ອົງການທ່ອງທ່ຽວແຫ່ງຊາດຂອງລາວ ແລະອົງການຊ້າງເອເຊັຽຂອງຝຣັ່ງເສດ ໃນລາວໄດ້ຈັດຣາຍການຕ່າງໆ ໃນງານບູນຊຶ່ງຈັດຂຶ້ນຣະຫວ່າງວັນທີ15ຫາວັນທີ 17ກຸມພານີ້ ຖືເປັນງານບູນ ຊ້າງຄັ້ງທີ ສອງພາຍຫລັງທີ່ໄດ້ຈັດຂຶ້ນຢ່າງມີຜົນສໍາເຣັດ ມາແລ້ວເມື່ອປີກາຍຢູ່ເມືອງຫົງສາ ແຂວງໄຊຍະບູລີເຊັ່ນກັນ.
ໃນງານບຸນຊຶ່ງມີ ຜູ້ຄົນຫລາຍເຖີງປະມານ 10ພັນຄົນເຂົ້າຮ່ວມ. ໃນພິທີເປີດ ມີຂະບວນແຮ່ຕ່າງໆຢ່າງຫລາກຫລາຍ ຮວມທັງຂະບວນແຮ່ຂອງຊ້າງຈໍານວນ 59ໂຕ, ຂະບວນແຮ່ຂອງຍີງນຸ່ມສາວ ໃນຊຸດຊົນເຜົ່າ. ໃນງານນັ້ນ ມີທັງການຈູດບັ້ງໄປແລະການແຂ່ງເຮືອ ນໍາດ້ວຍ.
Dr. Lien Thikeo ເຈົ້າແຂວງແຂວງໄຊຍະບູລີ ກ່າວໃນພິທີເປີດງານເທດສະການນັ້ນວ່າ ງານດັ່ງກ່າວເປັນສ່ວນນຶ່ງຂອງຄວາມພະຍາຍາມ ທີ່ຈະນໍາຊ້າງເຂົ້າມີສ່ວນຮ່ວມໃນ ອຸດສະຫະກໍາທ່ອງທ່ຽວຂອງລາວ ເພື່ອສ້າງຣາຍໄດ້ໃຫ້ ຜູ້ເປັນເຈົ້າຂອງຊ້າງແລະຊ່ວຍພວກເຂົາເຈົ້າ ໃນການລ້ຽງຊ້າງຕໍ່ໄປ.
ພ້ອມກັນນັ້ນ ກໍເປັນງານບູນທີ່ຈັດຂຶ້ນເພື່ອ ໃຫ້ຮັບຮູ້ກ່ຽວກັບຄຸນຄ່າແລະຜົນປະໂຫຍດ ຂອງຊ້າງໃນໝູ່ຄົນລູ້ນໜຸ່ມນ້ອຍ ອີກດ້ວຍ.
Dr. ລຽນ ທິແກ້ວກ່າວວ່າ ປະເທດລາວມີການກ່ຽວພັນກັບຊ້າງ ມາແຕ່ດົນນານແລະລາວ ກໍເຄີຍຂະນານນາມວ່າ ລ້ານຊ້າງອັນໝາຍຄວາມວ່າ ລາວ ເຄີຍເປັນທີ່ຢູ່ຂອງຊ້າງຈໍານວນຫລວງຫລາຍ ແຕ່ມາໃນທຸກວັນນີ້ ຊ້າງຫາກມີຈໍານວນລຸດຜ່ອນລົງ. ຕາມຄໍາເວົ້າຂອງທ່ານ ລຽນທິແກ້ວ -ແຂວງໄຊຍະບູລີ ໄດ້ມີຊ້າງບ້ານພຽງ 488ໂຕແລະໃນນັ້ນ ມີບໍ່ພໍທໍ່ໃດໂຕ ທີ່ອອກລູກຢ່າງປົກກະຕິ ໃນເມື່ອຊ້າງທັງຫລາຍຕ້ອງໄດ້ ເຮັດວຽກລາກແກ່ ຕະລອດເວລາແລະກໍມີໂອກາດໜ້ອຍ ທີ່ຈະຜະລິດລູກໄດ້. ແລະວ່າທາງການພະຍາຍາມທີ່ຈະລຸດຜ່ອນການ ເຮັດວຽກລາກແກ່ຂອງຊ້າງລົງ ໂດຍຫວັງວ່າຈະຊ່ວຍໃຫ້ຊ້າງມີຈໍານວນເພີ່ມຂຶ້ນ.
ມະນີຈັນ ຣາຍງານ