Уйғур муқами өзбекистанда көрситилди


2006.08.02

29‏- Вә 30‏- ийол күнлири уйғур муқам ансамбили өзбекистан пайтәхти ташкәнттики түркистан сарийида икки мәйдан достлуқ зиярәт оюни көрсәтти. Оюн башлиништин бурун хитайниң өзбекистанда турушлуқ баш әлчиси вә өзбекистандики уйғур мәдәнийәт мәркизи рәһбири сөз қилип, икки дөләт достлуқини тәкитләшти.

Уйғур муқам ансамбилидики артистлар уйғурчә кийим-кечәклирини кийип вә уйғур сазлири билән "чәбият муқами" ни орунлап чиқип, тамашибинларниң қизғин алқишиға еришкән. Уйғур муқам ансамбилиниң бу зиярити, җуңго, шинҗаң чәтәл алақә оюшмилири тәрипидин орунлаштурулған болуп, уларниң ташкәнттики оюн көрситиш җәрянлириға "хитай милләтләр мәдәнийәт мәркизи" билән өзбекистандики "уйғур мәдәнийәт мәркизи" мәсул болған.

Мәзкур паалийәт гәрчә өзбекистанлиқлар билән уйғурлар оттурисидики достлуқни күчәйтиш ролини ойнисиму, әмма өзбекистан даирилири билән хитай һөкүмити арисида уйғур мустәқилчилирини ортақ бастуруш һәмкарлиқ келишимлири бар. Болупму әнҗан вәқәсидин кейин хитайниң әнҗандики бастурушни қоллиши билән кәримоф һөкүмити хитайға техиму йеқинлашти. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.