ﭘﻪﺭﻏﺎﻧﻪ ﺋﺎﮔﯧﻨﺘﻠﯩﻘﯩﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﺗﯜﺭﻛﻤﻪﻧﯩﺴﺘﺎﻧﺪﯨﻜﻰ ﮔﺎﺯ ﻣﻪﻧﺒﻪﺳﯩﺪﯨﻦ ﺑﺎﺷﻠﯩﻨﯩﺪﯨﻐﺎﻥ ﻣﻪﺯﻛﯘﺭ ﺗﯘﺭﯗﺑﺎ ﻳﻮﻟﻰ ﻗﯘﺭﯗﻟﯘﺷﻰ ﻗﺎﺯﺍﻗﯩﺴﺘﺎﻧﻨﯩﯔ ﺟﺎﻣﺒﯘﻝ ﺋﻮﺑﻼﺳﺘﻰ، ﺟﻪﻧﯘﺑﯩﻲ ﻗﺎﺯﺍﻗﯩﺴﺘﺎﻥ ﯞﻩ ﺋﺎﻟﻤﯘﺗﺎ ﺋﻮﺑﻼﺳﺘﻠﯩﺮﯨﺪﯨﻦ ﺋﯚﺗﯜﭖ، ﺋﯘﻳﻐﯘﺭ ﺋﯧﻠﯩﻨﯩﯔ ﻗﻮﺭﻏﺎﺱ ﭼﯧﮕﺮﯨﺴﯩﺪﯨﻦ ﻛﯩﺮﯨﺪﯗ. ﺋﻮﻣﯘﻣﯩﻲ ﻣﯘﺳﺎﭘﯩﺴﻰ 1300 ﻛﯩﻠﻮﻣﯧﺘﯩﺮ ﻛﯧﻠﯩﺪﯗ. ﺑﯘ ﻳﻮﻝ ﺋﺎﺭﻗﯩﻠﯩﻖ ﻳﯩﻠﺪﺍ 40 ﻣﯩﻠﻴﺎﺭﺩ ﻛﯘﺑﻤﯧﺘﯩﺮ ﺗﻪﺑﯩﺌﯩﻲ ﮔﺎﺯ ﺗﻮﺷﯘﻟﯩﺪﯗ.

ﺑﯘ ﺗﯘﺭﯗﺑﺎ ﻳﻮﻟﻰ ﺑﺎﺳﻘﯘﭼﻼﺭ ﺑﯩﻠﻪﻥ ﻗﯘﺭﯗﻟﯩﺪﯗ. ﺋﺎﻟﺪﻯ ﺑﯩﻠﻪﻥ ﺋﯚﺯﺑﯧﻜﯩﺴﺘﺎﻥ ﭼﯧﮕﺮﯨﺴﯩﺪﯨﻦ ﻗﺎﺯﺍﻗﯩﺴﺘﺎﻧﻨﯩﯔ ﭼﯩﻤﻜﻪﻧﺖ ﺷﻪﻫﯩﺮﯨﮕﻪ، ﺋﺎﺭﻗﯩﺪﯨﻦ ﺩﺍﯞﺍﻣﻠﯩﻖ ﻫﺎﻟﺪﺍ ﺋﺎﻟﻤﯘﺗﺎ - ﻗﻮﺭﻏﺎﺱ ﻟﯩﻨﯩﻴﯩﺴﻰ ﺑﻮﻳﯩﭽﻪ ﺟﻪﻧﯘﺑﯩﻲ ﻗﺎﺯﺍﻗﯩﺴﺘﺎﻧﺪﯨﻦ ﺋﯚﺗﯩﺪﯗ. ﻗﺎﺯﺍﻗﯩﺴﺘﺎﻥ ﺗﻪﺭﻩﭖ ﺑﯘ ﻳﻮﻟﻨﻰ ﻧﺎﻫﺎﻳﯩﺘﻰ ﻣﯘﻫﯩﻢ ﺩﻩﭖ ﻫﯧﺴﺎﺑﻠﯩﻐﺎﻥ ﺑﻮﻟﯘﭖ، ﺑﯘ ﺋﺎﺭﻗﯩﻠﯩﻖ ﺑﯩﺮ ﺗﻪﺭﻩﭘﺘﯩﻦ ﺧﯩﺘﺎﻳﻐﺎ ﮔﺎﺯ ﺋﯧﻜﺴﭙﻮﺭﺕ ﻗﯩﻠﺴﺎ، ﻳﻪﻧﻪ ﺑﯩﺮ ﺗﻪﺭﻩﭘﺘﯩﻦ ﻗﺎﺯﺍﻗﯩﺴﺘﺎﻧﻨﯩﯔ ﺟﻪﻧﯘﺑﯩﺪﯨﻜﻰ ﺑﯩﺮ ﻗﯩﺴﯩﻢ ﺟﺎﻳﻼﺭﻧﯩﯔ ﺗﻪﺑﯩﺌﯩﻲ ﮔﺎﺯ ﺑﯩﻠﻪﻥ ﺗﻪﻣﯩﻨﻠﯩﻨﯩﺸﯩﻨﻰ ﺋﯩﻠﮕﯩﺮﻯ ﺳﯜﺭﮔﯩﻠﻰ ﺑﻮﻟﯩﺪﯨﻜﻪﻥ.

