Heptilik xewerler (2 – 8 – dékabir)


2006.12.08
Share on WhatsApp
Share on WhatsApp

Rabiye qadirning terjimhali neshridin chiqidu

Uyghur milliy herikitining rehbiri rabiye qadirning namining xelq'ara jem'iyetke keng tonulushigha egiship, uning terjimhaligha bolghan qiziqishlarmu ashmaqta.

Rabiye qadir xanimning terjimihali pat arida gérmaniyide neshrdin chiqish aldida turmaqta. Bu munasiwet bilen gérmaniyidiki ixtiyari muxbirimiz ekrem mezkur eser üchün qelem tewritiwatqan meshhur yazghuchi aléksandiri'a xanim bilen söhbet élip bardi. Aléksandri'a xanim rabiye xanim heqqidiki mezkur kitabqa "bir ayalning ejdiha bilen élishishi" dep nam qoyghan bolup, kitab aldi bilen némis tilida, arqidin in'gliz qatarliq gherb tillirida neshir qilinidiken.

Xelq'ara kechürüm teshkilati rabiye qadirning perzentini qutuldurush pa'aliyiti bashlidi

11-Ayning 29 – küni xelq'ara kechürüm teshkilati norwigiye shöbisi özlirining tor betide Uyghur milli herikitining rehbiri, ataqliq kishlik hoquq pa'aliyetchisi rabiye qadir xanimning türmide yétiwatqan balilirini qutuldurush heqqide imza toplash herikiti bashlidi.

Hazir yene norwégiyide 2008-yilliq béyjing olimpik tenheriket yighinigha qarshi bayqut élan qilish heqqidimu munazire kétiwatqan bolup, bu mesilini rabiye qadir norwégiyide ziyarette bolghanda otturigha qoyghan idi. Norwégiye metbu'atlirida maqalilar élan qilinip, norwigiye tenheriketchilirining béyjing olimpik yighinigha qatnashmasliqi otturigha qoyulghan.

Qeshqerde pasport yighiwélindi

Qeshqerdin igiligen uchurlargha asaslan'ghanda, qeshqer sheherlik jama'et xewpsizlik idarisining xadimliri yéqinda, qeshqer sheher ahalisining öylirige birmu - bir kirip, kishilerning naraziliq bildürüshige qarimay, ularning pasportlirini mejburiy halda yighiwalghan.

Ürümchide 10 nechche neper Uyghur yash sotlandi ürümchi tengritagh rayonluq sot mehkimisi yéqinda, uzundin béri tijaret bilen shughullan'ghan ömer rozi, semet ababekri qatarliq 10 nechche yashni "qara jem'iyet teshkilligen" dep jinayet turghuzup sotlighan. Bular ichide ömer rozi gülsay mehelliside yer sétiwélip, Uyghur élining jenubidin ademlerni köchürüp chiqip makanlashturghan. Lékin bu mehelle hökümet teripidin tarqitiwétilgen iken.

Xewerlerdin qarighanda, yene yéqinda xitay da'iriliri yene "ang idé'ologiye saheside milliy bölgünchilikke qarshi küresh herikiti" ni qozghap, Uyghurlar ichide küchlük tesirge ige oqutquchilardin ürümchi sheherlik 14 ‏- ottura mektepning oqutquchiliri yüsüpjan yasin we erkin rehmitullani jazalighan.

Kanadada xitayni démokratiyileshtürüsh mesilisi boyiche muhakime yighini échildi

Kanada turushluq ixtiyari muxbirimiz kamil tursunning uchur bérishiche, kanada asiya tinch - okyan tetqiqat orni yighin chaqirip, kanada bilen asiya - tinch okyan rayonining soda - iqtisadi munasiwitini muzakire qildi. Bolupmu yighinda xitay - kanada munasiwiti we xitayni démokratiyileshtürüsh mesilisi üstide muhakime élip bérildi. Yighinda xitayning kishilik hoquq weziyitige köngül bölüdighan démokratik zatlar, xitayning démokratiyilishishi asiya - tinch okyan rayonining bixeterlikidiki achquchluq amil dep qaraydighanliqini bildürdi.

. Qirghizistandiki Uyghur ösmür chambashchi abdulla taran

Qirghizistanning béshkek shehiride yashaydighan Uyghur ösmür chambashchi abdulla taran, bu dölettiki yash nadir Uyghur tenterbiyichilirining biri. U, qirghizistan jumhuriyitide chambashchiliq türi boyiche ötküzülgen musabiqilarda hazirgha qeder besh qétim altun médalgha érishken.

Abdulla taran, tunji qétim 2003 - yili chambashchiliq musabiqisida birinchilikni qolgha keltürgen idi.

Qirghizistanda 50 ming etrapida Uyghur yashaydu. Uyghurlar az bolsimu, ularning ichide köpligen meshhur yazghuchilar, alimlar, tenheriketchiler yétiship chiqqan. Akadémik eziz narinbayéf, abdulla taran ene shularning jümlisidindur.

Qazaqistanda ghayip bolghan Uyghur musapirining iz dériki hazirgha qeder élinmidi

Qazaqistanning alma-ata shehiride 23- öktebirdin béri iz déreksiz yoqap ketken Uyghur musapiri erkin yarmemet sabirning iz dériki hazirgha qeder élinmidi. Musapirlar komisariyatining qazaqistan alma-ata shehiride turushluq ishxanisidiki xadimlar, erkin yarmemet sabir isimlik Uyghur musapirning xitaygha ötküzüp bérilgenlik éhtimali barliqini bildürdi.

Buningdin ilgirimu qazaqistan ikki neper Uyghurni qayturup bergen. Qazaqistan Uyghur siyasiy pa'aliyetchilirige zerbe bérishte xitay bilen qoyuq hemkarlashmaqta (ümidwar) .

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.