ﺧﻪﯞﻩﺭﻟﻪﺭﮔﻪ ﻗﺎﺭﯨﻐﺎﻧﺪﺍ، ﺳﻪﻳﺸﻪﻧﺒﻪ ﻛﯜﻧﻰ 4 ﻧﻪﭘﻪﺭ ﺗﯩﺠﺎﺭﻩﺗﭽﻰ ﻛﯩﻴﯩﻢ - ﻛﯧﭽﻪﻙ ﺳﯧﺘﯩﯟﺍﻟﻤﺎﻗﭽﻰ ﺑﻮﻟﯘﭖ، ﮔﯜﺍﯕﺠﯘ ﺷﻪﻫﯩﺮﯨﻨﯩﯔ ﺑﯧﻴﺠﯩﯔ ﻳﻮﻟﯩﺪﯨﻜﻰ ﺑﯩﺮ ﻛﯩﻴﯩﻢ - ﻛﯧﭽﻪﻙ ﺩﯗﻛﯩﻨﯩﻐﺎ ﻛﯩﺮﮔﻪﻥ ﯞﻩ ﺑﯘ ﺟﻪﺭﻳﺎﻧﯩﺪﺍ ﺧﯩﺘﺎﻱ ﺩﯗﻛﺎﻧﺪﺍﺭ ﺑﯩﻠﻪﻥ ﺗﯩﺠﺎﺭﻩﺗﭽﯩﻠﻪﺭ ﺋﺎﺭﯨﺴﯩﺪﺍ ﺗﻮﻗﯘﻧﯘﺵ ﻳﯜﺯ ﺑﻪﺭﮔﻪﻥ. ﻗﻮﻟﻐﺎ ﺋﯧﻠﯩﻨﻐﺎﻥ 3 ﻧﻪﭘﻪﺭ ﺧﯩﺘﺎﻱ ﭘﯘﻗﺮﺍﺳﻰ ﺗﻮﺭﺩﺍ ﺋﯧﻼﻥ ﻗﯩﻠﻐﺎﻥ ﺑﯘ ﻫﻪﻗﺘﯩﻜﻰ ﺋﯘﭼﯘﺭﯨﺪﺍ ﺋﻪﺗﺮﺍﭘﺪﯨﻜﻰ ﺧﯩﺘﺎﻳﻼﺭﻧﯩﯔ ﺩﯗﻛﺎﻧﺪﺍﺭﻏﺎ ﻳﺎﻥ ﺑﯧﺴﯩﭗ، ﺑﯘ 4 ﻧﻪﭘﻪﺭ ﺋﯘﻳﻐﯘﺭ ﺗﯩﺠﺎﺭﻩﺗﭽﯩﻨﻰ ﺗﻮﭘﻠﯩﺸﯩﭗ ﺋﯘﺭﻏﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ ﺋﯩﺪﻯ.

ﻟﯧﻜﯩﻦ ﺷﯩﻨﺨﯘﺍ ﺋﺎﺧﺒﺎﺭﺍﺕ ﺋﺎﮔﯧﻨﺘﻠﯩﻘﻰ ﺑﯘ ﻫﻪﻗﺘﯩﻜﻰ ﺧﻪﯞﯨﺮﯨﺪﻩ، ﻫﯘﺟﯘﻣﻐﺎ ﺋﯘﭼﺮﯨﻐﯘﭼﯩﻼﺭﻧﯩﯔ ﺋﯘﻳﻐﯘﺭ ﺋﻪﻣﻪﺳﻠﯩﻜﻰ، ﺋﯘﻻﺭﻧﯩﯔ ﻗﺎﺯﺍﻗﯩﺴﺘﺎﻥ ﯞﻩ ﺭﯗﺳﯩﻴﯩﻠﯩﻚ ﺗﯩﺠﺎﺭﻩﺗﭽﯩﻠﻪﺭ ﺋﯩﻜﻪﻧﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ. ﺷﯩﻨﺨﯘﺍ ﺋﺎﮔﯧﻨﺘﻠﯩﻘﯩﻨﯩﯔ ﺧﻪﯞﯨﺮﯨﺪﻩ، ﻣﻪﺳﺌﯘﻟﯩﻴﻪﺕ ﺑﯘ 4 ﻛﯩﺸﯩﮕﻪ ﺋﺎﺭﺗﯩﻠﻐﺎﻥ ﺑﻮﻟﯘﭖ، ﺋﯘﻻﺭﻧﯩﯔ ﺑﯩﺮ ﺑﻪﻟﯟﺍﻏﻨﻰ ﺗﯩﻘﯩﯟﺍﻟﻐﺎﻧﻠﯩﻘﻰ، ﺩﯗﻛﺎﻧﺪﺍﺭﻧﯩﯔ ﺋﯘﻻﺭﻧﻰ ﺗﻮﺳﯩﯟﯦﻠﯩﭗ، ﺋﯩﻜﻜﻰ ﺑﯩﺨﻪﺗﻪﺭﻟﯩﻚ ﺧﺎﺩﯨﻤﯩﻨﯩﯔ ﯞﻩﻗﻪﮔﻪ ﺋﺎﺭﯨﻼﺷﻘﺎﻧﻠﯩﻘﻰ، ﺋﯩﻜﻜﻰ ﺗﻪﺭﻩﭖ ﺋﺎﺭﯨﺴﯩﺪﺍ ﺗﻮﻗﯘﻧﯘﺵ ﻳﯜﺯ ﺑﻪﺭﮔﻪﻧﻠﯩﻚ ﺳﻪﯞﻩﺑﻰ ﭘﯘﻗﺮﺍﻻﺭﻧﯩﯔ ﺗﺎﻣﺎﺷﺎ ﻛﯚﺭﯛﺵ ﺋﯜﭼﯜﻥ ﺗﻮﭘﻼﺷﻘﺎﻧﻠﯩﻘﻰ، ﺝ ﺥ ﺩﺍﺋﯩﺮﯨﻠﯩﺮﯨﻨﯩﯔ ﺗﻪﺭﻩﭘﻠﻪﺭﻧﻰ ﺋﻪﺗﺮﺍﭘﺘﯩﻜﻰ ﺳﺎﻗﭽﯩﺨﺎﻧﯩﻐﺎ ﺋﯧﻠﯩﭗ ﻛﻪﺗﻜﻪﻧﻠﯩﻜﻰ ﺋﯩﻠﮕﯩﺮﻯ ﺳﯜﺭﯛﻟﮕﻪﻥ.

