ﺋﺎﻣﯧﺮﯨﻜﯩﻨﯩﯔ ﺗﻪﻳﯟﻩﻧﺪﯨﻜﻰ ﯞﺍﻛﺎﻟﻪﺗﺨﺎﻧﯩﺴﯩﻨﯩﯔ ﻣﯘﺩﯨﺮﻯ ﯞﯨﻠﻠﯩﺌﺎﻡ ﺳﺘﺎﻧﺘﻮﻥ ﺋﺎﻣﯧﺮﯨﻜﯩﻨﯩﯔ ﺗﻪﻳﯟﻩﻥ ﺳﯩﻴﺎﺳﯩﺘﯩﺪﻩ ﺋﯚﺯﮔﯩﺮﯨﺶ ﺑﻮﻟﻤﯩﻐﺎﻧﻠﯩﻘﯩﻨﻰ، ﺋﻮﺑﺎﻣﺎ ﻫﯚﻛﯜﻣﯩﺘﯩﻨﯩﯔ "ﺗﻪﻳﯟﻩﻥ ﻣﯘﻧﺎﺳﯩﯟﻩﺕ ﻗﺎﻧﯘﻧﻰ"ﻏﺎ ﺭﯨﺌﺎﻳﻪ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ. ﺳﺘﺎﻧﺘﻮﻥ ﭘﺮﯦﺰﯨﺪﯦﻨﺖ ﺋﻮﺑﺎﻣﺎﻧﯩﯔ 11 - ﺋﺎﻳﺪﺍ ﺋﯧﻠﯩﭗ ﺑﺎﺭﯨﺪﯨﻐﺎﻥ ﺧﯩﺘﺎﻱ ﺯﯨﻴﺎﺭﯨﺘﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ، "ﺑﯘ ﻳﻪﺭﺩﻩ ﺑﻮﻟﯘﭘﻤﯘ ﺗﻪﻳﯟﻩﻧﻨﯩﯔ ﺋﻪﻧﺪﯨﺸﻪ ﻗﯩﻠﯩﺸﻰ ﻫﺎﺟﻪﺗﺴﯩﺰ" ﺩﯦﮕﻪﻥ.
 
ﺳﺘﺎﻧﺘﻮﻥ ﺋﻮﺑﺎﻣﺎ ﺑﯩﻠﻪﻥ ﺧﯘ ﺟﯩﻨﺘﺎﯞﻧﯩﯔ ﺳﯚﻫﺒﯩﺘﯩﺪﻩ ﺗﻪﻳﯟﻩﻥ ﻣﻪﺳﯩﻠﯩﺴﯩﻨﯩﯔ ﺋﻮﺗﺘﯘﺭﯨﻐﺎ ﻗﻮﻳﯘﻟﯩﺪﯨﻐﺎﻧﻠﯩﻘﯩﺪﯨﻦ ﺷﯘﺑﻬﯩﻠﻪﻧﻤﻪﻳﺪﯨﻐﺎﻧﻠﯩﻘﯩﻨﻰ، ﻟﯧﻜﯩﻦ ﭘﯩﻼﻧﺪﯨﻜﻰ ﻣﻪﺳﯩﻠﯩﻠﻪﺭ ﺗﻪﻳﯟﻩﻥ ﺑﻮﻏﯘﺯﻯ ﺑﯩﻠﻪﻥ ﭼﻪﻛﻠﻪﻧﻤﻪﻳﺪﯨﻐﺎﻥ ﺭﺍﻳﻮﻥ ﺧﺎﺭﺍﻛﺘﯧﺮﻟﯩﻚ ﻣﻪﺳﯩﻠﯩﻠﻪﺭﮔﻪ ﭼﯧﺘﯩﻠﯩﺪﯨﻐﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ. ﺋﯘ ﻣﯘﻧﺪﺍﻕ ﺩﻩﻳﺪﯗ: "ﺋﻮﺑﺎﻣﺎ ﻫﯚﻛﯜﻣﯩﺘﻰ ﺩﻩﯞﺭﯨﺪﻩ ﺋﺎﻣﯧﺮﯨﻜﯩﻨﯩﯔ ﺗﻪﻳﯟﻩﻧﮕﻪ ﻗﺎﺭﺍﺗﻘﺎﻥ ﺳﯩﻴﺎﺳﯩﺘﯩﺪﻩ ﺋﯚﺯﮔﯩﺮﯨﺶ ﺑﻮﻟﻤﯩﺪﻯ... ﺷﯘﻧﺪﺍﻗﻼ ﻣﻪﻥ ﺑﯘ ﻣﻪﺳﯩﻠﯩﺪﻩ ﺗﺎﺳﺎﺩﯨﭙﻰ ﻳﯧﯖﯩﻠﯩﻘﻼﺭ ﺑﻮﻟﯩﺪﯗ، ﺩﻩﭖ ﻗﺎﺭﯨﻤﺎﻳﻤﻪﻥ."