ﺑﯘ ﻗﯧﺘﯩﻢ ﺋﯧﭽﯩﻠﻐﺎﻥ ﻳﯩﻐﯩﻨﺪﺍ ﻣﯘﺗﻪﺧﻪﺳﺴﯩﺴﻠﻪﺭ ﻣﻪﺯﻛﯘﺭ ﻗﯘﺭﯗﻟﯘﺷﻨﯩﯔ ﻗﺎﺯﺍﻗﯩﺴﺘﺎﻥ ﺋﯜﭼﯜﻥ ﺯﻭﺭ ﺋﯩﻘﺘﯩﺴﺎﺩﯨﻲ ﯞﻩ ﺋﯩﺠﺘﯩﻤﺎﺋﯩﻲ ﭘﺎﻳﺪﺍ ﻛﻪﻟﺘﯜﺭﯨﺪﯨﻐﺎﻧﻠﯩﻘﯩﻨﻰ ﻣﯘﺋﻪﻳﻴﻪﻧﻠﻪﺷﺘﯜﺭﮔﻪﻥ.

ﺧﯩﺘﺎﻱ ﻗﺎﺯﺍﻗﯩﺴﺘﺎﻥ، ﺗﯜﺭﻛﻤﻪﻧﯩﺴﺘﺎﻥ ﯞﻩ ﺋﯚﺯﺑﯧﻜﯩﺴﺘﺎﻥ ﺑﯩﻠﻪﻥ ﺗﻪﺑﯩﺌﯩﻲ ﮔﺎﺯ ﻛﯧﻠﯩﺸﯩﻤﻠﯩﺮﻯ ﺗﯜﺯﮔﻪﻥ ﺑﻮﻟﯘﭖ، ﺋﯘﻻﺭﺩﯨﻦ ﺋﯧﻠﯩﻨﯩﺪﯨﻐﺎﻥ ﮔﺎﺯﻻﺭﻧﻰ ﺗﻮﺷﯘﺵ ﺋﯜﭼﯜﻥ ﻣﻪﺧﺴﯘﺱ ﺗﯘﺭﯗﺑﺎ ﻳﻮﻟﻰ ﻗﯘﺭﯗﺵ ﻫﻪﻗﻘﯩﺪﯨﻤﯘ ﭘﯜﺗﯜﺷﯜﻡ ﻫﺎﺳﯩﻞ ﻗﯩﻠﯩﻨﻐﺎﻥ ﺋﯩﺪﻯ.