ນັກລົງທຶນ ຊາວຈີນ ໄປລົງທຶນ ປູກຢາງພາລາ ແລະ ໄມ້ເກສນາ ໃນແຂວງວຽງຈັນ ຢ່າງຫລວງຫລາຍ, ຊຶ່ງປະຊາຊົນ ກໍມີສ່ວນຮ່ວມ ແບບ 2 ບວກ 3, ອີງຕາມການເປີດເຜີຍ ຂອງທ່ານ ພູວຽງ ສີປະເສີດ, ຫົວໜ້າ ຜແນກອຸດສາຫະກັມ ແລະ ການຄ້າ ແຂວງວຽງຈັນ ໃນມື້ວັນພຸດນີ້.
(ສຽງ) “ໃນລັກສະນະ ປະຊາຊົນ ມີສ່ວນຮ່ວມ ແບບ 2+3 ແລະ ເຮົາບໍ່ຈໍາເປັນ ເຊົ່າເນື້ອທີ່ອີກ, ດິນນີ້ ອາດຈະເປັນຂອງຣັດ ໃຫ້ປະຊາຊົນຄຸ້ມຄອງ ເບິ່ງແຍງຜົລປູກ ຈົນກ່ວາ ຈະມີການເກັບຜົລປູກ ແລະ ກໍມາລົບຕົ້ນທຶນອອກ ເຫລືອແລ້ວ ມາປັນກັນ ກັບປະຊາຊົນ.”
ທ່ານ ອະທິບາຍ ຕື່ມວ່າ ແບບ 2+3 ນັ້ນ, ສ່ວນຂອງ ປະຊາຊົນ ກໍຄືດິນ ແລະ ແຮງງານ, ສໍາຣັບ ນັກລົງທຶນນັ້ນ, ຈະເປັນແນວພັນ, ນັກວິຊາການ ແລະ ການຕລາດ.
ສ່ວນຜົນກໍາໄລ ແລະ ຣາຍໄດ້ ກ່ຽວກັບ ເຣື້ອງການປູກຢາງພາລານັ້ນ, ທ່ານ ພູວຽງ ກ່າວວ່າ ໂຄງການນີ້ ຫາກໍ່ເຣີ້ມລົງມື ໄດ້ 2 ປີ ຜ່ານມາ, ຍັງບໍ່ສາມາດ ມອງເຫັນຜົນໄດ້ ໃນລະຍະນີ້, ດັ່ງນັ້ນ ຕ້ອງໄດ້ລໍຖ້າອີກ ປະມານ 5 ປີ ຂ້າງໜ້າ, ຈຶ່ງຈະສາມາດບອກໄດ້ວ່າ ເຣື້ອງຂອງຢາງພາລາ ທີ່ເຮັດໃນຕອນນີ້ ຈະສາມາດສົ່ງຜົນດີ ໃນເຣື້ອງຂອງຣາຍໄດ້ ໃຫ້ກັບແຂວງ ຫລາຍປານໃດ?
ຈະເຣີນສຸກ ຣາຍງານ