Uyghur rayon da'iriliri qosh til yesli bashliqlirini “Partiye razi bolidighan qosh til yesli qurush” boyiche terbiyiligen
2017.08.17
Xitay hökümitining Uyghur élida, bolupmu Uyghur élining jenubidiki 3 wilayet, bir oblastta yéza “Qosh tilliq yesli qurulushi” ni omumlashturup bolush üchün nurghun maddiy küch we adem küchi toluqlash bilen bir waqitta yene, qosh til yesli oqutquchilirini siyasiy idiye jehettin terbiyileshkimu oxshash küch serp qiliwatqanliqi melum.
Tengritagh torida bérilgen xewerdin qarighanda, Uyghur rayon da'iriliri shinjang pédagogika uniwérsitétida “2017-Yilliq jenubiy we shimaliy shinjangdiki yesli bashliqlirining qosh yönilishlik wezipe bilen terbiyilinish kursi” namliq bir kurs achqan. Xewerdin qarighanda, bu kursta jenubiy we shimaliy rayonlardiki wezipe bilen chéniqidighan 1020 neper yesli bashliqliri 8-ayning 8-künidin 16-künigiche “Qosh til” ma'aripi siyasitini chüshendürüsh, yesli bashliqliri kesip ölchimi qatarliq mezmunlar boyiche terbiyilen'gen. Emma uningda bu “Wezipe bilen chéniqidighan yesli bashliqliri” ning kimler ikenliki, ularning néme wezipe boyiche chéniqiwatqan kishiler ikenlikige éniq izahat bérilmigen.
Xewerdin qarighanda, kurs axirlashqan küni Uyghur rayonluq partkomning mu'awin sékrétari li péngshin murasimgha qatniship, kursantlardin Uyghur élidiki yeslilerni partiye razi bolidighan yesli qilip qurup chiqishni, dölet tili atiliwatqan xitay tili oqutushini, ishchi-xizmetchilerning idiye-siyaset, istil qurulushini ching tutush arqiliq menggülük muqimliqqa érishishtin ibaret bash nishan'gha yétishni kapaletke ige qilishni telep qilghan we shundaqla aptonom rayonning “Sélishqa tégishlik yeslilerni sélish”, “Kirishke tégishlik balilarni kirgüzüsh”tin ibaret tarixiy xaraktérlik nishani yéqinda ré'alliqqa aylinidu, dep söz qilghan.
Xitay hökümitining bu yildin étibaren Uyghur élining jenubidiki yézilarda köplep yéngi qosh til yeslilirini sélish we oqutquchi seplep, qosh til yeslilirini téz sür'et bilen omumlashturush üchün ghayet zor meblegh we küch serp qilishi chet'ellerdiki Uyghur közetküchilerde guman qozghighan idi. Ular xitay hökümitining Uyghurlarni assimilyatsiye qilish arqiliq muqimliq yaritishtin ibaret nishanni ishqa ashurush üchün pütün küchini Uyghur yesli balilirigha qaritiwatqanliqini bildürmekte.