ສະຫະປະຊາຊາດ ໄດ້ມອບເງິນ ຈຳນວນ 1 ລ້ານ ກັບ 880, 000 ໂດລາສະຫະຣັຖ ໃຫ້ກອງທຶນ ໂຄງການ ພັດທະນາ ປູກພືດແທນຝິ່ນ ແກ່ຣັຖະບານລາວ

ເມື່ອວັນພຸດຜ່ານມານີ້ ຫ້ອງການຄວບຄຸມ ຢາເສບຕິດ ແລະອັຊະຍາກັມ ຂອງ ສະຫະປະຊາຊາດ ໄດ້ລົງນາມສັນຍາ ມອບເງິນຈຳນວນ 1 ລ້ານກັບ 880, 000 ໂດລາ ສະຫະຣັຖ ໃຫ້ກອງທຶນ ໂຄງການພັດທະນາ ປູກພືດແທນຝິ່ນ ແກ່ຣັຖະບານລາວ.

ທຶນຈຳນວນ ດັ່ງກ່າວແມ່ນຣັຖະບານ ເຢັຽຣະມັນ ເປັນຜູ້ ປະກອບສ່ວນ ໃຫ້ເພື່ອຊ່ວຍເຫລືອ ຊາວບ້ານໃນເຂດເມືອງຂວາ ແລະເມືອງໃໝ່ ແຂວງພອງສາລີ ຈຳນວນ 1,100 ຄອບຄົວ ທີ່ຢຸດເຊົາປູກຝິ່ນໄປແລ້ວ ຕາມຄວາມຕ້ອງການ ຂອງຣັຖະບານລາວ. ແຂວງພອງສາລ ເປັນແຂວງທີ່ມີ ປະຊາຊົນ ປູກຝິ່ນຫລາຍກ່ວາແຂວງອື່ນໆ ມີປະຊາຊົນ ຢຸດເຊົາປູກຝິ່ນໄປແລ້ວ ຈຳນວນ 10,000 ຄົນ ຫລືປະມານ 1,600 ຄອບຄົວ.

ລາຍງານວ່າ ປະຊາຊົນ ທີ່ເຊົາປູກຝິ່ນໄປແລ້ວ ຈຳນວນນຶ່ງ ກໍກັບຄືນໄປປູກຝິ່ນ ອີກໃໝ່ກໍມີ ດັ່ງທີ່ເຈົ້າໜ້າທ ແຂວງພອງສາລີ ໄດ້ກ່າວວ່າ:

(ສຽງ) "ປະຊາຊົນທີ່ວ່າເຂົາເຈົາ້ ລັກລອບປູກຝິ່ນຄຶນນັ້ນ ໂດຍສະເພາະ ກໍຍ້ອນບໍ່ມີເງື່ອນໄຂ ທີ່ ຈະທົດແທນ ຈາກການປູກຝິ່ນນີ້ ໄປເຮັດແນວອື່ນ ອາຊີບແນວອື່ນ. ຈັ່ງຊັ້ນ ມາຮອດປັດຈຸບັນນີ້ ອີງໃສ່ຄວາມຕ້ອງການ ຂອງປະຊາຊົນ ແລະອີງໃສ່ການລົງທຶນ ເຂົ້າໃນການພັດທະນາ ເພື່ອຮອງຮັບ ໃນການຍຸຕິການປູກຝິ່ນ ໃຫ້ປະຊາຊົນ ນັ້ນແຫລະ ມັນຈຶ່ງສາມາດຢຸດເຊົາກັນໄດ້."

ເງິນທຶນຊ່ວຍເຫລືອດັ່ງກ່າວນີ້ ຈະເລີ້ມມີຜົນປະຕິບັດ ນັບແຕ່ເດືອນມົກະຣາ ປີ 2008 ໄປຫາທ້າຍປີ 2010 ລວມແລ້ວ ມີກຳນົດສາມປີ. ກິດຈະກັມການຊ່ວຍເຫລືອ ແກ່ປະຊາຊົນກໍມີຄື ຊ່ວຍເຫລືອຊາວບ້ານ ໃນການພັດທະນາ ອາຊີບໃໝ່, ສົ່ງເສີມໃຫ້ເຂົາເຈົ້າ ປູກພືດກະເສດອື່ນໆ ທົດແທນ, ວຽກງານ ໂຄສະນາຝຶກອົບຣົມ ຊາວບ້ານ ດ້ານລະບຽບກົດໝາຍ ເພື່ອໃຫ້ຊາວບ້ານ ມີຄວາມຕື່ນຕົວ, ສ້າງກອງທຶນ ປະຈຳຊຸມຊົນ ເປັນຕົ້ນ. ພ້ອມກັນນັ້ນ ເງິນຈຳນວນນຶ່ງ ກໍຈະນຳໄຊ້ເຂົ້າ ໃນໂຄງການຄວບຄຸມ ບຳບັດ ແລະປີ່ນປົວ ຜູ້ຕິດຝິ່ນ ຈຳນວນ 576 ຄົນ ໃນເຂດເມືອງສັມພັນ.

ສົມເນ ຣາຍງານ