ﺯﻭﺭﺍﯞﺍﻥ ﺧﯩﺘﺎﻳﻼﺭ ﺗﻪﺭﯨﭙﯩﺪﯨﻦ ﯞﻩﻫﺸﯩﻴﻠﻪﺭﭼﻪ ﺋﯚﻟﺘﯜﺭﯛﯞﯦﺘﯩﻠﮕﻪﻥ ﺑﯘ 3 ﻳﺎﺷﻠﯩﻖ ﻧﺎﺭﻩﺳﯩﺪﻩ ﺑﺎﻟﯩﻨﯩﯔ ﺋﯩﺴﻤﻰ ﻗﯘﺗﻠﯘﻗﺠﺎﻥ ﺑﻮﻟﯘﭖ، ﯞﻩﻗﻪ ﻛﯜﻧﻰ ﻛﯩﭽﯩﻚ ﻗﯘﺗﻠﯘﻕ ﺩﺍﺩﯨﺴﻰ ﺑﯩﻠﻪﻥ "ﻳﻮﯞﻳﯜﻧﺴﻰ" ﺩﻩﭖ ﺋﺎﺗﺎﻟﻐﺎﻥ ﻣﺎﻱ ﺗﻮﺷﯘﺵ ﺷﯩﺮﻛﯩﺘﻰ ﺭﺍﻳﻮﻧﯩﺪﺍ ﻛﯧﺘﯩﯟﺍﺗﻘﺎﻧﺪﺍ ﺋﺎﺭﻗﯩﺪﯨﻦ ﻛﻪﻟﮕﻪﻥ ﺑﯩﺮ ﺗﻮﭖ ﺧﯩﺘﺎﻳﻼﺭﻧﯩﯔ ﻫﯘﺟﯘﻣﯩﻐﺎ ﺋﯘﭼﺮﯨﻐﺎﻥ ﺋﯩﻜﻪﻥ.

ﻗﻮﻟﻠﯩﺮﯨﺪﺍ ﻗﯩﯖﺮﺍﻕ - ﭘﯩﭽﺎﻕ، ﺗﻮﻗﻤﺎﻕ ﻛﯚﺗﯜﺭﯛﯞﺍﻟﻐﺎﻥ ﺑﯘ ﺧﯩﺘﺎﻳﻼﺭ ﺋﺎﺗﺎ - ﺑﺎﻻ ﺋﯩﻜﻜﯩﺴﯩﻨﯩﯔ ﺑﺎﺷﻠﯩﺮﯨﻐﺎ ﺭﺍﺳﺎ ﺋﯘﺭﯗﭖ، ﭼﺎﻧﺎﺷﻘﺎ ﺑﺎﺷﻠﯩﻐﺎﻥ. ﺑﺎﻟﯩﻨﯩﯔ ﺩﺍﺩﯨﺴﯩﻤﯘ ﺗﺎﻳﺎﻕ ﺯﻩﺭﺑﯩﺴﯩﺪﯨﻦ ﺑﺎﻟﯩﺴﯩﻨﻰ ﻗﻮﻏﺪﺍﭖ ﻗﯧﻠﯩﺸﻘﺎ ﺋﺎﻣﺎﻝ ﻗﯩﻼﻟﻤﯩﻐﺎﻥ. ﺯﻭﺭﺍﯞﺍﻥ ﺧﯩﺘﺎﻳﻼﺭ 3 ﻳﺎﺷﻘﺎ ﻛﯩﺮﮔﻪﻥ ﺑﯘ ﻧﺎﺭﻩﺳﯩﺪﯨﻨﯩﯔ ﻗﻮﻟﻠﯩﺮﯨﻨﻰ ﯞﻩ ﺑﻮﻳﯘﻧﻠﯩﺮﯨﻨﻰ ﭼﺎﻧﯩﻐﺎﻥ. ﻣﺎﻧﺎ ﻣﯘﺷﯘﻧﺪﺍﻕ ﺑﯩﺮ ﭘﻪﻳﯩﺘﺘﻪ ﯞﻩﻗﻪﻧﻰ ﻛﯚﺭﮔﻪﻥ ﺑﯩﺮ ﺗﻮﭖ ﺋﯘﻳﻐﯘﺭﻻﺭ ﻳﯜﮔﯜﺭﯛﭖ ﻛﯧﻠﯩﭗ ﺧﯩﺘﺎﻳﻼﺭﻏﺎ ﻗﺎﺭﺷﯩﻠﯩﻖ ﻛﯚﺭﺳﻪﺗﻜﻪﻥ. ﺑﯘﻧﯩﯔ ﺑﯩﻠﻪﻥ ﺑﺎﻟﯩﻨﯩﯔ ﺩﺍﺩﯨﺴﻰ ﻗﯘﺗﯘﻟﯘﭖ ﻗﺎﻟﻐﺎﻥ. ﺋﻪﻣﻤﺎ 3 ﻳﺎﺷﻠﯩﻖ ﻗﯘﺗﻠﯘﻕ ﺑﻮﻟﺴﺎ ﺑﻮﻳﯘﻥ ﯞﻩ ﺑﯩﻠﯩﻜﯩﺪﯨﻜﻰ ﭘﺎﻟﺘﺎ ﺯﻩﺭﺑﯩﺴﯩﺪﯨﻦ ﺑﻪﺧﺘﻜﻪ ﻗﺎﺭﺷﻰ ﺟﺎﻥ ﺋﯜﺯﮔﻪﻥ.

