ﻫﻪﭘﺘﯩﻠﯩﻚ ﺧﻪﯞﻩﺭﻟﻪﺭ (16 - ﺋﺎﯞﻏﯘﺳﺘﺘﯩﻦ 22 - ﺋﺎﯞﻏﯘﺳﺘﻘﯩﭽﻪ)

 ﯞﺍﺷﯩﻨﮕﺘﻮﻧﺪﯨﻜﻰ ﻣﯩﺮﺍﺱ ﻓﻮﻧﺪﯨﺪﺍ ﺋﯘﻳﻐﯘﺭﻻﺭ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﻣﯘﻫﺎﻛﯩﻤﻪ ﻳﯩﻐﯩﻨﻰ ﺋﯚﺗﻜﯜﺯﯛﻟﺪﻯ

21 - ﺋﺎﯞﻏﯘﺳﺖ ﻛﯜﻧﻰ ﺋﺎﻣﯧﺮﯨﻜﺎ ﭘﺎﻳﺘﻪﺧﺘﻰ ﯞﺍﺷﯩﻨﮕﺘﻮﻥ ﺷﻪﻫﯩﺮﯨﺪﯨﻜﻰ ﻣﯩﺮﺍﺱ ﻓﻮﻧﺪﻯ ﺟﻪﻣﺌﯩﻴﯩﺘﻰ ﺋﯘﻳﻐﯘﺭﻻﺭﻧﯩﯔ ﻧﯚﯞﻩﺗﺘﯩﻜﻰ ﯞﻩﺯﯨﻴﯩﺘﻰ ﻫﻪﻗﻘﯩﺪﻩ ﺑﯩﺮ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﻰ ﺋﯚﺗﻜﯜﺯﮔﻪﻥ ﺑﻮﻟﯘﭖ، ﻳﯩﻐﯩﻨﻨﻰ ﻣﻪﺯﻛﯘﺭ ﻓﻮﻧﺪﻯ ﺟﻪﻣﺌﯩﻴﻪﺕ ﺋﺎﺳﯩﻴﺎ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﻨﯩﯔ ﺑﺎﺷﻼﻣﭽﻰ ﺗﻪﺗﻘﯩﻘﺎﺗﭽﯩﺴﻰ ﺟﻮﻥ ﺳﺎﻛﻰ ﺗﻪﺷﻜﯩﻠﻠﯩﮕﻪﻥ.

ﻳﯩﻐﯩﻨﺪﺍ ﺟﻮﺭﺝ ﺗﺎﯞﻥ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﺗﺎﺭﯨﺨﻰ ﭘﺮﻭﻓﯧﺴﺴﻮﺭﻯ ﺟﻪﺋﯩﻤﺲ ﻣﯩﻠﻠﯩﯟﺍﺭﺩ، ﺟﻮﺭﺝ ﯞﺍﺷﯩﻨﮕﺘﻮﻥ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﺳﯩﻴﺎﺳﻪﺗﺸﯘﻧﺎﺳﻠﯩﻖ ﭘﻪﻧﻠﯩﺮﻯ ﭘﺮﻭﻓﻪﺳﺴﻮﺭﻯ ﺷﻮﻥ ﺭﻭﺑﯧﺮﺕ، ﺋﺎﻣﯧﺮﯨﻜﺎ ﺋﯘﻳﻐﯘﺭﻟﯩﺮﻯ ﺑﯩﺮﻟﻪﺷﻤﯩﺴﯩﻨﯩﯔ ﺳﺎﺑﯩﻖ ﺭﻩﺋﯩﺴﻰ ﻧﯘﺭﻯ ﺗﯜﺭﻛﻪﻝ ﻫﻪﻡ ﺋﯩﻨﺘﯧﻞ ﻣﻪﺭﻛﯩﺰﯨﻨﯩﯔ ﺧﺎﺩﯨﻤﻰ ﺑﯧﻦ ﻗﺎﺗﺎﺭﻟﯩﻖ ﺋﻪﺭﺑﺎﺑﻼﺭ ﺳﯚﺯ ﻗﯩﻠﯩﭗ، ﺋﯘﻳﻐﯘﺭﻻﺭ ﻣﻪﺳﯩﻠﯩﺴﻰ ﺟﯜﻣﻠﯩﺪﯨﻦ ﻳﯧﻘﯩﻨﺪﯨﻦ ﺑﯘﻳﺎﻥ ﺋﯘﻳﻐﯘﺭ ﺋﯧﻠﯩﺪﺍ ﻳﯜﺯ ﺑﻪﺭﮔﻪﻥ ﺑﯩﺮ ﻗﺎﺗﺎﺭ ﯞﻩﻗﻪﻟﻪﺭﻧﯩﯔ ﺳﻪﯞﻩﺑﻠﯩﺮﻯ ﻫﻪﻗﻘﯩﺪﻩ ﺋﻪﺗﺮﺍﭘﻠﯩﻖ ﺗﻮﺧﺘﺎﻟﺪﻯ.

