ຊາວເຜົ່າມົ້ງ ໂຮມຊຸມນຸມ ປະທ້ວງ ການລະເມີດສິດທິມະນຸດ ຊາວເຜົ່າມົ້ງ ໃນ ສປປລາວ

2008-03-25
ອີແມວລ໌
ຄໍາເຫັນ
Share
ພິມ

ຊາວເຜົ່າມົ້ງ-ອາເມຣິກັນ ຫລາຍພັນຄົນ ແລະ ນັກຣົບເກົ່າ ອະເມຣີກັນ, ຮ່ວມກັບ ຊາວອະເມຣິກັນ ຫລາຍພັນຄົນ ເຕົ້າໂຮມກັນ ເພື່ອປະທ້ວງ ການລະເມີດສິດທິມະນຸດ ຊາວເຜົ່າມົ້ງ, ຜູ້ທີ່ອາສັຍຢູ່ໃນລາວ ແລະ ແຜນການ ສົ່ງອົພຍົບ ຊາວເຜົ່າມົ້ງ 8 ພັນຄົນ ກັບຄືນ ສປປລາວ ຂອງຣັຖບານໄທ, ອີງຕາມຖແລງການ ທີ່ວິທຍຸ ເສເຊັຍເສຣີ ໄດ້ຮັບໃນມື້ວັນທີ 24 ມີນານີ້.

ການໂຮມຊຸມນຸມ ກໍານົດຂຶ້ນ ໃນວັນທີ 24 ມີນາ, ເວລາ 11:30 ຕອນເຊົ້າ, ທີ່ຫ້ອງການຣັຖບານ ຣັຖແຄລີຟໍເນັຍ ໂດຍການອຸປະຖັມ ຂອງສະມາຊິກສະພາ Dave John ແລະ ທ່ານ ວາມິງ ຊີອົງ, ປະທານ ຄະນະກັມມະການ ແອັດ ຮັອກ ມົ້ງ-ອະເມຣິກັນ ທີ່ນະຄອນ ແຊັກກະແຣເມັນໂຕ.

ທ່ານ ຊີອົງ, ກ່າວວ່າ: ການໂຮມຊຸມນຸມ ເທື່ອນີ້ ມີ 2 ປະເດັນ ທີ່ແຕກຕ່າງ ຈາກເທື່ອກ່ອນ, ຄວາມແຕກຕ່າງ ອັນທໍາອິດ ແມ່ນວ່າ ເທື່ອນີ້ ຊາວເຜົ່າມົ້ງ-ອະເມຣິກັນ ໄດ້ຮ່ວມມື ກັບນັກຣົບເກົ່າ ອະເມຣິກັນ ໃນທົ່ວໂລກ ເພື່ອປະທ້ວງ ການສັງຫານ ຊາວເຜົ່າມົ້ງ ທີ່ລີ້ຊ່ອນ ຢູ່ໃນປ່າ ໃນປະເທດລາວ. ຕັ້ງແຕ່ ສົງຄາມສິ້ນສຸດລົງ ໄດ້ 33 ປີແລ້ວ, ມີຊາວເຜົ່າມົ້ງ ເສັຍຊີວິດ ຫລາຍຮ້ອຍພັນຄົນ. ນອກຈາກນັ້ນ, ພວກທ່ານ ກໍຍັງປະທ້ວງ ທີ່ວ່າ ຣັຖບານໄທ ຈະສົ່ງອົພຍົບ ຊາວເຜົ່າມົ້ງ ໃນປະເທດໄທ ເກືອບ 8 ພັນຄົນ ກັບຄືນ ສປປລາວ, ຊຶ່ງຈະເຮັດໃຫ້ຊາວເຜົ່າມົ້ງ ເສັຍຊີວິດຕື່ມ ແລະ ຖືກປະຫັດປະຫານ.

ຄວາມແຕກຕ່າງ ອັນທີ 2 ແມ່ນວ່າ ພວກທ່ານ ຈະປ່ຽນວິທີການກົດດັນ. ທ່ານກ່າວຕື່ມ ວ່າ: ພວກທ່ານ ໄດ້ຮຽກຮ້ອງ ຣັຖບານ ສະຫະຣັດ ແລະ ຣັຖບານ ປະເທດຕ່າງໆ ໃຫ້ໃຊ້ມາຕະການ ເພື່ອຍັບຍັ້ງ ການສັງຫານ ໃນສປປລາວ ແລະ ເປັນເວລາ 33 ປີແລ້ວ. ແຕ່ວ່າ ຍັງບໍ່ມີການແກ້ໄຂ ບັນຫາ, ດັ່ງນັ້ນ ພວກທ່ານ ຕ້ອງປະທ້ວງ ເພື່ອໃຫ້ຊາວໂລກ ແລະ ຮຽກຮ້ອງ ຫລາຍໆພາກສ່ວນ ເຊົາສນັບສນູນ ດ້ານເສຖກິດ, ການລົງທຶນ, ແລະ ການທ່ອງທ່ຽວ ໃນ ສປປລາວ.

ນອກຈາກນັ້ນ, ພວກທ່ານ ຍັງຈະຮຽກຮ້ອງ ໃຫ້ປະຊາຄົມສາກົນ ກີດກັ້ນ ການເຂົ້າເປັນ ສະມາຊິກ ອົງການ ການຄ້າໂລກ ຂອງສປປລາວ ຈົນກ່ວາ ຈະຍຸຕິ ການລະເມີດສິດທິມະນຸດ.

ສເນີ ໂດຍ ຈະເຣີນສຸກ

ຄໍາເຫັນ (0)
Share
ເຕັມຫນ້າ