ﯞﻩﺗﻪﻥ ﺯﯨﻴﺎﺭﯨﺘﯩﺪﯨﻦ ﻗﺎﻳﺘﻘﺎﻥ ﺑﯘ ﻛﯩﺸﯩﻨﯩﯔ ﺑﯩﺰﮔﻪ ﺑﺎﻳﺎﻥ ﻗﯩﻠﯩﭗ ﺑﯧﺮﯨﺸﯩﭽﻪ، ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﺑﺎﻟﯩﻨﯩﯔ ﺩﺍﺩﯨﺴﯩﻐﺎ ﺋﯚﺯﻟﯩﺮﯨﻨﯩﯔ ﺑﺎﻟﯩﻨﯩﯔ ﻗﺎﺗﯩﻠﯩﻨﻰ ﭼﻮﻗﯘﻡ ﺗﯧﭙﯩﭗ ﺑﯧﺮﯨﺪﯨﻐﺎﻧﻠﯩﻘﯩﻨﻰ ﯞﻩﺩﻩ ﻗﯩﻠﻐﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﻫﺎﺯﯨﺮﻏﯩﭽﻪ ﻗﺎﺗﯩﻠﻼﺭ ﺗﯧﺨﻰ ﻗﻮﻟﻐﺎ ﺋﯧﻠﯩﻨﻤﯩﻐﺎﻥ. ﻗﯘﺗﻠﯘﻗﺠﺎﻧﻨﯩﯔ ﺟﻪﺳﯩﺘﯩﻨﻰ ﺩﺍﺩﯨﺴﻰ ﻗﻮﻝ ﺗﯧﻠﯧﻔﻮﻥ ﺋﺎﺭﻗﯩﻠﯩﻖ ﺭﻩﺳﯩﻤﮕﻪ ﺗﺎﺭﺗﯩﯟﺍﻟﻐﺎﻥ ﺑﻮﻟﯘﭖ، ﺋﯘﻧﯩﯔ ﺭﻩﺳﯩﻤﯩﻨﻰ ﻗﯘﺗﻠﯘﻗﺠﺎﻧﻨﯩﯔ ﺩﺍﺩﯨﺴﻰ ﺑﯩﺰﮔﻪ ﺧﻪﯞﻩﺭ ﻳﻪﺗﻜﯜﺯﮔﻪﻥ ﻣﻪﺯﻛﯘﺭ ﺭﺍﺩﯨﺌﻮ ﺋﺎﯕﻠﯩﻐﯘﭼﯩﻤﯩﺰ ﺑﯩﻠﻪﻥ ﭘﺎﺭﺍﯕﻼﺷﻘﺎﻧﺪﺍ ﺑﻪﺭﮔﻪﻥ ﺋﯩﻜﻪﻥ.

ﺑﯘ ﻛﯩﺸﻰ 7 - ﺋﯩﻴﯘﻝ ﻛﯜﻧﻰ ﺋﯚﻟﺘﯜﺭﯛﯞﯦﺘﯩﻠﮕﻪﻥ ﺑﯘﻧﺪﺍﻕ ﺋﯘﻳﻐﯘﺭﻻﺭﻧﯩﯔ ﺋﯩﻨﺘﺎﻳﯩﻦ ﻛﯚﭘﻠﯜﻛﯩﻨﻰ ، ﺋﻪﻣﻤﺎ ﺧﯩﺘﺎﻳﻨﯩﯔ ﺑﯘﻻﺭﻧﯩﯔ ﺑﯩﺮﯨﻨﯩﻤﯘ ﺋﺎﺷﻜﺎﺭﯨﻠﯩﻤﺎﻳﯟﺍﺗﻘﺎﻧﻠﯩﻘﯩﻨﻰ ﺋﯧﻴﺘﺘﻰ.