ﻳﯩﻐﯩﻨﺪﺍ ﻣﯘﺗﻪﺧﻪﺳﺴﯩﺴﻠﻪﺭ ﺑﯩﺮﺩﻩﻙ ﻫﺎﻟﺪﺍ ﺋﯘﻳﻐﯘﺭ ﺩﯨﻴﺎﺭﯨﺪﺍ ﻳﯜﺯ ﺑﻪﺭﮔﻪﻥ ﯞﻩﻗﻪﻟﻪﺭﻧﯩﯔ ﻛﯧﻠﯩﭗ ﭼﯩﻘﯩﺸﯩﺪﺍ ﺋﯘﺯﯗﻥ ﻣﻪﺯﮔﯩﻠﻠﯩﻚ ﻗﺎﺗﺘﯩﻖ ﺑﺎﺷﻘﯘﺭﯗﺵ ﺳﯩﻴﺎﺳﯩﺘﻰ ﺳﻪﯞﻩﺏ ﺑﻮﻟﻐﺎﻧﻠﯩﻘﻰ ﻣﯘﺋﻪﻳﻴﻪﻧﻠﻪﺷﺘﯜﺭﺩﻯ.

ﻣﯩﺮﺍﺱ ﻓﻮﻧﺪﻯ ﺋﺎﻣﯧﺮﯨﻜﯩﺪﯨﻜﻰ ﻣﯘﻫﯩﻢ ﺋﺎﻗﯩﻠﻼﺭ ﻣﻪﺭﻛﯩﺰﻯ ﺑﻮﻟﯘﭖ، ﺋﺎﻣﯧﺮﯨﻜﺎ ﯞﻩ ﺩﯗﻧﻴﺎ ﯞﻩﺯﯨﻴﯩﺘﯩﻨﻰ ﺗﻪﺗﻘﯩﻖ ﻗﯩﻠﯩﺸﺘﺎ ﺋﺎﻟﺪﯨﻨﻘﻰ ﺋﻮﺭﯗﻧﻼﺭﻧﻰ ﺋﯩﮕﯩﻠﯩﮕﻪﻥ.

ﻗﻪﺷﻘﻪﺭﺩﻩ 100 ﺩﯨﻦ ﺋﺎﺭﺗﯘﻕ ﺋﯘﻳﻐﯘﺭ ﻗﻮﻟﻐﺎ ﺋﯧﻠﯩﻨﺪﻯ

ﭼﻪﺗﺌﻪﻟﻠﻪﺭﺩﯨﻜﻰ ﺋﯘﻳﻐﯘﺭ ﺗﻪﺷﻜﯩﻼﺗﻠﯩﺮﻯ ﻗﻪﺷﻘﻪﺭﺩﻩ 4 - ﺋﺎﯞﻏﯘﺳﺖ ﯞﻩﻗﻪﺳﯩﮕﻪ ﻣﯘﻧﺎﺳﯩﯟﻩﺗﻠﯩﻚ ﺩﻩﭖ ﻗﺎﺭﯨﻠﯩﭗ، 100 ﺩﯨﻦ ﺋﺎﺭﺗﯘﻕ ﺋﺎﺩﻩﻣﻨﯩﯔ ﻗﻮﻟﻐﺎ ﺋﯧﻠﯩﻨﻐﺎﻧﻠﯩﻘﯩﺪﯨﻦ ﻣﻪﻟﯘﻣﺎﺕ ﺑﻪﺭﺩﻯ. ﺑﯘ ﺋﯘﭼﯘﺭﻧﻰ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺑﺎﻳﺎﻧﺎﺗﭽﯩﺴﻰ ﺩﯨﻠﺸﺎﺕ ﺭﯦﺸﯩﺖ ﮔﯧﺮﻣﺎﻧﯩﻴﻪ ﺋﺎﺧﺒﺎﺭﺍﺕ ﺋﺎﮔﯧﻨﺘﻠﯩﻘﯩﻐﺎ ﻣﻪﻟﯘﻡ ﻗﯩﻠﻐﺎﻥ.