ﺧﻪﯞﻩﺭﻟﻪﺭﮔﻪ ﻗﺎﺭﯨﻐﺎﻧﺪﺍ، ﯞﻩﻗﻪﻧﻰ ﺋﯚﺯ ﻛﯚﺯﻯ ﺑﯩﻠﻪﻥ ﻛﯚﺭﮔﻪﻧﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ ﭼﯧﻦ ﻓﺎﻣﯩﻠﯩﻠﯩﻚ ﺑﯩﺮ ﻳﻮﻟﯘﭼﻰ ﺑﯩﻠﻪﻥ ﻳﻪﻧﻪ ﺋﯩﻜﻜﻰ ﺧﯩﺘﺎﻱ ﭘﯘﻗﺮﺍﺳﻰ ﺑﯘ ﯞﻩﻗﻪﻧﻰ ﺗﻮﺭ ﺑﯧﺘﯩﺪﻩ ﺋﯧﻼﻥ ﻗﯩﻠﯩﭗ، ﺧﯩﺘﺎﻱ ﺷﻪﻫﻪﺭ ﺋﺎﻫﺎﻟﯩﺴﻰ ﯞﻩ ﺑﯩﺨﻪﺗﻪﺭﻟﯩﻚ ﺧﺎﺩﯨﻤﻠﯩﺮﯨﻨﯩﯔ ﺑﯘ 4 ﺋﯘﻳﻐﯘﺭﻧﻰ ﺗﻮﭘﻠﯩﺸﯩﭗ ﺋﯘﺭﻏﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ. ﺳﺎﻗﭽﯩﻼﺭ ﺑﻮﻟﺴﺎ ﺑﯘ 3 ﺧﯩﺘﺎﻱ ﭘﯘﻗﺮﺍﺳﯩﻨﻰ ﻗﻮﻟﻐﺎ ﺋﯧﻠﯩﭗ، ﺋﯘﻻﺭﻧﻰ "ﭘﯩﺘﻨﻪ - ﺋﯩﻐﯟﺍ ﺗﺎﺭﻗﯩﺘﯩﺶ" ﺑﯩﻠﻪﻥ ﺋﻪﻳﯩﺒﻠﯩﮕﻪﻥ.

ﺑﯘ ﻳﯩﻞ 6 ‏- ﺋﺎﻳﺪﺍ ﮔﯘﺍﯕﺪﯗﯕﻨﯩﯔ ﺷﺎﯞﮔﯜﻩﻥ ﺷﻪﻫﯩﺮﯨﺪﻩ ﻳﯜﺯ ﺑﻪﺭﮔﻪﻥ 26‏ - ﺋﯩﻴﯘﻧﺪﯨﻜﻰ ﺋﯘﻳﻐﯘﺭ ﺋﯩﺸﭽﯩﻼﺭﻧﻰ ﺋﯚﻟﺘﯜﺭﯛﺵ ﯞﻩﻗﻪﺳﻰ، ﺋﯜﺭﯛﻣﭽﯩﺪﻩ "5 ‏- ﺋﯩﻴﯘﻝ ﯞﻩﻗﻪﺳﻰ"ﻧﯩﯔ ﻳﯜﺯ ﺑﯧﺮﯨﺸﯩﻨﻰ ﻛﻪﻟﺘﯜﺭﯛﭖ ﭼﯩﻘﺎﺭﻏﺎﻥ ﺋﯩﺪﻯ. ﺧﯩﺘﺎﻱ ﻫﯚﻛﯜﻣﯩﺘﻰ ﺷﯘﻧﯩﯖﺪﯨﻦ ﺑﯘﻳﺎﻥ ﺧﯩﺘﺎﻳﻼﺭﻧﯩﯔ ﺋﯘﻳﻐﯘﺭﻻﺭﻏﺎ ﻫﯘﺟﯘﻡ ﻗﯩﻠﻐﺎﻧﻠﯩﻘﯩﻐﺎ ﺩﺍﺋﯩﺮ ﯞﻩﻗﻪﻟﻪﺭﻧﻰ ﻣﻪﺗﺒﯘﺋﺎﺕ ﻳﯜﺯﯨﺪﻩ ﺋﯧﻼﻥ ﻗﯩﻠﯩﺸﻨﻰ ﻗﻪﺗﺌﯩﻲ ﭼﻪﻛﻠﯩﮕﻪﻥ.