ແຂວງຫລວງພະບາງ ຍັງມີບັນຫາ ກ່ຽວກັບ ການຖາງປ່າເຮັດໄຮ່ ຂອງຊາວບ້ານ ຢູ່ຢ່າງກ້ວາງຂວາງ

ແຂວງຫລວງພະບາງ ຍັງມີບັນຫາກ່ຽວກັບ ການຖາງປ່າເຮັດໄຮ່ ຂອງຊາວບ້ານ ຢູ່ຢ່າງກ້ວາງຂວາງ ເຖິງແມ່ນວ່າ ທາງການແຂວງ ເອົາມາຕະການ ຫລຸດຜ່ອນ ການຖາງປ່າເຮັດໄຮ່ ນິ້ກໍຕາມ, ຕາມທີ່ທ່ານ ສາຍສະໝອນ ຄົມທະວົງ ຮອງເຈົ້າແຂວງໆ ຫລວງພະບາງ ໄດ້ອະທິບາຍ.

(ສຽງ) "ການຖາງປ່າເຮັດໄຮ່ ເນື້ອທີ່ໄຮ່ມັນຍັງຢູ່ລະຫ່ວາງ 16,000 ເຮັກຕາ ປັນຫານີ້ ເປັນປັນຫາທີ່ໜັກໃຈ ສຳລັບຫລວງພະບາງ ບາງຄົນ ທີ່ທຸກຍາກທີ່ເຮັດໄຮ່ ດ້ານນຶ່ງເຮັດໄຮ່ ມັນຕ້ອງໄດ້ຖາງປ່າ ເຮັດໃຫ້ປ່າ ນັບມື້ນັບຊຸດໂຊມລົງ ແລ້ວນ້ຳຈະບົກແຫ້ງ."

ທ່ານວ່າ ໃນຈຳນວນພື້ນທີ່ 16,000 ເຮັກຕານີ້ ກໍມີຢູ່ເຂດເມືອງວຽງຄຳ ເມືອງໂພນໄຊ ແລະເມືອງປາກແຊງ ຊຶ່ງຖືວ່າ ເປັນເມືອງຊົນະບົດ ທີ່ທຸກຍາກ ປະຊາຊົນ ຍັງບໍ່ທັນມີເງື່ອນໄຂ ໃນການມີວຽກເຮັດງານທຳ ທີ່ໝັ້ນຄົງ. ທາງການກ່ຽວຂ້ອງ ກໍພະຍາຍາມ ລົງໄປ ໃຫ້ການສຶກສາອົບໂຮມຊາວບ້ານ ໃຫ້ປ່ຽນພຶດຕິກັມ ຈາກການຖາງປ່າເຮັດໄຮ່ ໂດຍເລີ້ມສ້າງຖນົນຫົນທາງ ຈາກເມືອງ ຫາເມືອງ ແລະຈາກບ້ານຫາບ້ານ ຕາມທີ່ສາມາດສ້າງໄດ້. ທ່ານກ່າວຕໍ່ໄປວ່າ:

(ສຽງ) "ວ່າຕາມແຜນການພັດທະນາ ເສຖະກິດ ສັງຄົມຂອງລາວ ຮອດປີ 2010 ຕ້ອງຍຸຕິການຖາງປ່າ ເຮັດໄຮ່ ໃຫ້ໄດ້ຢ່າງສີ້ນເຊີງ, ແຕ່ວ່າມາຮອດເວລານີ້ ເນື້ອທີ່ໄຮ່ ກໍຍັງສູງຢູ່ ໝາຍຄວາມ່ວ່າ ຈະຕ້ອງໄດ້ຖອດຖອນ ບົດຮຽນເບິ່ງວ່າ ຕ້ອງໄດ້ມີມາຕະການ ຫຍັງແດ່ເພື່ອສືບຕໍ່ແກ້ໄຂ ຄວາມທຸກຍາກ ຂອງປະຊາຊົນ."

ປັດຈຸບັນຊາວບ້ານທີ່ຖາງປ່າເຮັດໄຮ່ ໃນແຂວງຫລວງພະບາງ ມີປະມານ 18% ຂອງ ພົນລະເມືອງ 4 ແສນກ່ວາຄົນ ໃນແຂວງຫລວງພະບາງ ຖືວ່າເປັນ ຈຳນວນທີ່ທຸກຍາກສຸດ ໃນແຂວງ. ທາງການລາວ ກໍຍອມຮັບຮູ້ດີວ່າ ບັນຫາ ການຖາງປ່າເຮັດໄຮ່ ເປັນບັນຫາ ທີ່ບໍ່ສາມາດແກ້ຕົກ ໃຫ້ໄດ້ໃນລະຍະສັ້ນ ຍ້ອນວ່າບໍ່ມີງົປະມານພຽງພໍ, ອາໄສແຕ່ງົປະມານ ຊ່ວຍເຫລືອ ຈາກຕ່າງປະເທດ ຈຳນວນນ້ອຍໆໃ ນແຕ່ລະປີ ກໍຈະບໍ່ສາມາດແກ້ໄຂຫຍັງໄດ້.

ສົມເນ ຣາຍງານ