ແຂວງຊຽງຂວາງ ມີເປົ້າໝາຍ ເກັບກູ້ຣະເບີດ ທີ່ຍັງບໍ່ທັນແຕກ ໃນພື້ນທີ 5 ລ້ານກວ່າ ຕາຕະລາງແມັດ


2008.04.01

ເຈົ້າໜ້າທີ່ຫ້ອງການ ແຂວງຊຽງຂວາງ ເຜີຍວ່າ ໃນປີ 2008 ນີ້ ແຂວງຊຽງຂວາງ ມີແຜນການເກັບກູ້ຣະເບີດ ທີ່ຍັງບໍ່ທັນແຕກ ອອກຈາກພື້ນທີ່ ກະສິກໍາ ແລະ ພື້ນທີ່ອື່ນໆ ໃຫ້ໄດ້ 5 ລ້ານ 252 ພັນກວ່າຕາຕະລາງແມັດ.

ໃນປີ 2007 ຜ່ານມານັ້ນ ທາງແຂວງ ສາມາດເກັບກູ້ໄດ້ ໃນພື້ນທີ່ 446 ພັນກວ່າເອັກຕາຣ ຊຶ່ງລື່ນເປົ້າໝາຍ ທີ່ວາງໄວ້ 105 ເປີເຊັນກວ່າ ໂດຍເກັບກູ້ຣະເບີດ ໄດ້ຢູ່ແຫ່ງຕ່າງໆ ຈໍານວນ 6452 ລູກ ແລະຕາມໝູ່ບ້ານ ໄດ້ 6325 ລູກ. ແລະວ່າ ໃນໄລຍະທີ່ຜ່ານມາ ເຖີງແມ່ນວ່າ ເຈົ້າໜ້າທີ່ແຂວງຊຽງຂວາງ ຈະໄດ້ພະຍາຍາມເກັບກູ້ຣະເບີດ ທີ່ຍັງບໍ່ທັນແຕກ ຢ່າງເຕັມທີ່ແລ້ວກໍຕາມ ແຕ່ປາກົດວ່າ ໃນປີ 2007 ກໍຍັງມີຊາວບ້ານ ປະສົບອຸບັດຕິເຫດ ຈາກຣະເບີດ ທີ່ຍັງບໍ່ທັນແຕກ ຈໍານວນ 28 ຄົນ. ໃນນັ້ນ ມີຜູ້ເສັຽຊີວິດ 9 ຄົນ ແລະ ບາດເຈັບ 19 ຄົນ.

ສາເຫດ ທີ່ເຮັດໃຫ້ຊາວບ້ານເລົ່ານີ້ ໄດ້ຮັບອຸບັດຕິເຫດ ຈາກຣະເບີດ ທີ່ຍັງບໍ່ທັນແຕກນັ້ນ ກໍເນື່ອງຈາກວ່າຊາວບ້ານເລົ່ານີ້ ໄດ້ອອກໄປທໍາມາຫາກິນ ໂດຍບໍ່ຮູ້ວ່າ ມີຣະເບີດຫລົງເຫລືອ ຢູ່ບ່ອນໃດແດ່. ເພາະສະນັ້ນ ໃນເວລານີ້ ໃນການທໍາມາຫາກິນ ຂອງຊາວບ້ານ ຈຶ່ງຕ້ອງມີຄວາມຣະມັດຣະວັງ ເປັນຢ່າງຍີ່ງ ເພາະຍັງມີຣະເບີດຫລົງເຫລືອຢູ່ອີກ ຈໍານວນຫລວງຫລາຍ ທີ່ພ້ອມຈະເກີດການຣະເບີດໄດ້ ຢູ່ທຸກເວລາ. ຄາດວ່າ ຄົງຕ້ອງໃຊ້ເວລາ ອີກຫລາຍສິບປີ ຈຶ່ງຈະສາມາດເກັບກູ້ຣະເບີດ ທີ່ຍັງບໍ່ທັນແຕກນັ້ນ ໄດ້ໝົດ.

ສເນີ ໂດຍ ມະນີຈັນ

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.