ﺋﯩﮕﯩﻠﯩﻨﯩﺸﯩﭽﻪ، 4 - ﺋﺎﯞﻏﯘﺳﺖ ﻗﻪﺷﻘﻪﺭﺩﻩ ﺋﯩﻜﻜﻰ ﺋﯘﻳﻐﯘﺭ ﺑﯩﺮ ﺳﺎﻗﭽﻰ ﺋﻪﺗﺮﯨﺘﯩﮕﻪ ﻫﯘﺟﯘﻡ ﻗﯩﻠﯩﭗ، 16 ﺋﺎﺩﻩﻣﻨﻰ ﺋﯚﻟﺘﯜﺭﯛﭖ، 16 ﺋﺎﺩﻩﻣﻨﻰ ﻳﺎﺭﯨﺪﺍﺭ ﻗﯩﻠﻐﺎﻧﺪﯨﻦ ﻛﯧﻴﯩﻦ، ﻗﻮﻟﻐﺎ ﭼﯜﺷﯜﭖ ﻗﺎﻟﻐﺎﻥ، ﺋﯘﻧﯩﯔ ﺋﺎﺭﻗﯩﺴﯩﺪﯨﻦ ﻛﯘﭼﺎﺩﺍ ﯞﻩ ﻗﻪﺷﻘﻪﺭ ﻳﯧﯖﻰ ﺷﻪﻫﻪﺭﻧﯩﯔ ﻳﺎﻣﺎﻧﻴﺎﺭ ﻳﯧﺰﯨﺴﯩﺪﺍ ﻳﻪﻧﻪ ﺑﯩﺮ ﻗﺎﺗﺎﺭ ﯞﻩﻗﻪﻟﻪﺭ ﻳﯜﺯ ﺑﻪﺭﮔﻪﻥ ﺋﯩﺪﻯ.

ﻳﯧﻘﯩﻨﺪﺍ ﺋﺎﭘﺘﻮﻧﻮﻡ ﺭﺍﻳﻮﻥ ﭘﺎﺭﺗﻜﻮﻡ ﺳﯧﻜﺮﯨﺘﺎﺭﻯ ﯞﺍﯓ ﻟﯧﭽﯜﺋﻪﻥ ﺋﯜﺭﯛﻣﭽﯩﺪﻩ ﺋﯚﺗﻜﯜﺯﯛﻟﮕﻪﻥ ﻛﺎﺩﯨﺮﻻﺭ ﻳﯩﻐﯩﻨﯩﺪﺍ "ﺋﯜﭺ ﺧﯩﻞ ﻛﯜﭺ"ﻟﻪﺭﮔﻪ ﻗﺎﺗﺘﯩﻖ ﺯﻩﺭﺑﻪ ﺑﯧﺮﯨﺸﻨﯩﯔ ﻫﺎﻳﺎﺕ ﻣﺎﻣﺎﺗﻠﯩﻖ ﻛﯜﺭﻩﺵ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﮕﻪﻥ.

ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺷﯩﯟﯦﺘﺴﺎﺭﯨﻴﯩﺪﯨﻦ ﮔﯘﺋﺎﻧﺘﺎﻧﺎﻣﻮﺩﯨﻜﻰ ﺋﯜﭺ ﺋﺎﺩﻩﻣﻨﻰ ﻗﻮﺑﯘﻝ ﻗﯩﻠﯩﺸﻨﻰ ﺗﻪﻟﻪﭖ ﻗﯩﻠﺪﻯ

ﺋﯚﺗﻜﻪﻥ ﭘﻪﻳﺸﻪﻧﺒﻪ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺷﯟﯦﺘﺴﺎﺭﯨﻴﻪ ﻫﯚﻛﯜﻣﯩﺘﯩﺪﯨﻦ ﮔﯘﺋﺎﻧﺘﺎﻧﺎﻣﻮﺩﺍ ﺗﯘﺗﯘﭖ ﺗﯘﺭﯨﻠﯩﯟﺍﺗﻘﺎﻥ ﻣﻪﻫﺒﯘﺳﻼﺭﺩﯨﻦ ﺋﯜﭺ ﺋﺎﺩﻩﻣﻨﻰ ﻗﻮﺑﯘﻝ ﻗﯩﻠﯩﭗ، ﭘﺎﻧﺎﻫﻠﯩﻖ ﺑﯧﺮﯨﺸﻨﻰ ﺗﻪﻟﻪﭖ ﻗﯩﻠﻐﺎﻥ ﺋﯩﺪﻯ.

