ﭘﺮﯦﺰﯨﺪﯦﻨﺖ ﺑﯘﺵ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﯞﻩ ﺧﯩﺘﺎﻱ ﺩﯦﻤﻮﻛﺮﺍﺗﻠﯩﺮﯨﻨﻰ ﺋﺎﻗﺴﺎﺭﺍﻳﺪﺍ ﻗﻮﺑﯘﻝ ﻗﯩﻠﯩﭗ ﻛﯚﺭﯛﺷﺘﻰ

‏29 - ﺋﯩﻴﯘﻝ، ﺳﻪﻳﺸﻪﻧﺒﻪ ﻛﯜﻧﻰ، ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺟﻮﺭﺝ ﺑﯘﺵ، ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﯞﻩ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺭﻩﺋﯩﺴﻰ ﺭﺍﺑﯩﻴﻪ ﺧﺎﻧﯩﻢ ﻫﻪﻣﺪﻩ ﯞﯦﻲ ﺟﯧﯖﺸﯩﯔ، ﺧﺎﺭﺭﯨﻲ ﯞﯗ ﻗﺎﺗﺎﺭﻟﯩﻖ ﺑﯩﺮ ﻗﯩﺴﯩﻢ ﺧﯩﺘﺎﻱ ﺩﯦﻤﻮﻛﺮﺍﺗﻠﯩﺮﯨﻨﻰ ﺋﺎﻗﺴﺎﺭﺍﻳﺪﺍ ﻗﻮﺑﯘﻝ ﻗﯩﻠﺪﻯ.
 
ﺋﯘﭼﺮﯨﺸﯩﺸﺘﺎ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺑﯧﻴﺠﯩﯔ ﺋﻮﻟﯩﻤﭙﯩﻚ ﻳﯩﻐﯩﻨﻰ ﻫﺎﺭﭘﯩﺴﯩﺪﺍ ﺋﯘﻳﻐﯘﺭﻻﺭﻏﺎ ﻗﺎﺭﺍﺗﻘﺎﻥ ﺑﺎﺳﺘﯘﺭﯗﺵ ﺳﯩﻴﺎﺳﯩﺘﻰ، ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﻠﯩﺮﻯ ﻫﻪﻗﻘﯩﺪﻩ ﭘﺮﯦﺰﯨﺪﯦﻨﺖ ﺑﻮﺷﻘﺎ ﻣﻪﻟﯘﻣﺎﺕ ﺑﻪﺭﮔﻪﻥ ﻫﻪﻣﺪﻩ ﭘﺮﯦﺰﯨﺪﯦﻨﺖ ﺑﯘﺷﺘﯩﻦ ﺧﯩﺘﺎﻱ ﺩﯙﻟﻪﺕ ﺭﻩﺋﯩﺴﻰ ﺧﯘ ﺟﯩﻨﺘﺎﯞ ﺑﯩﻠﻪﻥ ﻛﯚﺭﯛﺷﻜﻪﻧﺪﻩ، ﺋﯘﻳﻐﯘﺭﻻﺭ ﻣﻪﺳﯩﻠﯩﺴﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﺷﯩﻨﻰ ﺗﻪﻟﻪﭖ ﻗﯩﻠﻐﺎﻥ.

ﺑﯘ، ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺟﯘﺭﺝ ﺑﯘﺵ ﺑﯩﻠﻪﻥ ﺋﯩﻜﻜﯩﻨﭽﻰ ﻗﯧﺘﯩﻤﻠﯩﻖ ﺋﯘﭼﺮﯨﺸﯩﺸﻰ ﺑﻮﻟﯘﭖ، ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺟﻮﺭﺝ ﺑﯘﺵ ﺗﯘﻧﺠﻰ ﻗﯧﺘﯩﻢ 2006‏ - ﻳﯩﻠﻰ ﭼﯧﺦ ﺟﯘﻣﻬﯘﺭﯨﻴﯩﺘﯩﻨﯩﯔ ﭘﺎﻳﺘﻪﺧﺘﻰ ﭘﺮﺍﮔﺎ ﺷﻪﻫﯩﺮﯨﺪﻩ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﻰ ﻗﻮﺑﯘﻝ ﻗﯩﻠﻐﺎﻥ ﺋﯩﺪﻯ.

ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﻰ ﺋﺎﯞﺍﻡ ﭘﺎﻻﺗﺎﺳﻰ ﺗﯩﺒﻪﺕ ﯞﻩ ﺋﯘﻳﻐﯘﺭﻻﺭ ﻫﻪﻗﻘﯩﺪﻩ ﻗﺎﺭﺍﺭ ﻣﺎﻗﯘﻟﻠﯩﺪﻯ

30 - ﺋﯩﻴﯘﻝ، ﺋﺎﻣﯧﺮﯨﻜﺎ ﺋﺎﯞﺍﻡ ﭘﺎﻻﺗﺎﺳﯩﺪﺍ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﯩﮕﻪ ﺧﺎﺗﯩﻤﻪ ﺑﯧﺮﯨﺸﻜﻪ ﻗﯩﺴﺘﺎﻳﺪﯨﻐﺎﻥ ﻗﺎﺭﺍﺭ ﻣﺎﻗﯘﻟﻼﻧﻐﺎﻥ ﺑﻮﻟﯘﭖ، ﻣﻪﺯﻛﯘﺭ ﻗﺎﺭﺍﺭﺩﺍ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﻗﺎﺗﺎﺭﻟﯩﻖ ﻣﯩﻠﻠﻪﺗﻠﻪﺭﮔﻪ ﻗﺎﺭﯨﺘﯩﻠﻐﺎﻥ ﺑﺎﺳﺘﯘﺭﯗﺷﻨﻰ ﺩﻩﺭﻫﺎﻝ ﺗﻮﺧﺘﯩﺘﯩﺸﻰ ﻛﯧﺮﻩﻛﻠﯩﻜﻰ ﺗﻪﻟﻪﭖ ﻗﯩﻠﯩﻨﻐﺎﻥ.

ﻗﺎﺭﺍﺭﺩﺍ ﻣﯘﻧﺪﺍﻕ ﺩﯦﻴﯩﻠﮕﻪﻥ: “ﺑﯧﻴﺠﯩﯔ ﻫﯚﻛﯜﻣﯩﺘﻰ ﺋﯚﺯ ﭘﯘﻗﺮﺍﻟﯩﺮﯨﻐﺎ ﻗﺎﺭﺍﺗﻘﺎﻥ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﻠﯩﺮﯨﻨﻰ ﺩﻩﺭﻫﺎﻝ ﺗﻮﺧﺘﯩﺘﯩﺸﻰ، ﺗﯩﺒﻪﺕ ﯞﻩ ﺋﯘﻳﻐﯘﺭ ﺧﻪﻟﻘﯩﮕﻪ ﻗﺎﺭﺍﺗﻘﺎﻥ ﺑﺎﺳﺘﯘﺭﯗﺷﻨﻰ ﯞﻩ ﺳﯘﺩﺍﻥ ﯞﻩ ﺑﯧﺮﻣﺎ ﻫﯚﻛﯜﻣﻪﺗﻠﯩﺮﯨﻨﻰ ﻗﻮﻟﻼﺷﻨﻰ ﺩﻩﺭﻫﺎﻝ ﺗﻮﺧﺘﯩﺘﯩﺸﻰ ﻛﯧﺮﻩﻙ” ﺩﻩﭖ ﻛﯚﺭﺳﯩﺘﯩﻠﮕﻪﻥ.

30 - ﺋﯩﻴﯘﻝ ﭼﺎﺭﺷﻪﻧﺒﻪ ﻛﯜﻧﻰ ﺋﺎﻣﯧﺮﯨﻜﺎ ﺋﺎﯞﺍﻡ ﭘﺎﻻﺗﺎﺳﯩﺪﺍ ﻣﺎﻗﯘﻟﻼﻧﻐﺎﻥ 1370 - ﻧﻮﻣﯘﺭﻟﯘﻕ ﻗﺎﺭﺍﺭ، 23 - ﺋﯩﻴﯘﻝ ﺋﺎﯞﺍﻡ ﭘﺎﻻﺗﺎ ﺋﻪﺯﺍﺳﻰ ﺧﻮﯞﺍﺭﺩ ﺑﯧﺮﻣﺎﻥ ﺗﻪﺭﯨﭙﯩﺪﯨﻦ ﺗﻮﻧﯘﺷﺘﯘﺭﯗﻟﻐﺎﻥ ﺑﻮﻟﯘﭖ، 30 ‏ - ﺋﯩﻴﯘﻝ ﺋﺎﻣﯧﺮﯨﻜﺎ ﺋﺎﯞﺍﻡ ﭘﺎﻻﺗﺎﺳﯩﺪﺍ ﺋﺎﯞﺍﺯﻏﺎ ﻗﻮﻳﯘﻟﻐﺎﻥ ﻫﻪﻣﺪﻩ 1 - ﮔﻪ ﻗﺎﺭﺷﻰ 419 ﺋﺎﯞﺍﺯ ﺋﯜﺳﺘﯜﻧﻠﯜﻛﻰ ﺑﯩﻠﻪﻥ ﻣﺎﻗﯘﻟﻼﻧﻐﺎﻥ.

