар мәрһәмәт болуп асмандин чүшәрмиди?

Турупла өзүмни қурбанлиқ қойдәк һес қилдим. Чүнки қурбанлиқта қой мәқсәт әмәс, васитә иди. Хитайниңму мәндәк бир уйғурни қурбан қилип барлиқ уйғурға сиңдүрмәкчи болғини қорқунч, бойсунуш вә садақәт иди. Уларға лазими мениң әмәс уйғурниң алақзадилики, уларниң бойсундурмақчи болғини мениң әмәс уйғурниң ғурури, уларниң чәйлимәкчи болғини мениң әмәс уйғурниң өз миллитигә болған садақити иди.

Толуқ бәт