ﻓﻪﺭﻏﺎﻧﻪ ﺋﺎﮔﯧﻨﺘﻠﯩﻘﯩﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، 1992 - ﻳﻠﯩﺪﯨﻦ ﺋﯧﺘﯩﺒﺎﺭﻩﻥ ﺋﺎﻣﯧﺮﯨﻜﺎ ﺗﺎﺟﯩﻜﯩﺴﺘﺎﻧﻐﺎ ﻣﻪﺯﻛﯘﺭ ﺳﺎﻫﻪ ﺑﻮﻳﯩﭽﻪ ﻳﺎﺭﺩﻩﻡ ﺑﯧﺮﯨﭗ ﻛﻪﻟﻤﻪﻛﺘﻪ.

ﺋﺎﻣﯧﺮﯨﻜﺎ ﺑﺎﺵ ﺋﻪﻟﭽﯩﺴﻰ ﺋﯚﺗﻜﻪﻥ ﻳﯩﻠﻰ ﺋﺎﻣﯧﺮﯨﻜﺎ ﻫﯚﻛﯜﻣﯩﺘﯩﻨﯩﯔ ﺗﺎﺟﯩﻜﯩﺴﺘﺎﻧﻨﯩﯔ ﺑﯩﺨﻪﺗﻪﺭﻟﯩﻚ ﺋﯩﺸﻠﯩﺮﻯ ﺋﯜﭼﯜﻥ 18.8 ﻣﯩﻠﻴﻮﻥ ﺩﻭﻟﻼﺭ ﺋﺎﺟﺮﺍﺗﻘﺎﻧﻠﯩﻘﯩﻨﻰ ﺋﻪﺳﻜﻪﺭﺗﻜﻪﻥ. ﺋﯘ، "ﺑﯩﺰ ﺗﺎﺟﯩﻜﯩﺴﺘﺎﻥ ﺑﯩﻠﻪﻥ ﺑﻮﻟﻐﺎﻥ ﺑﯩﺨﻪﺗﻪﺭﻟﯩﻚ ﺳﺎﻫﻪﺳﯩﺪﯨﻜﻰ ﻫﻪﻣﻜﺎﺭﻟﯩﻘﻼﺭﻧﻰ ﺩﺍﯞﺍﻣﻼﺷﺘﯘﺭﻣﺎﻗﭽﯩﻤﯩﺰ، ﺷﯘﯕﺎ ﺑﯩﺰ ﺗﺎﺟﯩﻜﯩﺴﺘﺎﻧﻨﯩﯔ ﺗﯧﺮﺭﻭﺭﭼﯩﻠﯩﻖ، ﺯﻩﻫﻪﺭﻟﯩﻚ ﭼﯧﻜﯩﻤﻠﯩﻚ ﯞﻩ ﺑﺎﺷﻘﺎ ﻣﻪﺳﯩﻠﯩﻠﻪﺭﮔﻪ ﻗﺎﺭﺷﻰ ﻛﯜﺭﻩﺷﻜﻪ ﻗﻮﺷﻘﺎﻥ ﺗﯚﻫﭙﯩﺴﯩﻨﻰ ﻗﻪﺩﯨﺮﻟﻪﻳﻤﯩﺰ" ﺩﻩﻳﺪﯗ.

ﺋﺎﻣﯧﺮﯨﻜﺎ ﺋﺎﺟﺮﺍﺗﻘﺎﻥ 13 ﻣﯩﻠﻴﻮﻥ ﺩﻭﻟﻼﺭﻧﯩﯔ ﺑﯩﯟﺍﺳﯩﺘﻪ ﺋﯩﺸﻠﯩﺘﯩﻠﯩﺶ ﺩﺍﺋﯩﺮﯨﺴﻰ ﺑﯧﻜﯩﺘﯩﻠﮕﻪﻥ ﺑﻮﻟﯘﭖ، 2 ﻳﯧﺮﯨﻢ ﻣﯩﻠﻴﻮﻥ ﺩﻭﻟﻼﺭ ﺗﺎﺟﯩﻜﯩﺴﺘﺎﻧﻨﯩﯔ ﭼﯧﮕﺮﺍ ﻣﯘﺩﺍﭘﯩﺌﻪ ﺋﺎﻛﺎﺩﯦﻤﯩﻴﯩﺴﯩﻨﯩﯔ ﺗﯜﺭﻟﯜﻙ ﺧﯩﺰﻣﻪﺗﻠﯩﺮﯨﮕﻪ، 3 ﻣﯩﻠﻴﻮﻥ ﺩﻭﻟﻼﺭ ﺯﻩﻫﻪﺭﻟﯩﻚ ﭼﯧﻜﯩﻤﻠﯩﻜﺘﯩﻦ ﻣﯘﺩﺍﭘﯩﺌﻪ ﻛﯚﺭﯛﺵ ﯞﻩ ﺋﯘﻧﯩﯖﻐﺎ ﻗﺎﺭﺷﻰ ﺗﯘﺭﯗﺵ ﺋﯩﺸﻠﯩﺮﯨﻐﺎ ﺋﺎﺟﺮﯨﺘﯩﻠﻐﺎﻥ.

