ຕຳຣວຈ ນະຄອນຫລວງວຽງຈັນ ຈັບຜູ້ຕ້ອງຫາ ໃຊ້ກາຈ້ຳປອມ 2 ຄົນ ພ້ອມດ້ວຍ ກາຈ້ຳປອມ 100 ກວ່າອັນ ຮວມທັງ ຂອງທາງກາຣ ຣະດັບສູງ

ຫວ່າງມໍ່ໆມານີ້ ເຈົ້າໜ້າທີ່ຕຳຣວຈ ນະຄອນ ຫລວງວຽງຈັນ ໄດ້ຈັບຄຸມຕົວ ກຸ່ມຄົນບໍ່ດີ ໄດ້ 2 ຄົນ ທີ່ລັກ ນຳເອົາກາ ຈ້ຳປອມ ໄປໃຊ້ເພື່ອຜົລປະໂຍດ ສ່ວນຕົວ.

ຫວ່າງມໍ່ໆມານີ້ ເຈົ້າໜ້າທີ່ ຕຳຣວຈ ນະຄອນຫລວງວຽງຈັນ ໄດ້ຈັບຄຸມຕົວ ກຸ່ມຄົນບໍ່ດີ ໄດ້ 2 ຄົນ ທີ່ລັກນຳເອົາ ກາຈ້ຳປອມ ໄປໃຊ້ເພື່ອຜົລປະໂຍດສ່ວນຕົວ ແລະກາປອມທີ່ ຄົ້ນພົບເຫັນ ໃນຄັ້ງນີ້ມີທັງໝົດ ເກືອບຮອດ 200 ອັນ ຮວມທັງກາຈ້ຳ ຂອງເຈົ້າໜ້າທີ່ ຣະດັບສູງ ຂອງພັກ-ຣັຖນຳດ້ວຍ.

ພັນຕຳຣວຈໂທ ແສງເພັດ ພົມມະລີ ຮອງຫົວໜ້າ ປ.ກ.ສ. ນະຄອນຫລວງວຽງຈັນ ໄດ້ແຈ້ງຕໍ່ທາງສື່ມວລຊົນວ່າ: ນອກຈາກ ສາມາດຈັບຜູ້ຕ້ອງຫາໄດ້ 2 ຄົນແລ້ວ ທາງໜ່ວຍງານຕຳຣວຈ ຍັງໄດ້ຍຶດເອົາ ກາຈ້ຳປອມ ໄດ້ທັງໝົດ 194 ອັນ ຊື່ງຮວມທັງ ກາຈ້ຳປອມ ສຳຫລັບບຸຄຄົນ ທີ່ມີຖານະຕຳແໜ່ງ ຂັ້ນສູນກາງ ລົງມາຂັ້ນທ້ອງຖີ່ນ ຈຳນວນ 81 ອັນ ທີ່ຖືວ່າຜິດ ຕໍ່ກົດຣະບຽບກົດໝາຍ ຢ່າງຮ້າຍແຮງ.

ເຈົ້າໜ້າທີ່ຕຳຣວຈ ດັ່ງກ່າວໄດ້ແຈ້ງເພີ່ມວ່າ: ສະເພາະຊນິດກາຕ່າງໆ ທີ່ກວດເຫັນ ໃນຄັ້ງນີ້ ກໍມີກາຈ້ຳສີແດງ ສຳຫລັບ ອົງກາຣຕ່າງໆຂອງຣັຖບາລລາວ ທັງໝົດ 56 ອັນ ພ້ອມກັບກາ ສໍາຫລັບ ຈ້ຳປະທັບແບບສີ່ຫລ່ຽມມົນທົນ ຊນິດສີ່ຫລ່ຽມຍາວ ຊື່ງເປັນກາ ຈ້ຳສຳຫລັບ ຂາອອກ-ຂາເຂົ້າ ຂອງຣັຖບາລ ເຊັ່ນກາຈ້ຳຂອງຄັງເງີນ ແລະພາສີອາກອນ.

ນອກຈາກນັ້ນ ຍັງມີກາຈ້ຳປະທັບ ແປດຫລ່ຽມ ຂອງວິສາຫະກິຈ ຫ້າງຮ້ານແລະອື່ນໆ ຫລາຍຢ່າງ ຊື່ງທັ້ງໝົດ ເປັນກາຣສໍ່ແສດງ ໃຫ້ເຫັນວ່າ ມີຂບວນກາຣໃຊ້ກາຈ້ຳປອມນີ້ ເພື່ອເຄື່ອນໄຫວ ໃນດ້ານທຸຣະກິຈ ກາຣນຳເອົາ ຍົນຍານພາຫະນະ ຫລືຣົຖເຖື່ອນເຂົ້າມາ ໃຊ້ໃນເມືອງລາວ ແບບບໍ່ຖືກຕ້ອງ ຕາມກົດໝາຍ ຕາມລຳພັງໃຈ ຂອງກຸ່ມຜູ້ມີອຳນາຈ ໃນທຸກຂັ້ນ ກາຣຈັດຕັ້ງ ຂອງພັກ-ຣັຖ ໃນປະເທດລາວ ປັຈຈຸບັນ.

ຢ່າງໃດກໍຕາມ ເຈົ້າໜ້າທີ່ ຕຳຣວຈລາວ ຄົນດັ່ງກ່າວ ໄດ້ເນັ້ນວ່າ: ທາງກາຣກ່ຽວຂ້ອງ ຍັງຈະດຳເນີນ ກາຣສືບສວນ ຢູ່ຕໍ່ໄປເພື່ອຕິດຕາມ ຫາຜູ້ຢູ່ເບື້ອງຫລັງ ໄປດຳເນີນຄະດ ີຕາມທາງກາຣ ແຕ່ທ່ານກໍຍອມຮັບວ່າ ຄົງຈະເປັນໄປໄດ້ຍາກ ເຊັ່ນກັນ ໂດຽສະເພາະທີ່ ມີກາຣພົວພັນ ນຳທາງກາຣພັກ-ຣັຖ ດັ່ງກ່າວນີ້.

ຫວາດ ສີມູນ ຣາຍງານ