ຣັຖບານສປປລາວ ມີແຜນຈະສ້າງທາງຣົດໄຟ ຈາກນະຄອນຫລວງວຽງຈັນ ລົງໄປຫາເມືອງທ່າແຂກ ແຂວງຄຳມ່ວນ

ຣັຖບານສປປລາວ ມີແຜນຈະສ້າງທາງຣົດໄຟ ຈາກນະຄອນຫລວງວຽງຈັນ ລົງໄປຫາເມືອງທ່າແຂກ ແຂວງຄຳມ່ວນ ຕໍ່ໃສ່ທາງຣົດໄຟ ຈາກເມືອງທ່າແຂກ ອອກໄປຫາ ວຽດນາມ.

ປັດຈຸບັນ ນັກວິຊາການວຽດນາມ ກຳລັງສຶກສາສຳຣວດ ຄວາມເປັນໄປໄດ້ຢູ່. ລາວ ແລະວຽດນາມ ມີແຜນຈະລົງມື້ສ້າງ ໃນເບື້ອງຕົ້ນໃນທ້າຍປີນີ້. ຣັຖ ບານລາວ ຢາກສ້າງທາງຣົດໄຟ ອອກໄປວຽດນາມ ກໍເພື່ອລາວ ຈະມີທາງຣົດໄຟ ເຊື່ອມຕໍ່ກັບທາງຣົດໄຟ ເສັ້ນເອເຊັຍ ດັ່ງ ເຈົ້າໜ້າທີ່ ອົງການ ທາງຣົດໄຟແຫ່ງຊາດລາວ ທ່ານນຶ່ງໄດ້ກ່າວ ກ່ຽວກັບເຣື່ອງນີ້ວ່າ:

(ສຽງ) "ແຕ່ວ່າຈະພະຍາຍາມ ຜລັກດັນໃຫ້ມັນເກີດ ຕອນທີ່ເຮົາສຳຣວດ ແມ່ນແຂວງຄຳມ່ວນ-ວຽດນາມ ຈະທະລຸທາງເລກເກົ້າ ທີ່ເຂົາຈະໄປ Survey ທີ່ທ່າແຂກ ໄປຫາວຽດນາມ ເປັນເສັ້ນທາງຂອງ Asian Railway."

ສຳຣັບທາງຣົດໄຟ ຈາກນະຄອນຫລວງວຽງຈັນ ລົງໄປຫາເມືອງທ່າແຂກນັ້ນ ຈະມີຄວາມຍາວ ປະມານ 400 ກິໂລແມັດ. ສ່ວນຝ່າຍໄທ ກໍຢາກສ້າງທາງຣົດໄຟ ຕໍ່ກັບລາວ ແລະວຽດນາມເຊັ່ນກັນ. ເມື່ອຣັຖ ມົນຕຣີ ການຕ່າງປະເທດລາວ ແລະໄທ ປະຊຸມກັນ ຢູ່ນະຄອນຫລວງວຽງຈັນ ເມື່ອປີກາຍ ທ່ານ ນິດ ພິບຸນສົງຄາມ ຣັຖມົນຕຣີ ການຕ່າງປະເທດໄທ ກໍໄດ້ສເນີໃຫ້ ມີການສ້າງທາງຣົດໄຟ ໃສ່ຂົວມິດຕະພາບລາວ-ໄທ ແຫ່ງທີ່ສາມ ແລະທີ່ສີ່ ຊຶ່ງໝາຍເຖິງ ຂົວຂ້າມແມ່ນ້ຳຂອງ ຣະຫວ່າງແຂວງຄຳມ່ວ ນແລະນະຄອນພະນົມ ແລະຂົວຣະຫວ່າງ ເມືອງຫ້ວຍຊາຍ ແຂວງບໍ່ແກ້ວ ແລະເມືອງຊຽງຂອງ ແຂວງຊຽງຮາຍຂອງໄທ.

ປັດຈຸບັນ ຣັຖບານໄທ ກຳລັງພິຈາຣະນາ ຄຳສເນີດັ່ງກ່າວນີ້ຢູ່. ເຈົ້າໜ້າທີ່ທາງຣົດໄຟ ຂອງລາວຄາດວ່າ ຖ້າໄທແລະວຽດນາມ ສົນໃຈຢາກສ້າງ ທາງຣົດໄຟ ຣະຫວ່າງສາມຊາດ ໂຄງການນີ້ ກໍອາດຈະເກີດເປັນຄວາມຈິງໄດ້.

ອາວະຣີ ຣາຍງານ