ﺗﯜﺭﻛﯩﺴﺘﺎﻥ ﺋﯩﺴﻼﻡ ﭘﺎﺭﺗﯩﻴﯩﺴﯩﻨﯩﯔ ﺑﺎﻳﺎﻧﺎﺗﯩﻨﻰ ﺧﯩﺘﺎﻱ ﺗﻪﺭﻩﭖ ﺭﻩﺕ ﻗﯩﻠﺪﻯ

23 ‏ - ﺋﯩﻴﯘﻝ ﻛﯜﻧﻰ ﺋﯩﻨﺘﯧﺮﻧﯧﺘﺘﯩﻜﻰ ﻳﯘﺗﯘﺏ ﺗﻮﺭﯨﺪﺍ، ﺗﯜﺭﻛﯩﺴﺘﺎﻥ ﺋﯩﺴﻼﻡ ﭘﺎﺭﺗﯩﻴﯩﺴﻰ ﻧﺎﻣﯩﺪﺍ ﺑﯩﺮ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﻨﻐﺎﻥ ﺑﻮﻟﯘﭖ، ﺑﺎﻳﺎﻧﺎﺗﺘﺎ ﻣﻪﺯﻛﯘﺭ ﺗﻪﺷﻜﯩﻼﺗﻨﯩﯔ ﺧﯩﺘﺎﻳﻨﯩﯔ ﺷﺎﯕﺨﻪﻱ ﯞﻩ ﻛﯜﻧﻤﯩﯔ ﺷﻪﻫﻪﺭﻟﯩﺮﯨﺪﻩ ﻳﯜﺯ ﺑﻪﺭﮔﻪﻥ ﺋﺎﭘﺘﻮﺑﯘﺱ ﭘﺎﺭﺗﻼﺷﻨﻰ ﺋﯚﺯ ﺋﯜﺳﺘﯩﮕﻪ ﺋﺎﻟﯩﺪﯨﻐﺎﻧﻠﯩﻘﻰ ﻫﻪﻣﺪﻩ ﺧﯩﺘﺎﻳﻨﯩﯔ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﮕﻪ ﺋﻪﺟﻪﻟﻠﯩﻚ ﺯﻩﺭﺑﻪ ﺑﯧﺮﯨﺪﯨﻐﺎﻧﻠﯩﻘﻰ ﺋﯧﻼﻥ ﻗﯩﻠﻐﺎﻥ ﺋﯩﺪﻯ.

ﺋﻪﻣﻤﺎ، ﻳﯘﻗﯩﺮﯨﻘﻰ ﺑﺎﻳﺎﻧﺎﺗﺘﺎ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ ﭘﯩﻜﯩﺮﻟﻪﺭﻧﻰ، 26 - ﺋﯩﻴﯘﻝ ﺷﻪﻧﺒﻪ ﻛﯜﻧﻰ ﺧﯩﺘﺎﻱ ﺗﻪﺭﻩﭖ ﺋﯩﻨﻜﺎﺭ ﻗﯩﻠﻐﺎﻥ ﺑﻮﻟﺴﺎ، ﺧﯩﺘﺎﻱ ﺩﯙﻟﻪﺕ ﺑﯩﺨﻪﺗﻪﺭﻟﯩﻚ ﻣﯩﻨﯩﺴﺘﯩﺮﻟﯩﻘﻰ ﺑﯘ ﻫﻪﻗﺘﻪ ﺳﻮﺭﺍﻟﻐﺎﻥ ﺳﻮﺋﺎﻟﻼﺭﻏﺎ ﺟﺎﯞﺍﺏ ﺑﯧﺮﯨﺸﻨﻰ ﺭﻩﺕ ﻗﯩﻠﺪﻯ.