ﺗﺎﺟﯩﻜﯩﺴﺘﺎﻧﻨﯩﯔ ﺋﺎﺳﯩﻴﺎ ﭘﻠﯘﺱ ﻣﻪﺗﺒﯘﺋﺎﺗﯩﻨﯩﯔ ﻳﯧﺰﯨﺸﯩﭽﻪ، ﻫﺎﺯﯨﺮ ﺋﺎﻣﯧﺮﯨﻜﺎ ﺗﺎﺟﯩﻜﯩﺴﺘﺎﻧﻐﺎ ﻫﻪﺭ ﻳﯩﻠﻰ 40 ﻣﯩﻠﻴﻮﻥ ﺩﻭﻟﻼﺭ ﺋﻪﺗﺮﺍﭘﯩﺪﺍ ﻳﺎﺭﺩﻩﻡ ﻗﯩﻠﻤﺎﻗﺘﺎ. ﺑﯘ ﻳﺎﺭﺩﻩﻣﻠﻪﺭ ﺑﯘ ﺩﯙﻟﻪﺗﻨﯩﯔ ﺑﯩﺨﻪﺗﻪﺭﻟﯩﻜﻨﻰ ﻛﯜﭼﻪﻳﺘﯩﺶ، ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﻰ، ﺩﯦﻤﻮﻛﺮﺍﺗﯩﻴﻪ ﯞﻩ ﺋﻪﺭﻛﯩﻨﻠﯩﻜﻨﻰ ﺭﺍﯞﺍﺟﻼﻧﺪﯗﺭﯗﺵ ﻫﻪﻡ ﺳﺎﻗﻠﯩﻘﻨﻰ ﺳﺎﻗﻼﺵ، ﻣﺎﺋﺎﺭﯨﭗ ﺋﯩﺸﻠﯩﺮﯨﻨﻰ ﻛﯜﭼﻪﻳﺘﯩﺸﺘﻪ ﺭﻭﻝ ﺋﻮﻳﻨﯩﻤﺎﻗﺘﺎ.

ﺗﺎﺟﯩﻜﯩﺴﺘﺎﻥ ﺋﻮﺗﺘﯘﺭﺍ ﺋﺎﺳﯩﻴﺎﺩﯨﻜﻰ ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﻰ ﺋﺎﺭﻗﯩﺪﺍ ﻗﺎﻟﻐﺎﻥ ﺗﺎﻏﻠﯩﻖ ﺩﯙﻟﻪﺕ. ﺗﺎﺟﯩﻜﯩﺴﺘﺎﻥ ﺋﯚﺯ ﺗﻪﺭﻩﻗﻘﯩﻴﺎﺗﯩﻨﻰ ﺋﯩﻠﮕﯩﺮﻯ ﺳﯜﺭﯛﺵ ﯞﻩ ﺑﯩﺨﻪﺗﻪﺭﻟﯩﻜﯩﻨﻰ ﻛﺎﭘﺎﻟﻪﺗﻜﻪ ﺋﯩﮕﻪ ﻗﯩﻠﯩﺶ ﺋﯜﭼﯜﻥ ﺭﯗﺳﯩﻴﻪ، ﺧﯩﺘﺎﻱ، ﺋﯩﺮﺍﻥ ﯞﻩ ﻫﯩﻨﺪﯨﺴﺘﺎﻥ ﺑﯩﻠﻪﻥ ﺑﻮﻟﻐﺎﻥ ﻫﻪﺭﺑﯩﻲ - ﺳﯩﻴﺎﺳﯩﻲ، ﺋﯩﻘﺘﯩﺴﺎﺩﯨﻲ ﻣﯘﻧﺎﺳﯩﯟﻩﺗﻠﻪﺭﮔﯩﻤﯘ ﺋﻪﻫﻤﯩﻴﻪﺕ ﺑﻪﺭﻣﻪﻛﺘﻪ، ﻧﯚﯞﻩﺗﺘﻪ، ﺗﺎﺟﯩﻜﯩﺴﺘﺎﻧﺪﺍ ﺭﯗﺳﯩﻴﻪ ﻫﻪﺭﺑﯩﻲ ﺑﺎﺯﯨﺴﻰ ﻣﻪﯞﺟﯘﺕ.