5 - ﺋﯩﻴﯘﻝ ﻛﯜﻧﯩﺪﯨﻜﻰ ﻧﺎﻣﺎﻳﯩﺶ ﻫﻪﻗﻘﯩﺪﻩ ﺗﯜﺭﻟﯜﻙ ﻣﯘﻧﺎﺯﯨﺮﯨﻠﻪﺭ ﺩﺍﯞﺍﻣﻼﺷﻤﺎﻗﺘﺎ . ﻧﯘﺭﻏﯘﻥ ﻛﯩﺸﯩﻠﻪﺭ ﺗﯩﻨﭽﻠﯩﻖ ﺑﯩﻠﻪﻥ ﺋﯧﻠﯩﭗ ﺑﯧﺮﯨﻠﻐﺎﻥ ﺑﯘ ﻧﺎﻣﺎﻳﯩﺸﻨﯩﯔ ﻫﯚﻛﯜﻣﻪﺗﻨﯩﯔ ﺋﯚﺯ ﻗﻮﻟﻰ ﺑﯩﻠﻪﻥ ﺧﺎﺭﺍﻛﺘﯧﺮﯨﻨﻰ ﺋﯚﺯﮔﻪﺭﺗﯩﭗ، ﺑﯘﻧﻰ ﻧﺎﻣﺎﻳﯩﺸﭽﻰ ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﺩﯨﻐﺎﻥ ﭘﯘﺭﺳﻪﺗﻜﻪ ﺋﺎﻳﻼﻧﺪﯗﺭﻏﺎﻧﻠﯩﻘﯩﻨﻰ ﺩﯦﻴﯩﺸﻤﻪﻛﺘﻪ.

ﺋﯜﺭﯛﻣﭽﯩﺪﯨﻜﻰ ﻣﻪﻟﯘﻡ ﺑﯩﺮ ﺳﺎﻗﭽﯩﺨﺎﻧﯩﺪﺍ ﺋﯩﺸﻠﻪﻳﺪﯨﻐﺎﻥ ﻣﻪﻟﯘﻡ ﺑﯩﺮ ﻗﻮﺭﺍﻟﻠﯩﻖ ﺳﺎﻗﭽﯩﻨﯩﯔ ﻣﻪﺯﻛﯘﺭ ﺭﺍﺩﯨﺌﻮ ﺋﺎﯕﻠﯩﻐﯘﭼﯩﻤﯩﺰﻏﺎ ﺋﯧﻴﺘﯩﭗ ﺑﻪﺭﮔﻪﻧﻠﯩﺮﯨﻤﯘ ﺑﯘﻧﻰ ﺋﯩﺴﭙﺎﺗﻼﭖ ﺗﯘﺭﻣﺎﻗﺘﺎ. ﺑﯘ ﺳﺎﻗﭽﯩﻨﯩﯔ ﺋﯘﻧﯩﯖﻐﺎ ﺋﯧﻴﺘﯩﺸﯩﭽﻪ، ﺋﯘ ﻛﯜﻧﻰ ﺳﺎﻗﭽﻰ ﺩﺍﺋﯩﺮﯨﻠﯩﺮﻯ ﻧﺎﻣﺎﻳﯩﺶ ﺑﻮﻟﯩﺪﯨﻐﺎﻧﻠﯩﻘﯩﺪﯨﻦ ﺋﺎﻟﻠﯩﻘﺎﭼﺎﻥ ﺧﻪﯞﻩﺭ ﺗﺎﭘﻘﺎﻥ ﺑﻮﻟﯘﭖ، ﻫﯚﻛﯜﻣﻪﺕ ﺩﺍﺋﯩﺮﯨﻠﯩﺮﻯ ﯞﻩﻗﻪ ﻛﯜﻧﻰ ﺋﯘﻳﻐﯘﺭ ﺳﺎﻗﭽﯩﻼﺭﻏﺎ ﭘﯘﻗﺮﺍﭼﻪ ﻛﯩﻴﯩﻨﯩﭗ، ﻧﺎﻣﺎﻳﯩﺸﭽﯩﻼﺭﻧﯩﯔ ﻗﺎﺗﺎﺭﯨﻐﺎ ﻛﯩﺮﯨﭗ ﺧﯩﺘﺎﻳﻼﺭﻧﻰ ﺋﯘﺭﯗﭖ ﻗﺎﻻﻳﻤﯩﻘﺎﻧﭽﯩﻠﯩﻖ ﭼﯩﻘﯩﺮﯨﺸﻨﻰ ﺑﯘﻳﺮﯗﻕ ﻗﯩﻠﻐﺎﻥ ﺋﯩﻜﻪﻥ.

