ໄທຽ ຢືນຢັນ ກາຣສົ່ງຜູ້ຕ້ອງຫາຄະດີ ຄວາມບໍ່ສງົບ ດ່ານວັງເຕົ່າ ໃຫ້ທາງກາຣລາວນັ້ນ ຖືກຕ້ອງ ຕາມກົດໝາຍ


2008.04.03

ທາງກະຊວງ ກາຣຕ່າງປະເທດໄທຽ ໄດ້ອອກແຖລງຂ່າວ ຕໍ່ສື່ມວລຊົນ ໃນມື້ວັນທີ່ 2 ເມສາ 2008 ນີ້ ກ່ຽວກັບ ກໍຣະນີ ທີ່ທາງສະຖານີ ໂທຣະທັສລາວ ໃນນະຄອນ Los Angeles ຣັຖ California ໄດ້ແສດງ ຄວາມຄິດເຫັນວ່າ ຣັຖບາລ ຂອງທ່ານທັກສິນ ຊີນນາວັຕ ລະເມີດອຳນາຈສາລ ທີ່ໄດ້ຈັດສົ່ງ ຜູ້ຕ້ອງຫາ ຊາວລາວ 16 ຄົນ ທີ່ວ່າ ກໍ່ຄວາມບໍ່ສງົບ ຢູ່ດ່ານວັງເຕົ່າ ເມືອງໂພນທອງ ແຂວງຈຳປາສັກ ໃຫ້ແກ່ທາງກາຣ ສປປລາວ ແຕ່ສມັຍ 4 ປີ ຜ່ານມາ, ດັ່ງທີ່ທ່ານ ນົພດົລ ປັທທະມະ ຣັຖມົນຕຣີກະ ຊວງ ກາຣຕ່າງປະເທດ ໃຫ້ກາຣຊີ້ແຈງ ວ່າ:

“ທາງທີວີລາວທີ່ Los Angeles ໄດ້ອອກເປັນຂ່າວ ເຖີງອະດີດ ນາຍົກທັກສິນ ວ່າ ເປັນຄົນສົ່ງຜູ້ ຮ້າຍຂ້າມແດນທັງ 16 ຄົນ ຊື່ງຄວາມຈີງມີຢູ່ວ່າ: ຣັຖບາລໄທຽ ບໍ່ເຄີຽສົ່ງຜູ້ຮ້າຍຂ້າມແດນ ພວກທີ່ຫລົບໜີມາ ທາງຊ່ອງເມັກ ອຸບົລຣາຊທານີ ທາງປະເທດໄທຽ ໄດ້ດຳເນີນຄະດີຕາມກົດໝາຍ ຂອງຄົນເຂົ້າເມືອງ ແລະ ມີອາ ສຸດປືນ ພາຍຫລັງ ທີ່ຈຳຄຸກເປັນທີ່ຮຽບຮ້ອຍແລ້ວ ທາງກາຣໄທຽ ກໍໄດ້ຈັດສົ່ງພວກຕ້ອງຫາ ດັ່ງກ່າວ ຕາມຄຳ ຮ້ອງຂໍຂອງທາງກາຣ ສປປລາວ ແລະ ວ່າ ທາງສະຖານີໂທຣະທັສ ດັ່ງກ່າວ ອາຈຈະໃຫ້ຂໍ້ມູລ ທີ່ບໍ່ຖືກຕ້ອງ”

ຄາວທີ່ເຫຕກາຣຄວາມບໍ່ສງົບ ເກີດຂື້ນ ແຕ່ປີ 2000 ນັ້ນ ມີຜູ້ຕ້ອງຫາ ທັງໝົດ 17 ຄົນ ດ້ວຍກັນ ແຕ່ຜູ້ໜື່ງ ໄດ້ເສັຽຊີວີຕໄປ. ສ່ວນ 16 ຄົນ ທີ່ຫລົບໜີເຂົ້າໄທຽ ກໍຖືກຈັບ ດຳເນີນຄະດີ ຊື່ງທາງສາລໄທຽ ໄດ້ຕັດສິນ ບໍ່ແມ່ນຄວາມຜິດອາຍາທັມດາ ແຕ່ຫາກເປັນລັກສະນະ ທາງກາຣເມືອງ ເພາະມີກາຣຕໍ່ສູ້ຮຽກຮ້ອງ ປະຊາທິປະໄຕ ສະນັ້ນ ຜູ້ຕ້ອງຫາ ທັງໝົດ ຈື່ງຂໍລີ້ພັຍກາຣເມືອງ ກັບທາງອົງກາຣ ສະຫະປະຊາຊາຕ ແຕ່ຫາກບໍ່ປະສົບຜົລ ສຳເຣັຈ ແລະ ໃນທີ່ສຸດທັ້ງ 16 ຄົນ ກໍຖືກສົ່ງກັບຄືນ ໃຫ້ທາງກາຣລາວ ໃນວັນທີ່ 4 ກໍຣະກະດາ 2004.

ເຖີງຢ່າງໃດ ກໍຕາມ ທາງໂທຣະທັສລາວ ທີ່ນະຄອນ Los Angeles ໄດ້ອອກຄຳຄິດເຫັນ ໃນມື້ວັນທີ່ 1 ເມສານີ້ ວ່າ: ກາຣຈັດສົ່ງ ຜູ້ຕ້ອງຫາໃຫ້ແກ່ທາງ ກາຣລາວນັ້ນ ເປັນກາຣລະເມີດກົດໝາຍ ແຕ່ທ່ານ ນົພດົລ ກໍໄດ້ໃຫ້ກາຣຊີ້ແຈງ ເພີ່ມ ວ່າ:

“ທັງສາລອາຍາ ແລະ ສາລອຸທອນ ຂອງໄທຽ ກໍຍົກຄຳຮ້ອງຂໍ ສົ່ງຜູ້ຮ້າຍຂ້າມແດນ ສະນັ້ນ ທາງກາຣກ່ຽວຂ້ອງ ຈື່ງໄດ້ຈັດມອບຕົວ ສົ່ງຄືນ ໄປຍັງປະເທດລາວ ບ່ອນທີ່ເຂົາເຈົ້າ ເຂົ້າມານັ້ນ ສະນັ້ນ ຈື່ງວ່າ ບໍ່ມີກາຣສົ່ງຜູ້ຮ້າຍຂ້າມແດນ ໃດໆທັ້ງສິ້ນ”

ເຈົ້າໜ້າທີ່ໄທຽດັ່ງກ່າວໄດ້ເນັ້ນອີກວ່າ: ທາງໂທຣະທັສລາວອາຈໄດ້ຮັບຂໍ້ມູລທີ່ຜິດ ພາດ ແລະສະເພາະຜູ້ຕ້ອງຫາທັງໝົດນັ້ນຖືກສາລລາວຕັດສິນໃຫ້ 8 ຄົນຈຳຄຸກ 12 ປີ, ອີກ 6 ຄົນໃຫ້ຈຳຄຸກ 7 ປີ ສ່ວນອີກ 2 ຄົນນັ້ນໃຫ້ຈຳຄຸກຜູ້ລະ 2 ປີ!!

ຣາຍງານ ໂດຍ ຫວາດ ສີມູນ

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.