«Ewladlar ara» paaliyiti uyghur yashlirining ehmiyetlik soruni boldi

Muxbirimiz irade
2015-06-08
Élxet
Pikir
Hembehr
Print
  • Print
  • Hembehr
  • Pikir
  • Élxet
«Ewladlar ara» paaliyitini orunlashturghuchilar, xalisane yardem qilghuchilar we sözge teklip qilinghuchilar. 2015-Yili 7-Iyun, amérika.
«Ewladlar ara» paaliyitini orunlashturghuchilar, xalisane yardem qilghuchilar we sözge teklip qilinghuchilar. 2015-Yili 7-Iyun, amérika.
RFA

6-Ayning 7-Küni amérikining paytexti washingtongha yéqin wirginiye shtatidiki uyghur jamaitining teshkillishi bilen uyghur yash ewladlirini yéteklesh, ulargha ilham bérish meqsitide «ewladlar ara» témisida bir ehmiyetlik paaliyet bolup ötti.

Paaliyette, ilim-Pen saheside belgilik netijilerni qolgha keltürüp, hazir amérikidiki muhim orunlarda xizmet qiliwatqan bir qisim yash alim-Mutexessisler özlirining tejribilirini amérikida ösüp-Yétiliwatqan we amérikigha purset izdep kelgen yash-Ösmürler bilen ortaqlashti.

Amérikining wirginiye shtatida yekshenbe küni yene bir ehmiyetlik paaliyet bolup ötti. Wirginiye shtatidiki uyghur jamaiti we shundaqla herqaysi bashqa shtatlarda yashawatqan we özining oqush we xizmitide utuq qazanghan uyghurlarning qollishi, yardem bérishi bilen «ewladlar ara» namliq paaliyetning ikkinchi nöwetliki muweppeqiyetlik échildi. Amérikida ösüp yétiliwatqan, bu yerge oqush-Xizmet pursiti izdep kelgen yash bir ewladlarni yéteklesh, ulargha yol körsitish asasliq meqset qilinghan bu paaliyette amérikida herqaysi kesiplerde oqup muweppeqiyet qazanghan uyghurlar özlirining tejribilirini yashlar bilen ortaqlashti. Yighin bashqurghuchisi mutellip ependi aldi bilen bu yighinda söz qilishqa teklip qilinghan méhmanlarni tonushturup ötti.

Yighindiki söz qilghuchilar pénsilwaniye shtat uniwérsitétidin doktor nurshide polat, dora tetqiqat idarisining tetqiqatchisi doktor dilare jappar, déwériy uniwérsitétidin doktor shahnaz qembiri, amérikidiki chong shirketlerdin biri bolghan gogul shirkitidin berna ibrahim, yumshaq détal inzhénéri doktor aynur abdurazaq qatarliqlardin ibaret. Yighinda yene, amérika nasa shirkitining tetqiqatchisi erkin sidiq ependi, amérika dora tetqiqat birleshme idarisi rak késellikliri tetqiqat bölümi yétekchisi rishat abbas we shundaqla amérikidiki chéwron shirkitining téxnika özleshtürüsh yétekchisi shakir shemsi ependilermu alahide söz qilghuchilar qatarida qedem teshrip qildi.

Mutellip ependi yighinning meqsitini qisqiche tonushturup ötti. Yighinning échilish nutqini doktor rishat abbas ependi qildi.

Bu qétimqi yighingha amérikidiki dangliq ijtimaiy alaqe tor béti féyisbukta yumshaq détal énzhiniri bolup ishlewatqan uyghur qizi dilreba ibrahimmu teklip qilinghan. Biraq u xizmettiki orunlashturush munasiwiti bilen neq meydangha kélelmey qalghan bolsimu emma tor arqiliq neq meydangha ulinip söz qilip, yighinda tunji bolup söz qildi. U özining amérikigha ata-Anisi bilen kélip, oqup, qandaq qilip hazir féyisbuktin ibaret dunyagha dangliq bir shirkette ishlewatqanliqidin ibaret oqush, öginish, xizmet yollirini tonushturup ötti hem shundaqla yéngi kelgen yashlarni tiriship oqushqa ündidi. Arqidin yuqirida ismi atalghan yighin qatnashquchiliri bir-Birlep sehinige chiqip, özliriningmu mushuningdek tejribilirini ortaqliship ötti. Dorigerlik doktori dilare jappar uyghur yashlirigha purset bérilgen teqdirde ularningmu héchkimdin qélishmaydighanliqini tekitlidi. U shundaqla yene hemmeylenning ortaq küch chiqirip, uyghur jamaiti üchün küch chiqirishi kéreklikini bildürdi.

Yighin dawamida, doktor aynur abdurazaq, nurshide polat, shahnaz qembirilermu bir-Birlep söz qilip, özlirining oqush-Xizmet tejribilirini tonushturup ötti.

Yighinning ikkinchi bölümi erkin soal-Jawab qismi bashlashtin burun amérika shéwron shirkitining téxnika özleshtürüsh yétekchisi shakir shemsi ependi «amérikida igilik tiklesh» témisida anglighuchilargha melumat bérip ötti. U amérikida bir qimmet yaritish, igilik tiklesh üchün hazirlashqa tégishlik shertlerni tonushturdi, u hem amérikida yashawatqan uyghur jamaiti üchün igilik tikleshning intayin muhim ehmiyetke ige ikenlikini eskertti.

Soal-Jawab qismi bashlighandin kéyin yighingha kelgen alim-Mutexessisler yashlarning kesip tallash, mekteplerge iltimas qilish hem shundaqla uyghur jamaiti we uyghur milliti üchün qandaq xizmet qilish, uyghur kimliki bilen amérikiliq dégen kimlik otturisidiki tengpungluqni qandaq tépish qatarliq mesililer üstide sorighan soallirigha jawab bérip ötti. Yashlar hemmisi özining oqush-Turmush jehetke munasiwetlik soallirini yuqirida olturghan aka-Hediliridin sorap, ularning meslihetini aldi. Yighingha kelgen bir yash uyghur qizi özining bu yighinda alghan tesiratlirini biz bilen ortaqlashti.

Yighinning axirida paaliyet teshkilligüchiliridin biri bolghan dilmurat ependi yépilish nutqini qilip kelgen barliq méhmanlargha teshekkürini bildürdi.

Toluq bet