ﺑﯘ ﺳﺎﻗﭽﯩﻨﯩﯔ ﺋﯘ ﻛﯩﺸﯩﮕﻪ ﺑﺎﻳﺎﻥ ﻗﯩﻠﯩﭗ ﺑﯧﺮﯨﺸﯩﭽﻪ، ﻛﻪﭼﺘﻪ ﺋﯜﺭﯛﻣﭽﯩﻨﯩﯔ "ﭼﺎﯕﻠﯧﻴﯘﺋﻪﻥ" ﺩﻩﭖ ﺋﺎﺗﯩﻠﯩﺪﯨﻐﺎﻥ ﺭﺍﻳﻮﻧﺪﯨﻜﻰ ﺗﻮﻛﻼﺭ ﭘﯜﺗﯜﻧﻠﻪﻱ ﺋﯚﭼﯜﺭﯛﻟﮕﻪﻧﺪﯨﻦ ﻛﯧﻴﯩﻦ، ﺷﯘ ﻛﯜﻧﻰ ﺋﯚﻟﮕﻪﻥ ﺋﯘﻳﻐﯘﺭﻻﺭﻧﯩﯔ ﺟﻪﺳﯩﺘﻰ ﻛﯚﻳﺪﯛﺭﯛﻟﯜﭖ، ﻛﯚﻣﯜﯞﯦﺘﯩﻠﮕﻪﻥ ﯞﻩ ﺋﻪﺗﺮﺍﭖ ﭘﯜﺗﯜﻧﻠﻪﻱ ﺗﯜﺯﻟﯩﻨﯩﭗ ﻫﯧﭽﻘﺎﻧﺪﺍﻕ ﺋﯩﺰ ﻗﺎﻟﺪﯗﺭﯗﻟﻤﯩﻐﺎﻥ.

ﻳﯘﻗﯩﺮﯨﻘﻰ ﺑﺎﻳﺎﻧﻼﺭ ﭼﻪﺗﺌﻪﻟﺪﻩ ﻳﺎﺷﺎﻳﺪﯨﻐﺎﻥ، ﺋﻪﻣﻤﺎ ﺋﯘﺭﯗﻕ - ﺗﯘﻏﻘﺎﻧﻠﯩﺮﯨﻨﯩﯔ ﺑﯩﺨﻪﺗﻪﺭﻟﯩﻜﻨﻰ ﻧﻪﺯﻩﺭﺩﻩ ﺗﯘﺗﯘﭖ، ﺋﯚﺯﯨﻨﯩﯔ ﺋﯩﺴﻤﯩﻨﻰ ﯞﻩ ﺗﯘﺭﯨﯟﺍﺗﻘﺎﻥ ﺩﯙﻟﯩﺘﯩﻨﻰ ﺋﺎﺷﻜﺎﺭﯨﻼﺷﻨﻰ ﺧﺎﻟﯩﻤﯩﻐﺎﻥ، ﺋﯩﻴﯘﻝ ﺋﺎﻳﻠﯩﺮﯨﺪﺍ ﺋﯜﺭﯛﻣﭽﯩﺪﻩ ﺯﯨﻴﺎﺭﻩﺗﺘﻪ ﺑﻮﻟﻐﺎﻥ ﺑﯩﺮ ﻧﻪﭘﻪﺭ ﺋﯘﻳﻐﯘﺭﻧﯩﯔ 5 - ﯞﻩ 7 - ﺋﯩﻴﯘﻟﺪﯨﻜﻰ ﯞﻩﻗﻪﻟﻪﺭ ﻫﻪﻗﻘﯩﺪﻩ ﺑﯩﯟﺍﺳﯩﺘﻪ ﺋﺎﯕﻠﯩﻐﺎﻧﻠﯩﺮﻯ ﻫﻪﻡ ﺋﯩﮕﯩﻠﯩﮕﻪﻥ ﺋﯘﭼﯘﺭﻟﯩﺮﯨﺪﯨﻦ ﺋﯩﺒﺎﺭﻩﺗﺘﯘﺭ.

ﻳﯘﻗﯩﺮﯨﺪﯨﻜﻰ ﺋﺎﯞﺍﺯ ﺋﯘﻟﯩﻨﯩﺸﯩﺪﯨﻦ، ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﯩﻤﯩﺰﻧﯩﯔ ﺗﻪﭘﺴﯩﻼﺗﯩﻨﻰ ﺋﺎﯕﻼﻳﺴﯩﻠﻪﺭ.