ﺷﯟﯦﺘﺴﺎﺭﯨﻴﻪ ﺩﺍﺋﯩﺮﯨﻠﯩﺮﯨﻤﯘ ﻣﻪﺯﻛﯘﺭ ﺋﯜﭺ ﺋﺎﺩﻩﻣﻨﯩﯔ ﺋﯩﻠﺘﯩﻤﺎﺳﯩﻨﻰ ﺗﺎﭘﺸﯘﺭﯨﯟﺍﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺑﻮﻟﯘﭖ، ﺑﯘﻻﺭﻧﯩﯔ ﺋﯩﭽﯩﺪﻩ ﺑﯩﺮ ﻧﻪﭘﻪﺭ ﺋﯘﻳﻐﯘﺭ ﺑﺎﺭ.

ﻧﯚﯞﻩﺗﺘﻪ، ﮔﯘﺋﺎﻧﺘﺎﻧﺎﻣﻮﺩﺍ 17 ﻧﻪﭘﻪﺭ ﺋﯘﻳﻐﯘﺭ ﻣﻪﻫﺒﯘﺱ ﺑﺎﺭ ﺑﻮﻟﯘﭖ، ﺋﯘﻻﺭﻧﯩﯔ ﻗﻮﻳﯘﭖ ﺑﯧﺮﯨﻠﯩﺸﻰ ﯞﻩ ﺑﺎﺷﻘﺎ ﺑﯩﺮﻩﺭ ﺩﯙﻟﻪﺗﻜﻪ ﺋﻮﺭﯗﻧﻼﺷﺘﯘﺭﯗﻟﯘﺵ ﻣﻪﺳﯩﻠﯩﺴﻰ ﺩﺍﯞﺍﻣﻠﯩﻖ ﻣﯘﺯﺍﻛﯩﺮﻩ ﻗﯩﻠﯩﻨﻤﺎﻗﺘﺎ.

ﭘﺎﻛﯩﺴﺘﺎﻥ ﭘﺮﯦﺰﯨﺪﯦﻨﺘﻰ ﻣﯘﺷﻪﺭﺭﻩﭖ ﯞﻩﺯﯨﭙﯩﺴﯩﺪﯨﻦ ﺋﯩﺴﺘﯩﭙﺎ ﺑﻪﺭﺩﻯ

ﺑﯘ ﻫﻪﭘﺘﯩﺪﻩ ﭘﺎﻛﯩﺴﺘﺎﻥ ﭘﺮﯦﺰﯨﺪﯦﻨﺘﻰ ﭘﻪﺭﯞﯨﺰ ﻣﯘﺷﻪﺭﺭﻩﭖ ﺋﯚﻛﺘﯩﭽﯩﻠﻪﺭﻧﯩﯔ ﺑﯧﺴﯩﻤﻰ ﺋﺎﺳﺘﯩﺪﺍ ﭘﺮﯦﺰﯨﺪﯦﻨﺘﻰ ﯞﻩﺯﯨﭙﯩﺴﯩﺪﯨﻦ ﺋﯩﺴﺘﯩﭙﺎ ﺑﻪﺭﺩﻯ. ﺑﯘ ﯞﻩﻗﻪ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻨﯩﯔ ﺩﯨﻘﻘﯩﺘﯩﻨﻰ ﻗﻮﺯﻏﯩﻐﺎﻥ ﺑﻮﻟﯘﭖ، ﻣﯘﺷﻪﺭﺭﻩﭘﺘﯩﻦ ﻛﯧﻴﯩﻨﻜﻰ ﭘﺎﻛﯩﺴﺘﺎﻧﻨﯩﯔ ﻗﺎﻧﺪﺍﻕ ﺳﯩﻴﺎﺳﯩﻲ ﻳﯚﻧﯩﻠﯩﺸﻜﻪ ﻣﺎﯕﯩﺪﯨﻐﺎﻧﻠﯩﻘﻰ ﻫﻪﻗﻘﯩﺪﻩ ﻫﻪﺭ ﺧﯩﻞ ﺗﻪﻫﻠﯩﻠﻠﻪﺭ ﺋﯧﻼﻥ ﻗﯩﻠﯩﻨﯩﺸﻘﺎ ﺑﺎﺷﻠﯩﺪﻯ. ﺑﯘﻻﺭﻧﯩﯔ ﺑﯩﺮﻯ ﺧﯩﺘﺎﻱ - ﭘﺎﻛﯩﺴﺘﺎﻥ ﻣﯘﻧﺎﺳﯩﯟﻩﺗﻠﯩﺮﯨﺪﯗﺭ.

