ﺋﺎﯞﺳﺘﺮﺍﻟﯩﻴﺎﻥ ﮔﯧﺰﯨﺘﯩﺪﻩ ﻛﯚﺭﺳﯩﺘﯩﻠﯩﺸﯩﭽﻪ، ﺑﯧﺮﻣﯩﺪﯨﻜﻰ ﻳﯘﺭﺗﻠﯩﺮﯨﻐﺎ ﻗﺎﻳﺘﯩﺸﻘﺎ ﺑﺎﺷﻠﯩﻐﺎﻥ ﻣﯘﺳﺎﭘﯩﺮﻻﺭ ﻳﻪﻧﯩﻼ ﺋﻪﻧﺪﯨﺸﻪ ﺋﯩﭽﯩﺪﻩ ﺋﯩﻜﻪﻥ. ﻧﻴﯘﻳﻮﺭﻙ ﯞﺍﻗﯩﺖ ﮔﯧﺰﯨﺘﯩﺪﻩ ﺧﻪﯞﻩﺭ ﻗﯩﻠﯩﻨﯩﺸﯩﭽﻪ، ﻳﻪﻧﻪ ﻣﯩﯖﻠﯩﻐﺎﻥ ﺑﯧﺮﻣﯩﻠﯩﻖ ﻣﯘﺳﺎﭘﯩﺮ ﻳﯘﺭﺗﻠﯩﺮﯨﻐﺎ ﻗﺎﻳﺘﯩﺸﻨﻰ ﺭﻩﺕ ﻗﯩﻠﻐﺎﻥ ﻳﺎﻛﻰ ﻗﺎﻳﺘﯩﭗ ﻛﯧﺘﯩﺸﻜﻪ ﻗﯘﺭﺑﻰ ﻳﻪﺗﻤﻪﻳﺪﯨﻜﻪﻥ. ﻫﺎﻟﺒﯘﻛﻰ، ﺧﯩﺘﺎﻱ ﻫﯚﻛﯜﻣﯩﺘﻰ ﺑﯘ ﻫﻪﻗﺘﯩﻜﻰ ﺧﻪﯞﻩﺭﻟﯩﺮﯨﻨﻰ ﻗﺎﻣﺎﻝ ﻗﯩﻠﻐﺎﻥ ﺑﻮﻟﯘﭖ، ﻧﯚﯞﻩﺗﺘﻪ ﻣﻪﺯﻛﯘﺭ ﻣﯘﺳﺎﭘﯩﺮﻻﺭﻧﯩﯔ ﺋﯩﻨﺴﺎﻧﯩﻲ ﻳﺎﺭﺩﻩﻡ ﻣﯘﺭﺍﺟﯩﺌﯩﺘﯩﮕﻪ ﻗﺎﻧﺪﺍﻕ ﺋﯩﻨﻜﺎﺱ ﻗﺎﻳﺘﯘﺭﻏﺎﻧﻠﯩﻘﻰ ﻣﻪﻟﯘﻡ ﺋﻪﻣﻪﺱ.

ﺋﯚﺗﻜﻪﻥ ﻫﻪﭘﺘﻪ ﺑﯧﺮﻣﯩﻨﯩﯔ ﺧﯩﺘﺎﻱ ﭼﯧﮕﺮﯨﺴﯩﻐﺎ ﻳﯧﻘﯩﻦ ﺭﺍﻳﻮﻧﻰ ﻛﻮﮔﺎﯓ ﺭﺍﻳﻮﻧﯩﺪﺍ ﻫﯚﻛﯜﻣﻪﺕ ﺋﺎﺭﻣﯩﻴﯩﺴﻰ ﺑﯩﻠﻪﻥ ﻳﻪﺭﻟﯩﻚ ﻗﯩﺴﯩﻤﻼﺭ ﺋﺎﺭﯨﺴﯩﺪﺍ ﺋﯘﺭﯗﺵ ﭘﺎﺭﺗﻠﯩﻐﺎﻥ. ﻧﻪﺗﯩﺠﯩﺪﻩ، ﺋﯘﺭﯗﺵ ﭘﺎﺭﺍﻛﻪﻧﺪﯨﭽﯩﻠﯩﻜﯩﺪﯨﻦ ﻗﻮﺭﻗﻘﺎﻥ 37 ﻣﯩﯔ ﻣﯘﺳﺎﭘﯩﺮ ﺧﯩﺘﺎﻳﻨﯩﯔ ﻳﯜﻧﻨﻪﻥ ﺋﯚﻟﻜﯩﺴﯩﮕﻪ ﻗﯧﭽﯩﭗ ﻛﻪﻟﮕﻪﻥ ﺋﯩﺪﻯ.

ﻣﻪﻟﯘﻡ ﺑﻮﻟﯘﺷﯩﭽﻪ، ﻛﻮﮔﺎﯓ ﺭﺍﻳﻮﻧﻰ ﻧﻮﭘﯘﺳﯩﻨﯩﯔ 90 ﭘﯩﺮﺳﻪﻧﺘﯩﻨﻰ ﻳﻪﺭﻟﯩﻚ ﺧﯩﺘﺎﻳﻼﺭ ﺗﻪﺷﻜﯩﻞ ﻗﯩﻠﯩﺪﯨﻜﻪﻥ. ﺑﯘ ﻧﯚﯞﻩﺕ ﻛﻮﮔﺎﯓ ﺭﺍﻳﻮﻧﯩﺪﯨﻦ ﻗﯧﭽﯩﭗ ﻛﻪﻟﮕﻪﻧﻠﻪﺭ ﺋﺎﺭﯨﺴﯩﺪﺍ ﻣﻪﺯﻛﯘﺭ ﺭﺍﻳﻮﻧﺪﺍ ﺳﻮﺩﺍ ﻗﯩﻠﯩﯟﺍﺗﻘﺎﻥ ﺧﯩﺘﺎﻱ ﭘﯘﻗﺮﺍﻟﯩﺮﯨﻤﯘ ﺑﺎﺭ ﺋﯩﻜﻪﻥ.