 ﺷﺎﯕﺨﻪﻱ ﯞﻩ ﻛﯜﻧﻤﯩﯔ ﺳﺎﻗﭽﻰ ﺋﯩﺪﺍﺭﯨﺴﻰ ﺑﻮﻟﺴﺎ، ﺑﺎﻳﺎﻧﺎﺗﺘﺎ ﺩﯦﻴﯩﻠﮕﻪﻥ ﯞﻩﻗﻪﻟﻪﺭﻧﯩﯔ ﻳﯜﺯ ﺑﻪﺭﮔﻪﻧﻠﯩﻜﯩﻨﻰ ﺋﯧﺘﯩﺮﺍﭖ ﻗﯩﻠﻐﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﺋﯘ ﯞﻩﻗﻪﻟﻪﺭﺩﻩ ﺋﻮﻟﯩﻤﭙﯩﻚ ﻳﺎﻛﻰ ﺗﯧﺮﺭﻭﺭﻟﯘﻗﻘﺎ ﺋﺎﻻﻗﯩﺪﺍﺭ ﭘﺎﻛﯩﺖ ﺑﺎﻳﻘﺎﻟﻤﯩﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ.

ﻛﻪﭼﯜﺭﯛﻡ ﺗﻪﺷﻜﯩﻼﺗﻰ: ﺧﯩﺘﺎﻱ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻜﻪ ﺑﻪﺭﮔﻪﻥ ﯞﻩﺩﯨﻠﯩﺮﯨﻨﻰ ﺳﺎﻗﻠﯩﻤﯩﺪﻯ

ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ 29 - ﺋﯩﻴﯘﻝ ﺋﯧﻼﻥ ﻗﯩﻠﻐﺎﻥ "ﺧﯩﺘﺎﻱ ﺧﻪﻟﻖ ﺟﯘﻣﻬﯘﺭﯨﻴﯩﺘﻰ: ﺋﻮﻟﯩﻤﭙﯩﻚ ﺗﻪﺗﯜﺭ ﺳﺎﻧﯩﻘﻰ - ﯞﺍﭘﺎ ﻗﯩﻠﯩﻨﻤﯩﻐﺎﻥ ﯞﻩﺩﯨﻠﻪﺭ" ﻧﺎﻣﻠﯩﻖ ﺩﻭﻛﻼﺗﺘﺎ، ﺧﯩﺘﺎﻳﻨﯩﯔ 2001 - ﻳﯩﻠﻰ ﻛﯩﺸﯩﻠﯩﻚ ﻫﻮﻗﯘﻕ ﺧﺎﺗﯩﺮﯨﺴﯩﻨﻰ ﻳﺎﺧﺸﯩﻼﺵ ﺗﻮﻏﺮﯨﺴﯩﺪﺍ ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻐﺎ ﯞﻩ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻜﻪ ﺑﻪﺭﮔﻪﻥ ﯞﻩﺩﯨﻠﯩﺮﯨﻨﻰ ﺋﻪﻣﻪﻟﺪﻩ ﻛﯚﺭﺳﯩﺘﯩﺶ ﺩﻩﺭﯨﺠﯩﺴﻰ ﺑﺎﻫﺎﻻﭖ ﭼﯩﻘﯩﻠﻐﺎﻥ ﺑﻮﻟﯘﭖ، ﺩﻭﻛﻼﺗﺘﺎ، ﺧﯩﺘﺎﻳﻨﯩﯔ ﺑﯘ ﺟﻪﻫﻪﺗﻠﻪﺭﺩﻩ ﭘﻪﻗﻪﺕ ﺋﯩﻠﮕﯩﺮﯨﻠﻪﺵ ﻫﺎﺳﯩﻞ ﻗﯩﻠﻤﯩﻐﺎﻧﻠﯩﻘﻰ ﻛﯚﺭﺳﯩﺘﯩﻠﮕﻪﻥ.

 ﺩﻭﻛﻼﺗﺘﺎ ﻣﯘﻧﺪﺍﻕ ﺩﯦﻴﯩﻠﮕﻪﻥ: "ﺋﻪﭘﺴﯘﺳﻜﻰ، 2008 - ﻳﯩﻠﻰ 1 - ﺋﺎﭘﺮﯦﻞ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺋﯧﻼﻥ ﻗﯩﻠﻐﺎﻥ ﺋﻮﻟﯩﻤﭙﯩﻚ ﺗﻪﺗﯜﺭ ﺳﺎﻧﯩﻘﻰ ﻫﻪﻗﻘﯩﺪﯨﻜﻰ ﺩﻭﻛﻼﺗﺘﯩﻦ ﻛﯧﻴﯩﻦ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺑﻪﺭﮔﻪﻥ ﯞﻩﺩﯨﻠﯩﺮﯨﻨﯩﯔ ﺋﻪﻣﻪﻟﮕﻪ ﺋﯧﺸﯩﺸﻰ ﺟﻪﻫﻪﺗﺘﻪ ﻫﯧﭽﻘﺎﻧﺪﺍﻕ ﺋﯩﻠﮕﯩﺮﯨﻠﻪﺵ ﺑﻮﻟﻤﯩﺪﻯ. ﭘﻪﻗﻪﺕ ﺋﯩﺰﭼﯩﻞ ﺗﯜﺭﮔﻪ ﺗﯘﺗﻘﯘﻥ ﻗﯩﻠﯩﺶ ﺳﺎﺩﯨﺮ ﺑﻮﻟﯘﭖ ﺗﯘﺭﺩﻯ."