ﻣﯘﺷﻪﺭﺭﻩﭖ ﺧﯩﺘﺎﻱ ﺑﯩﻠﻪﻥ ﻗﻮﻳﯘﻕ ﻣﯘﻧﺎﺳﯩﯟﻩﺕ ﺋﻮﺭﻧﺎﺗﻘﺎﻥ ﺑﻮﻟﯘﭖ، ﺋﯘ، ﺧﯩﺘﺎﻱ ﺑﯩﻠﻪﻥ ﺑﯩﺮﻟﯩﻜﺘﻪ ﺋﯘﻳﻐﯘﺭﻻﺭﻧﯩﯔ ﻫﻪﺭﯨﻜﻪﺗﻠﯩﺮﯨﮕﻪ ﺯﻩﺭﺑﻪ ﺑﯧﺮﯨﺸﻜﻪ ﻗﻮﺷﯘﻟﻐﺎﻧﻠﯩﻘﻰ ﺋﯜﭼﯜﻥ ﭘﺎﻛﯩﺴﺘﺎﻧﺪﯨﻜﻰ ﺑﯩﺮ ﻗﯩﺴﯩﻢ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﭘﺎﺋﺎﻟﯩﻴﻪﺗﭽﯩﻠﯩﺮﻯ ﭘﺎﻛﯩﺴﺘﺎﻥ ﺩﺍﺋﯩﺮﯨﻠﯩﺮﻯ ﺗﻪﺭﯨﭙﯩﺪﯨﻦ ﺗﯘﺗﯘﻟﯘﭖ، ﺧﯩﺘﺎﻳﻐﺎ ﻗﺎﻳﺘﯘﺭﯗﭖ ﺑﯧﺮﯨﻠﮕﻪﻥ ﺋﯩﺪﻯ. ﻧﯚﯞﻩﺗﺘﻪ، ﺋﯘﻳﻐﯘﺭ ﻛﯚﺯﻩﺗﻜﯜﭼﯩﻠﯩﺮﻯ ﺑﯘ ﻣﻪﺳﯩﻠﯩﮕﻪ ﺩﯨﻘﻘﻪﺕ ﻗﯩﻠﻤﺎﻗﺘﺎ ﺋﯩﻜﻪﻥ.

ﮔﺮﯗﺯﯨﻴﻪ ﺋﻪﻫﯟﺍﻟﻠﯩﺮﻯ

ﮔﺮﯗﺯﯨﻴﻪ ﺑﯩﻠﻪﻥ ﺭﯗﺳﯩﻴﻪ ﺋﯘﺭﯗﺵ ﺗﻮﺧﺘﯩﺘﯩﺶ ﻛﯧﻠﯩﺸﯩﻤﻰ ﺗﯜﺯﮔﻪﻧﺪﯨﻦ ﻛﯧﻴﯩﻦ، ﺭﯗﺳﯩﻴﻪ ﭘﺮﯦﺰﯨﺪﯦﻨﺘﻰ ﻣﯧﺪﯞﯦﺪﯦﯟ ﺩﯛﺷﻪﻧﺒﻪ ﻛﯜﻧﯩﺪﯨﻦ ﺋﯧﺘﯩﺒﺎﺭﻩﻥ ﺭﯗﺳﯩﻴﻪ ﻗﻮﺷﯘﻧﻠﯩﺮﯨﻨﯩﯔ ﭼﯧﻜﯩﻨﯩﺪﯨﻐﺎﻧﻠﯩﻘﯩﻨﻰ ﺋﯧﻼﻥ ﻗﯩﻠﻐﺎﻥ ﺋﯩﺪﻯ.

