Xitay hökümiti medeniy yadikarliqlarni qoghdash üchün köp meblegh ajratti

Xitayning qurulush ministirliqidiki emeldarlarning bayan qilishiche, xitay hökümiti yéqinda 2010 ‏- yilighiche tarixiy sheher, mehelle qatarliq herxil medeniy yadikarliqlarni qoghdash üchün 1 milyard yu'en meblegh ajratqan.

B b s ning bayan qilishiche, shangxey fuden uniwérsitétining proféssori lu jensung bu heqte mulahize élan qilip, junggodek bir nechche ming yilliq medeniyet en'enisige ige bir chong dölette hazir tarixi sheher izliridin aran 109 i, tarixi mehelle izliridin 157 si qaldi. Qalghanliri hökümet yétekchilikidiki sheherleshtürüsh herikiti jeryanida oghriliqche qézilip buzghunchiliqqa uchridi. Uningdin oghrilan'ghan medeniy yadikarliqlar qarangghu bazarda ashkara sétiliwatidu.

Hökümetning 'mutexessislerdin meslihet élish' dégini bir quruq shekil bolup qaldi, dégen. Uning qarishiche, jaylardiki medeniy yadikarliqlarni qoghdash orunliridiki kishilerni ölke, sheher bashliqliri özi belgilep qoyghan bolghachqa, ular yuqiridin buyruq kelgende, medeniy yadikarliqlarni qoghdaymen dep ching turushqa jür'et qilalmidi.

Bu proféssorning qarishiche, hazir béyjingdin shi'en'giche sozulghan tarixi medeniyet belwighida, burunqi tarixi izlarni körgili bolmaydighan ehwal shekillendi. Dunyada 'qedimi el' dep atalghan bir chong dölet üchün éytqanda, bu bir nomus qilishqa tégishlik hadise. Hazir hökümetning medeniy yadikarliqlarni qoghdash üchün meblegh ajratqanliqi yaxshi ish, emma bu 'mallarni yirtquchlar yep bolghandin kéyin qotan salghan' gha oxshap qéliwatidu. (Weli)