ﺩﻭﻛﻼﺗﺘﺎ ﻫﺎﺯﯨﺮ ﺧﯩﺘﺎﻱ ﺗﯜﺭﻣﯩﺴﯩﮕﻪ ﻗﺎﻣﺎﻟﻐﺎﻥ ﺑﺎﺭﻟﯩﻖ ﯞﯨﺠﺪﺍﻥ ﻣﻪﻫﺒﯘﺳﻠﯩﺮﯨﻨﻰ ﻗﻮﻳﯘﯞﯦﺘﯩﺶ، ﺳﺎﻗﭽﯩﻼﺭﻧﯩﯔ ﺩﻩﯞﺍﮔﻪﺭﻟﻪﺭﻧﻰ، ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﻠﯩﺮﯨﻨﻰ، ﺋﻮﻟﯩﻤﭙﯩﻚ ﺋﯘﭼﯘﻥ ﺗﺎﺯﯨﻼﺵ ﻫﻪﺭﯨﻜﯩﺘﻰ ﺳﯜﭘﯩﺘﯩﺪﻩ ﺋﯚﺯ ﻣﻪﻳﻠﯩﭽﻪ ﺗﯘﺗﻘﯘﻥ ﻗﯩﻠﯩﺸﯩﺪﯨﻦ ﺗﻮﺳﯘﺵ، ﺋﯚﻟﯜﻡ ﺟﺎﺯﺍﺳﻰ ﺑﯧﺮﯨﻠﮕﻪﻧﻠﻪﺭﻧﯩﯔ ﺗﻮﻟﯘﻕ ﺭﻭﻳﺨﯧﺘﯩﻨﻰ ﺋﯧﻼﻥ ﻗﯩﻠﯩﺶ، ﺧﯩﺘﺎﻱ ﯞﻩ ﺧﻪﻟﻘﺌﺎﺭﺍ ﻣﯘﺧﺒﯩﺮﻻﺭﻏﺎ ﺋﻪﺭﻛﯩﻦ ﺧﻪﯞﻩﺭ ﺑﯧﺮﯨﺶ ﻣﯘﻫﯩﺘﻰ ﻳﺎﺭﯨﺘﯩﺶ ﻗﺎﺗﺎﺭﻟﯩﻖ ﺗﻪﻛﻠﯩﭙﻠﻪﺭ ﺑﯧﺮﯨﻠﮕﻪﻥ.

ﺋﺎﻣﯧﺮﯨﻜﯩﺪﺍ "ﺋﻮﻟﯩﻤﭙﯩﻜﺘﯩﻦ 9 ﻛﯜﻥ ﺑﯘﺭﯗﻥ" ﻧﺎﻣﻠﯩﻖ ﺋﺎﺧﺒﺎﺭﺍﺕ ﺋﯧﻼﻥ ﻗﯩﻠﯩﺶ ﻳﯩﻐﯩﻨﻰ ﺋﯚﺗﻜﯜﺯﯛﻟﺪﻯ