ﻧﯚﯞﻩﺗﺘﻪ ﺧﯩﺘﺎﻳﻐﺎ ﻣﯘﻧﺎﺳﯩﯟﻩﺗﻠﯩﻚ ﻫﻪﺭ ﻗﺎﻳﺴﻰ ﺗﻪﺭﻩﭘﻠﻪﺭﻧﯩﯔ ﺩﯨﻘﻘﯩﺘﻰ ﭘﺮﯦﺰﯨﺪﯦﻨﺖ ﺋﻮﺑﺎﻣﺎﻧﯩﯔ 11 - ﺋﺎﻳﺪﺍ ﺋﯧﻠﯩﭗ ﺑﺎﺭﯨﺪﯨﻐﺎﻥ ﺧﯩﺘﺎﻱ ﺳﻪﭘﯩﺮﯨﮕﻪ ﺗﯩﻜﯩﻠﮕﻪﻥ ﺑﻮﻟﯘﭖ، ﺗﻪﻳﯟﻩﻥ، ﺋﯘﻳﻐﯘﺭ ﯞﻩ ﺗﯩﺒﻪﺗﻠﻪﺭﮔﻪ ﺋﻮﺧﺸﺎﺷﻼ ﺋﻮﺑﺎﻣﺎﻧﯩﯔ ﺯﯨﻴﺎﺭﯨﺘﯩﻨﻰ ﺋﯚﺯﻟﯩﺮﯨﻨﯩﯔ ﻛﯧﻠﻪﭼﻪﻙ ﻧﯘﻗﺘﯩﺴﯩﺪﯨﻦ ﻧﺎﻫﺎﻳﯩﺘﻰ ﻣﯘﻫﯩﻢ ﺯﯨﻴﺎﺭﻩﺕ، ﺩﻩﭖ ﻗﺎﺭﺍﯞﺍﺗﻘﺎﻥ ﺗﻪﺭﻩﭘﻠﻪﺭﻧﯩﯔ ﺑﯩﺮﯨﺪﯗﺭ.

ﺋﺎﻣﯧﺮﯨﻜﺎ 1979 - ﻳﯩﻠﻰ ﺗﻪﻳﯟﻩﻥ ﺑﯩﻠﻪﻥ ﺑﻮﻟﻐﺎﻥ ﺩﯨﭙﻠﻮﻣﺎﺗﯩﻚ ﻣﯘﻧﺎﺳﯟﯨﺘﯩﻨﻰ ﺋﯜﺯﯛﭖ، ﺧﯩﺘﺎﻳﻨﻰ ﺗﻮﻧﯩﻐﺎﻥ ﺑﻮﻟﺴﯩﻤﯘ، ﻟﯧﻜﯩﻦ "ﺗﻪﻳﯟﻩﻥ ﻣﯘﻧﺎﺳﯩﯟﻩﺕ ﻗﺎﻧﯘﻧﻰ" ﻣﺎﻗﯘﻟﻼﭖ، ﺗﻪﻳﯟﻩﻧﻨﯩﯔ ﺑﯩﺨﻪﺗﻪﺭﻟﯩﻜﯩﻨﻰ ﻗﻮﻏﺪﺍﺵ ﻣﻪﺳﺌﯘﻟﯩﻴﯩﺘﯩﻨﻰ ﺋﯜﺳﺘﯩﮕﻪ ﺋﺎﻟﻐﺎﻥ ﺋﯩﺪﻯ. ﺗﻪﻳﯟﻩﻥ ﻣﻪﺳﯩﻠﯩﺴﻰ ﻫﻪﺭ ﻗﯧﺘﯩﻤﻘﻰ ﺋﺎﻣﯧﺮﯨﻜﺎ - ﺧﯩﺘﺎﻱ ﺑﺎﺷﻠﯩﻘﻼﺭ ﺳﯚﻫﺒﯩﺘﯩﺪﻩ ﺋﻮﺗﺘﯘﺭﯨﻐﺎ ﻗﻮﻳﯘﻟﯩﺪﯨﻐﺎﻥ ﻧﯩﮕﯩﺰﻟﯩﻚ ﻣﻪﺳﯩﻠﯩﻠﻪﺭﻧﯩﯔ ﺑﯩﺮﻯ ﺑﻮﻟﯘﭖ ﻛﻪﻟﮕﻪﻥ.