Amérikidiki Uyghur kishilik hoquq programmisi 2016 - yilliq “Dunya axbarat erkinliki küni” munasiwiti bilen bayanat élan qildi

Muxbirimiz qutlan
2016.05.02


Bügün amérikidiki Uyghur kishilik hoquq programmisi 2016 - yilliq “Dunya axbarat erkinliki küni” munasiwiti bilen bayanat élan qildi.

Melumki, her yili 3 - may “Dunya axbarat erkinliki küni” bolup, 1991 - yilidin buyan b d t pen, ma'arip we medeniyet teshkilati teripidin pütün dunya miqyasida xatirilinidighan kün qilip békitilgen.

Uyghur kishilik hoquq programmisining bu yilliq bayanatigha “Erkin we ochuq - ashkara bolghan axbaratchiliq sherqiy türkistandiki Uyghurlarning kishilik hoquq ehwalini yaxshilashta zörür amil süpitide rol oynaydu” dep mawzu qoyulghan.

Mezkur bayanatta Uyghur kishilik hoquq programmisining diréktori alim séytofning sözi neqil keltürülüp mundaq déyilgen: “Xitay hökümitining sherqiy türkistanda yürgüziwatqan derijidin tashqiri axbarat kontrolluqi rayondiki xelqlerning kishilik hoquqining keng kölemde depsende qilinishigha shara'it hazirlap bermekte. Her qétim rayonda Uyghurlargha chétilidighan zor weqeler yüz bergende xitay hökümitining axbaratni qattiq qamal qilishi tüpeyli weqening heqiqiy ich yüzini bilish mumkin bolmaywatidu shundaqla bu heqtiki barliq bayanlar xitay hökümitining paydisigha sherhiliniwatidu.”

Mezkur bayanatta yene 2015 - yili xitayda qolgha élin'ghan 49 zhurnalist ichide 14 nepirining Uyghur ikenliki, “Erkin asiya radiyosi” ning muxbiri shöhret hoshurning 3 qérindishining tutqun qilin'ghanliqi shundaqla ghayip qiliwétilgen oghlini sürüshte qilghan patigül gholamning tutqun qilinip yépiq sotlan'ghanliqidek bir qatar emeliy pakitlar tilgha élin'ghan.

Igilinishiche, b d t pen, ma'arip we medeniyet teshkilatining bu yilliq “Dunya axbarat erkinliki küni” ni xatirilesh chong yighilishi 2 - maydin 4 - mayghiche finlandiye paytexti xélsinkida ötküzülmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.