ﺑﯩﺮﺍﻕ، ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺕ ﺭﯗﺳﯩﻴﻪ ﻗﻮﺷﯘﻧﻠﯩﺮﯨﻨﯩﯔ ﭼﯧﻜﯩﻨﯩﺶ ﺋﻪﻫﯟﺍﻟﯩﻨﯩﯔ ﻳﺎﺧﺸﻰ ﺑﻮﻟﻤﯩﻐﺎﻧﻠﯩﻘﻰ ﻳﻪﻧﻰ ﺑﻪﻙ ﺋﺎﺳﺘﺎ ﺑﻮﻟﯘﯞﺍﺗﻘﺎﻧﻠﯩﻘﻰ، ﻫﺎﺯﯨﺮﻣﯘ ﮔﺮﯗﺯﯨﻴﻪ ﺗﻪﯞﻩﺳﯩﺪﻩ ﺭﯗﺳﯩﻴﻪ ﻗﻮﺷﯘﻧﻠﯩﺮﯨﻨﯩﯔ ﺑﺎﺭﻟﯩﻘﯩﻨﻰ ﺗﻪﻧﻘﯩﺪ ﻗﯩﻠﯩﺸﻘﺎﻥ. ﻧﺎﺗﻮ ﺑﯘ ﻣﻪﺳﯩﻠﯩﻠﻪﺭﺩﻩ ﻳﯩﻐﯩﻦ ﺋﯧﭽﯩﭗ، ﺭﯗﺳﯩﻴﯩﻨﻰ ﯞﻩﺩﯨﺴﯩﺪﻩ ﺗﯘﺭﻣﯩﺪﻯ ﺩﻩﭖ ﺋﻪﻳﯩﺒﻠﯩﮕﻪﻥ.

ﺑﯘ ﺗﻪﻧﻘﯩﺪ ﺭﯗﺳﯩﻴﯩﻨﻰ ﺧﺎﭘﺎ ﻗﯩﻠﻐﺎﻥ ﺑﻮﻟﯘﭖ، ﺭﯗﺳﯩﻴﻪ ﻫﯚﻛﯜﻣﯩﺘﻰ ﺋﯚﺯﻟﯩﺮﯨﻨﯩﯔ ﻧﺎﺗﻮ ﺑﯩﻠﻪﻥ ﺑﻮﻟﻐﺎﻥ ﻫﻪﺭﺑﯩﻲ ﻫﻪﻣﻜﺎﺭﻟﯩﻘﻠﯩﺮﯨﻨﻰ ﺗﻮﺧﺘﺎﺗﻘﺎﻧﻠﯩﻘﯩﻨﻰ ﺟﺎﻛﺎﺭﻟﯩﻐﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﺋﺎﻣﯧﺮﯨﻜﺎ ﺋﺎﻕ ﺳﺎﺭﺍﻱ ﺑﺎﻳﺎﻧﺎﺗﭽﯩﺴﻰ ﺑﯘﻧﯩﯔ ﺋﺎﻧﭽﻪ ﺋﻪﻫﻤﯩﻴﻪﺗﻠﯩﻚ ﺋﯩﺶ ﺋﻪﻣﻪﺳﻠﯩﻜﯩﻨﻰ ﺑﯩﻠﺪﯛﺭﮔﻪﻥ. ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺑﯘﺵ ﺟﻪﻧﯘﺑﯩﻲ ﺋﺎﺳﺴﯧﺘﯩﻴﻪ ﯞﻩ ﺋﺎﺑﺨﺎﺯﯨﻴﯩﻨﯩﯔ ﮔﺮﯗﺯﯨﻴﻪ ﺯﯦﻤﯩﻨﻰ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﮕﻪﻥ ﺑﻮﻟﯘﭖ، ﺑﯘ ﺟﺎﻳﻨﯩﯔ ﻣﯘﺳﺘﻪﻗﯩﻞ ﺑﻮﻟﯘﺷﯩﻨﻰ ﻗﻮﻟﻠﯩﻤﺎﻳﺪﯨﻐﺎﻧﻠﯩﻘﯩﻨﻰ ﺋﻪﺳﻠﻪﺗﻜﻪﻥ.

ﺭﯗﺳﯩﻴﻪ ﺗﻪﺭﻩﭖ ﺑﻮﻟﺴﺎ، ﺋﺎﺯ ﺳﺎﻧﺪﯨﻜﻰ ﺭﯗﺳﯩﻴﻪ ﻗﻮﺷﯘﻧﻠﯩﺮﻯ ﮔﺮﯗﺯﯨﻴﻪ - ﺭﯗﺳﯩﻴﻪ ﭼﯧﮕﺮﺍ ﺭﺍﻳﻮﻧﯩﺪﺍ ﺗﯘﺭﯨﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺑﻮﻟﯘﭖ، ﺋﻪﻣﻤﺎ، ﻏﻪﺭﺏ ﺭﯗﺳﯩﻴﯩﺪﯨﻦ ﻗﻪﺗﺌﯩﻲ ﻗﻮﺷﯘﻥ ﭼﯧﻜﯩﻨﺪﯛﺭﯛﺷﻨﻰ ﺗﻪﻟﻪﭖ ﻗﯩﻠﻤﺎﻗﺘﺎ.