Amérikidiki Uyghurlar amérika dölet mejlisi binasida sherqiy türkistan jumhuriyetlirini xatirilidi

Dunya Uyghur qurultiyi, amérika Uyghur birleshmisi we xelq'ara Uyghur kishilik hoquq we démokratiye fondi jem'iyitining teshkillishi bilen, 12-noyabir küni washin'gton'gha jaylashqan amérika dölet mejlisi binasi yighin zalida, Uyghurlar yéqinqi zaman tarixida qurghan sherqiy türkistan jumhuriyitining 80 yilliqini we amérika Uyghur birleshmisi qurulghanliqining 15 yilliqini tebriklesh birleshme pa'aliyiti, washin'gton waqti shu küni chüshtin kéyin sa'et 2din 4 kéche élip bérildi.

Murasim sherqiy türkistan dölet marshining sadasida yüzge yéqin ishtirakchilarning öng qolini köksige qoyup turup sherqiy türkistanning ay yultuzluq kök bayriqigha hörmet bildürüshi bilen bashlandi.

Murasimgha, amérikidiki Uyghur pa'aliyetchiliri we Uyghur jama'itidin bashqa, dunya Uyghur qurultiyining asasliq rehberliri, gérmaniye, türkiye, yaponiye qatarliq döletlerdin kélip qatnashti, murasimgha yene Uyghurlarni qollighuchi xelq'araliq teshkilatlar hemde xelq'araliq axbarat orunliridinmu bir qisim kishiler bolup yüzge yéqin kishi ishtirak qildi.

Murasim riyasetchisi, amérika Uyghur birleshmisi re'isi alim séyitof ependi, aldi bilen Uyghur milliy herikiti rehbiri rabiye qadir xanimni tebrik sözige teklip qildi:

Rabiye qadir xanim pütün Uyghurlarni sherqiy türkistan tarixidiki bu üch qétimliq jumhuriyet qurghan zeper künning sheripi bilen mubareklidi we buning üchün qan tökken ejdadlargha, shéhitlerge hörmet-éhtiram bildürdi we ularning arzusini, izini dawam qiliwatqan Uyghurlarning haman 4-qétimliq jumhuriyitining ghelibisini qolgha keltürüshige bolghan ishench we iradisini ipadilidi.

Dölet mejlis ezasi frank wolf ependining sherqiy türkistan jumhuriyet xatire küni munasiwiti bilen rabiye qadir xanimgha ewetken tebriknamisi oqup ötüldi .

Uyghur dewasini küchlük qollighuchi teshkilatlardin amérika démokratiye we kishilik hoquqni ilgiri sürüsh jem'iyitining mu'awin re'isi luyisa gréwyi xanim tebrik sözide, Uyghurlarni sherqiy türkstanning tughulghan küni bilen tebrikligendin bashqa, amérika Uyghur birleshmisi qurulghanliqining 15 yilliqini qizghin tebriklidi we ularning yillardin buyan Uyghurlar uchrawatqan insan heqliri mesililirini anglitish üchün élip barghan xizmetlirige yuqiri baha berdi.

Murasimgha gérmaniyidin qedem teshrip qilghan péshqedem Uyghur milliy herikiti rehberliridin dunya Uyghur qurultiyining sabiq re'isi erkin aliptékin ependi, Uyghurlarning ortaq arzusi bolghan erkinlik üchün, 4-qétimliq jumhuriyitini qurup chiqish yolida mujadile qiliwatqan barliq Uyghurlarni Uyghur milliy herikiti rehbiri rabiye qadir xanimning etrapigha mushtumdek uyushushqa chaqirdi.

Sözge teklip qilin'ghan méhmanlardin yene, amérika tom lentos kishilik hoquqni ilgiri sürüsh fondining sabq bash diréktori xans xorgrifé jama'etke qarap, “Sizlerning tirishchanliqinglar, töligen bedelliringlar, Uyghurlar uchrawatqan türlük basturush we zulumning dunyagha anglitilishigha türtke boldi, Uyghurlarning awazi barghanche kücheymekte, emma xitayning Uyghurlar üstidin élip bériwatqan basturushi toxtap qalghini yoq, buning toxtishi üchün amérika dölet mesilisi, amérika hökümiti dawamliq tirishchanliq körsitishi kérek shundaqla buning uzun hem musheqqetlik bir musape ikenlikini estin chiqarmasliqimiz kérek, nishan'gha yétip üchün erkin aliptékin ependi éytqandek öz-ara ittipaq we sadaqet kérek. Uyghur dostlargha bügünkidek jumhuriyet künide amérika tarixidiki dangliq rehberlerdin ibraxim linkolnning “A'ile ichidikiler bir-birige qarshi turghanda öy örülüp chüshidu”dégen bir meshhur sözini soghat qilimen dédi.

Murasimgha qatnashqan teywenlik, xitay démokratiye we tibet teshkilat wekillirimu Uyghurlarni jumhuriyet küni bilen mubareklidi we özlirining Uyghurlar dewasini dawamliq qollaydighanliqini bildürüshti we xitayning zorawanliqigha uchrawatqan barliq xelqlerni xitay kommunist hökümitige qarshi ittipaqliship heriket qilishqa chaqirdi.

Hayajan ichide tamamlan'ghan murasimdin kéyin, pa'aliyet ishtirakchiliri xitay hökümitige qarshi naraziliq namayishi ötküzüsh üchün washin'gtondiki xitay elchixanisigha qarap yürüp ketti.

Tepsilatini yuqiridiki awaz ulinishidin anglighaysiz.