30 ‏ - ﺋﯩﻴﯘﻝ ﭼﺎﺭﺷﻪﻧﺒﻪ ﻛﯜﻧﻰ ﺋﺎﻣﯧﺮﯨﻜﯩﻨﯩﯔ ﺧﻪﻟﻘﺌﺎﺭﺍﻟﯩﻖ ﺩﯨﻨﯩﻲ ﺋﻪﺭﻛﯩﻨﻠﯩﻚ ﻛﻮﻣﯩﺘﯧﺘﻰ، "ﺋﻮﻟﯩﻤﭙﯩﻜﺘﯩﻦ 9 ﻛﯜﻥ ﺑﯘﺭﯗﻥ" ﻧﺎﻣﯩﺪﺍ ﺋﺎﺧﺒﺎﺭﺍﺕ ﺋﯧﻼﻥ ﻗﯩﻠﯩﺶ ﻳﯩﻐﯩﻨﻰ ﺋﯚﺗﻜﯜﺯﺩﻯ. ﻳﯩﻐﯩﻨﺪﺍ ﺋﺎﻣﯧﺮﯨﻜﯩﻨﯩﯔ ﺋﯩﻨﺴﺎﻥ ﻫﻪﻗﻠﯩﺮﻯ ﺧﯩﺰﻣﯩﺘﯩﮕﻪ ﻣﻪﺳﺌﯘﻝ ﭘﺎﻻﺗﺎ ﺋﻪﺯﺍﻟﯩﺮﻯ ﯞﻩ ﺋﺎﻣﯧﺮﯨﻜﯩﺪﺍ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺋﯩﻨﺴﺎﻥ ﻫﻪﻗﻠﯩﺮﻯ ﭘﺎﺋﺎﻟﯩﻴﻪﺗﭽﯩﻠﯩﺮﻯ ﻗﺎﺗﻨﺎﺷﺘﻰ.

 ﻳﯩﻐﯩﻨﺪﺍ، ﺗﯩﺒﻪﺕ، ﺋﯘﻳﻐﯘﺭ ﯞﻩ ﻓﺎﻟﯘﻧﮕﯘﯓ ﻣﯘﺭﯨﺘﻠﯩﺮﯨﻨﯩﯔ ﺋﯩﺰﭼﯩﻞ ﺯﻩﺭﺑﯩﮕﻪ ﺋﯘﭼﺮﺍﭖ ﻛﯧﻠﯩﯟﺍﺗﻘﺎﻧﻠﯩﻘﻰ ﺗﻪﻛﯩﺘﻠﯩﻨﯩﭗ، ﺧﯩﺘﺎﻱ ﻫﯚﻛﯜﻣﯩﺘﻰ، ﺋﯩﻨﺴﺎﻥ ﻫﻪﻗﻠﯩﺮﻯ ﻣﻪﺳﯩﻠﯩﺴﯩﺪﻩ ﻳﻪﻧﻪ ﺑﯩﺮ ﻗﯧﺘﯩﻢ ﺋﺎﮔﺎﻫﻼﻧﺪﯗﺭﯗﻟﺪﻯ.

ﻳﯩﻐﯩﻨﺪﺍ ﺋﺎﻣﯧﺮﯨﻜﺎ ﭘﺎﻻﺗﺎ ﺋﻪﺯﺍﻟﯩﺮﯨﺪﯨﻦ ﻛﺮﯨﺴﺘﻮﭘﻔﯧﺮ ﺳﻤﯩﺲ، ﺷﯧﻼ ﺟﯧﻜﺴﻮﻥ ﻟﯥ ﺧﺎﻧﯩﻤﻼﺭ ﺳﯚﺯ ﻗﯩﻠﺪﻯ. ﻛﺮﯨﺴﺘﻮﭘﻬﯧﺮ ﺳﻤﯩﺲ ﻣﯘﻧﺪﺍﻕ ﺩﯦﺪﻯ: "ﺧﯩﺘﺎﻱ ﺋﻮﻟﯩﻤﭙﯩﻚ ﯞﻩﺩﯨﺴﯩﺪﻩ ﺗﯘﺭﻣﯩﺪﻯ. ﺋﻮﻟﯩﻤﭙﯩﻜﺎ 9 ﻛﯜﻥ ﻗﺎﻟﻐﺎﻥ ﻣﯘﺷﯘ ﻛﯜﻧﻠﻪﺭﺩﯨﻤﯘ، ﺗﯩﺒﻪﺗﻠﯩﻚ ﺭﺍﻫﯩﺒﻼﺭ، ﺋﯘﻳﻐﯘﺭ ﻣﯘﺳﯘﻟﻤﺎﻧﻼﺭ، ﻓﺎﻟﯘﻧﮕﯘﯓ ﯞﻩ ﺧﺮﯨﺴﺘﯩﺌﺎﻥ ﻣﯘﺭﯨﺘﻠﯩﺮﻯ ﻳﻪﻧﯩﻼ ﺯﯗﻟﯘﻡ ﭼﯧﻜﯩﯟﺍﺗﯩﺪﯗ. ﺯﯗﻟﯘﻡ ﺑﺎﺷﻘﺎ ﺳﻪﯞﻩﺑﺘﯩﻦ ﺋﻪﻣﻪﺱ، ﭘﻪﻗﻪﺗﻼ ﺋﻮﻟﯩﻤﭙﯩﻚ ﺳﻪﯞﻩﺑﯩﺪﯨﻦ ﺳﯧﻠﯩﻨﻤﺎﻗﺘﺎ."

