ທາງການລາວ ສືບຕໍ່ຮ່ວມມື ກັບວຽດນາມ ກ່ຽວກັບ ການກວດກາ ອົງການແຫ່ງຣັຖ ໃຫ້ເລິກເຊີ້ງ ຂື້ນກ່ວາເກົ່າ

ຝ່າຍລາວ ໄດ້ຍົກບັນຫາ ຕໍ່ວຽດນາມ ວ່າ ຈະກວດກາ ອົງການແຫ່ງຣັຖ ແລະ ກວດກາເຈົ້າໜ້າທີ່ ຫລືພະນັກງານ ຂອງຣັຖ ທີ່ລະເມີດ ກົດໝາຍແບບໃດ, ແລະ ຈະໄຊ້ກົດໝາຍ ແນວໃດເພື່ອເຜົ້າລະວັງ ເບີ່ງການກະທຳ ອັນທຸດຈະຣິດ ຂອງ ພະນັກງານຂອງຣັຖ.

ທາງການລາວ ສືບຕໍ່ຮ່ວມມື ກັບວຽດນາມ ກ່ຽວກັບ ການກວດກາ ອົງການແຫ່ງຣັຖ ໃຫ້ເລິກເຊີ້ງ ຂື້ນກ່ວາເກົ່າ ພາຍໄຕ້ການຮ່ວມມື ແບບຮອບດ້ານ ລະຫ່ວາງສອງ ປະເທດ.

ເມື່ອ ວັນທີ່ 24 ມົກະຣາ ຜ່ານມານີ້ ຄະນະຜູ້ແທນ ຈາກປະເທດວຽດນາມ ຊຶ່ງນຳພາໂດຍທ່ານ Tran Van Truyen ປະທານອົງການ ກວດກາ ແຫ່ງຣັຖ ຂອງວຽດນາມ ໄດ້ເດີນທາງມາເຮັດວຽກ ກັບອົງການກວດກາ ແຫ່ງຣັຖຂອງລາວ ຊຶ່ງນຳພາໂດຍທ່ານ ອາສັງ ເລົາລີ ຮອງນາຍົກຣັຖະມົນຕຣີ ແລະ ປະທານ ອົງການ ກວດກາແຫ່ງຣັຖຂອງລາວ ຕາມລາຍງານ ຂອງໜັງສືພິມວຽງຈັນທາຍ. ລາຍງານວ່າ ສອງຝ່າຍໄດ້ລາຍງານ ໃຫ້ກັນຊາບເຖິງ ກິດຈະກັມຕ່າງໆ ກ່ຽວກັບ ການກວດກາ ວຽກງານຂອງຣັຖ ທີ່ໄດ້ປະຕິບັດມາ.

ຝ່າຍລາວ ໄດ້ຍົກບັນຫາ ຕໍ່ວຽດນາມ ວ່າຈະກວດກາ ອົງການແຫ່ງຣັຖ ແລະກວດກາເຈົ້າໜ້າທີ່ ຫລືພະນັກງານ ຂອງຣັຖ ທີ່ລະເມີດກົດໝາຍແບບໃດ, ແລະຈະໄຊ້ກົດໝາຍແນວໃດ ເພື່ອເຜົ້າລະວັງ ເບີ່ງການກະທອັນທຸດຈະຣິດຳ ຂອງພະນັກງານຂອງຣັຖ. ບັນຫາທີສອງ ຝ່າຍລາວໄດ້ຖາມເຖິງບົດຮຽນ ແລະມາຕະການຕ່າງໆ ທີ່ວຽດນາມໄຊ້ໃນການ ຕໍ່ຕ້ານ ການສໍ່ລາດບັງຫລວງ ຢ່າງມີປະສິດທິພາບ ໃນນັ້ນຮ່ວມທັງການ ປະຕິບັດດຳຣັຖ ຂອງນາຍົກຣັຖະມົນຕຣີ ກ່ຽວກັບການຊອກຮູ້ຊັບສິນ ຂອງພະນັກງານຣັຖ.

ຄະນະຜູ້ແທນວຽດນາມ ຈະຢູ່ເຮັດວຽກໃນລາວ ເຖິງວັນທີ 27 ມົກະຣາ ແລະ ຈະເດີນທາງ ໄປເມືອງຫລວງພະບາງ ເພື່ອໄປພົປະກັບອົງການ ກວດກາ ແຫ່ງຣັຖ ປະຈຳແຂວງ ແລະສົນທະນາ ກ່ຽວກັບການຮ່ວມມືກັນ. ກ່ຽວກັບວຽກງານກວດກາ ແຫ່ງຣັຖນີ້ ຝ່າຍລາວ ແລະຝ່າຍວຽດນາມ ໄດ້ມີການຮ່ວມມືກັນ ຢ່າງໄກ້ສິດ ນັບຕັ້ງໄດ້ສ້າງຕັ້ງ ອົງການກວດກາ ແຫ່ງຣັຖຂື້ນ ໂດຍແມ່ນວຽດນາມ ເປັນຜູ້ຊ່ວຍຈັດຕັ້ງຂື້ນ.

ບາງຄັ້ງຝ່າຍລາວ ກໍສົ່ງຄະນະຜູ້ແທນ ໄປຝຶກອົບຣົມ ນຳຝ່າຍວຽດນາມ ນັບຕັ້ງແຕ່ຂັ້ນສູນກາງ ລົງມາ. ຕໍ່ໄປສອງຝ່າຍ ກໍຈະຮ່ວມມືກັນ ໃຫ້ກ້ວາງຂວາງ ກ່ວານີ້ອີກ. ລາຍງານຂອງໜັງສືພິມ ວຽດນາມ ວ່າ ຝ່າຍລາວ ໄດ້ຮຽກຮ້ອງໃຫ້ ວຽດນາມ ຊ່ວຍຝຶກແອບເຈົ້າໜ້າທີ່ ກວດກາແຫ່ງຣັຖຂອງລາວ ,ແລະຝ່າຍວຽດນາມ ກໍວ່າຈະສົ່ງນັກຊ່ຽວຊານ ວຽດນາມ ມາຝຶກແອບພະນັກງານ ອົງການກວດກາ ແຫ່ງ ຣັຖໃຫ້ຝ່າຍລາວ.

ສົມເນ ຣາຍງານ