ﺑﯘ ﻳﯩﻐﯩﻨﻐﺎ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ، ﺧﯩﺘﺎﻱ ﺩﯦﻤﻮﻛﯩﺮﺍﺗﭽﯩﻠﯩﺮﯨﺪﯨﻦ ﻳﺎﯓ ﺟﻴﻪﻧﻠﻰ ﻗﺎﺗﺎﺭﻟﯩﻖ ﺑﯩﺮ ﺗﯜﺭﻛﯜﻡ ﺧﯩﺘﺎﻳﻐﺎ ﻗﺎﺭﺷﻰ ﺋﯚﻛﺘﯩﭽﻰ ﺭﻩﻫﺒﻪﺭﻟﻪﺭ ﻗﺎﺗﻨﺎﺷﺘﻰ ﯞﻩ ﻳﯩﻐﯩﻨﺪﺍ ﺳﯚﺯ ﻗﯩﻠﺪﻯ.

ﺩﺍﺋﯩﺮﯨﻠﯩﺮﻯ ﻳﯧﻘﯩﻨﺪﺍ ﺋﯜﺭﯛﻣﭽﯩﺪﻩ ﺑﯩﺨﻪﺗﻪﺭﻟﯩﻚ ﺗﻪﻛﺸﯜﺭﯛﺷﻨﻰ ﻛﯜﭼﻪﻳﺘﻜﻪﻥ

ﻳﻪﺭﻟﯩﻚ ﻫﯚﻛﯜﻣﻪﺕ ﺩﺍﺋﯩﺮﯨﻠﯩﺮﻯ ﻳﯧﻘﯩﻨﺪﺍ ﺋﯜﺭﯛﻣﭽﻰ ﺷﻪﻫﻪﺭ ﺋﯩﭽﯩﺪﯨﻜﻰ ﺑﺎﺭﻟﯩﻖ ﺋﺎﻣﻤﯩﯟﻯ ﺋﺎﭘﺘﻮﺑﯘﺱ ﻟﯩﻨﯩﻴﯩﻠﯩﺮﯨﺪﻩ ﺑﯩﺨﻪﺗﻪﺭﻟﯩﻚ ﺗﻪﻛﺸﯜﺭﯛﺷﻨﻰ ﻛﯜﭼﻪﻳﺘﻜﻪﻥ ﺑﻮﻟﯘﭖ، ﻣﯘﺧﺒﯩﺮﯨﻤﯩﺰﻧﯩﯔ ﻳﻪﺭﻟﯩﻚ ﺋﻮﺭﯗﻧﻼﺭﺩﯨﻦ ﺋﯩﮕﯩﻠﯩﺸﯩﭽﻪ، ﺋﯜﺭﯛﻣﭽﯩﺪﯨﻜﻰ ﻫﻪﺭ ﺑﯩﺮ ﺋﺎﭘﺘﻮﺑﯘﺱ ﻫﻪﻡ ﺋﺎﭘﺘﻮﺑﯘﺱ ﺑﯧﻜﻪﺗﻠﯩﺮﯨﮕﻪ ﻣﻪﺧﺴﯘﺱ ﺗﻪﻛﺸﯜﺭﮔﯜﭼﻰ ﺧﺎﺩﯨﻤﻼﺭ ﻗﻮﻳﯘﻟﻐﺎﻥ، ﺋﯘﻻﺭ ﻫﻪﺗﺘﺎ ﻫﻪﺭ ﺑﯩﺮ ﺑﯧﻜﻪﺗﺘﻪ ﺋﺎﭘﺘﻮﺑﯘﺳﻘﺎ ﭼﯩﻘﻘﺎﻥ ﻳﻮﻟﯘﭼﯩﻼﺭﻧﯩﯔ ﺳﻮﻣﻜﯩﻠﯩﺮﯨﻨﻰ ﺋﯧﭽﯩﭗ ﺗﻪﻛﺸﯜﺭﻣﻪﻛﺘﻪ ﺋﯩﻜﻪﻥ.

ﺋﺎﺷﻜﺎﺭﯨﻠﯩﺸﯩﭽﻪ، ﺑﯘ ﺧﯩﻞ ﺗﻪﻛﺸﯜﺭﯛﺵ ﺋﯘﺳﯘﻟﻰ ﺷﻪﻫﻪﺭ ﺋﺎﻫﺎﻟﯩﺴﯩﻨﯩﯔ ﻧﻮﺭﻣﺎﻝ ﺗﯘﺭﻣﯘﺵ ﺗﻪﺭﺗﯩﭙﯩﮕﻪ ﻧﯘﺭﻏﯘﻥ ﻗﯘﻻﻳﺴﯩﺰﻟﯩﻘﻼﺭﻧﻰ ﺗﯘﻏﺪﯗﺭﻏﺎﻥ ﺑﻮﻟﯘﭖ، ﻧﻪﺗﯩﺠﯩﺪﻩ ﺗﻪﻛﺸﯜﺭﮔﯜﭼﻰ ﺧﺎﺩﯨﻤﻼﺭ ﺑﯩﻠﻪﻥ ﻳﻮﻟﯘﭼﯩﻼﺭ ﺋﺎﺭﯨﺴﯩﺪﺍ ﺟﯧﺪﻩﻝ - ﻣﺎﺟﺮﺍﻻﺭﻣﯘ ﻛﯧﻠﯩﭗ ﭼﯩﻘﻘﺎﻥ.

ﺋﯘﻧﯩﯖﺪﯨﻦ ﺑﺎﺷﻘﺎ ﺋﯘﻳﻐﯘﺭ ﺋﯩﻠﯩﺪﯨﻜﻰ ﺧﯩﺘﺎﻱ ﺋﺎﺧﺒﺎﺭﺍﺕ ﯞﺍﺳﺘﯩﻠﯩﺮﯨﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﻳﻪﺭﻟﯩﻚ ﻫﯚﻛﯜﻣﻪﺕ ﺩﺍﺋﯩﺮﯨﻠﯩﺮﻯ ﺋﯜﺭﯛﻣﭽﻰ ﺷﻪﻫﯩﺮﯨﺪﯨﻜﻰ ﺑﺎﺭﻟﯩﻖ ﺋﺎﻣﻤﯩﯟﻯ ﻛﯚﯕﯜﻝ ﺋﯧﭽﯩﺶ ﺳﻮﺭﯗﻧﻠﯩﺮﯨﺪﺍ ﻗﺎﺗﺘﯩﻖ ﺗﻪﻛﺸﯜﺭﯛﺵ ﺋﯧﻠﯩﭗ ﺑﯧﺮﯨﺸﻨﻰ ﻳﻮﻟﻐﺎ ﻗﻮﻳﻐﺎﻥ ﺑﻮﻟﯘﭖ، ﺑﯘ ﺋﻮﺭﯗﻧﻼﺭﻏﺎ ﻛﯩﺮﮔﯜﭼﯩﻠﻪﺭﻧﯩﯔ ﺳﻮﻣﻜﺎ ﯞﻩ ﻳﺎﻧﭽﯘﻗﻠﯩﺮﻯ ﺗﻮﻟﯘﻕ ﺗﻪﻛﺸﯜﺭﯛﻟﯩﺪﯨﻜﻪﻥ.

ﺑﯘﻧﯩﯔ ﺋﺎﻟﺪﯨﺪﺍ ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﺋﯘﻳﻐﯘﺭ ﺋﯧﻠﯩﺪﯨﻜﻰ 13 ﺋﺎﺳﺎﺳﻠﯩﻖ ﺋﺎﻳﺮﻭﺩﺭﻭﻣﻼﺭﺩﺍ ﺑﯩﺨﻪﺗﻪﺭﻟﯩﻚ ﺗﻪﻛﺸﯜﺭﯛﺷﯩﻨﻰ ﻛﯜﭼﻪﻳﺘﻜﻪﻥ ﺋﯩﺪﻯ. ﺩﺍﺋﯩﺮﯨﻠﻪﺭ ﺑﯘﻧﻰ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﯩﯔ ﺑﯩﺨﻪﺗﻪﺭ ﺋﯚﺗﯜﺷﻰ ﺋﯜﭼﯜﻥ ﺋﯧﻠﯩﻨﻐﺎﻥ ﺗﻪﺩﺑﯩﺮ ﺩﻩﭖ ﭼﯜﺷﻪﻧﺪﯛﺭﻣﻪﻛﺘﻪ.