بروۋېن، ئۆكتىچىلىرىنىڭ بۇ ۋەقەنى ئۇنىڭ "بىر ئاجىزلىقى" دەپ قاراۋاتقان بولسىمۇ، لېكىن ئۇنىڭ پارتىيىسى يەنى بېرمۇدا پارلامېنتىدا 8 كىشىلىك ئورۇنغا ئىگە ئەمگەك ئالغا پارتىيىسىنىڭ ئۆزىنى قوللايدىغانلىقىنى تەكىتلىگەن. ئۇ، مۇخبىرلارغا ئېلان قىلغان بۇ ھەقتىكى باياناتىدا "مەن ئىستىپا بېرىشىم كېرەكمۇ ؟ ئەلۋەتتە ياق" دېگەن.
باش مىنىستىر ئېۋارت بروۋېن يېقىندا گۈەنتانامودىكى ئۇيغۇرلاردىن 4 كىشىنى بېرمۇداغا قوبۇل قىلىپ، ئۇلارغا ئەنگىلىيە تەۋەلىكىدىكى بۇ ئاتلانتىك ئوكيان ئارىلىدا پاناھلىق بەرگەندىن كېيىن، ئۇيغۇر مەسىلىسى ۋە ئاتلانتىك ئوكياندىكى بۇ كىچىككىنە ساياھەت ئارىلى خەلقئارا جامائەتنىڭ نەزىرىدىكى ئەڭ قىزىقارلىق تېمىلارنىڭ بىرى بولۇپ قالغان ئىدى.
بروۋېننىڭ قارارىدىن نازارى بولغان بېرمۇدالىقلار، نارازىلىقىنىڭ ئارالدىكى 4 نەپەر ئۇيغۇر مۇھاجىرغا قارىتىلمىغانلىقىنى، لېكىن باش مىنىستىرنىڭ بۇ ئىشتا بېرمۇدا خەلقىگە مەسلىھەت سالمىغانلىقىغا نارازى ئىكەنلىكىنى بىلدۈرمەكتە. بىرلەشمە ئاگېنتلىقى، بىر قىسىم كىشىلەرنىڭ جۈمە كۈنى يەنە نامايىش قىلىشى مۇمكىنلىكىنى پەرەز قىلىنىۋاتقانلىقىنى بىلدۈردى.
پەيشەنبە كۈنى تەخمىنەن 800 دەك كىشى نامايىش قىلىپ، بروۋېننىڭ ئىستىپا بېرىشىنى تەلەپ قىلغان. لېكىن بروۋېن، ئۆزىنىڭ "كۈرەشكە ھازىر" ئىكەنلىكىنى شۇنداقلا جۈمە كۈنى نېمە ئىشلارنىڭ يۈز بېرىدىغانلىقىغا قارايدىغانلىقىنى تەكىتلىگەن. بېرمۇدادىكى ئۇيغۇرلار بولسا بۇ ئارالدا رېستۇران ئېچىپ، يېڭى ھايات باشلاش ئارزۇسى بارلىقىنى بىلدۈرمەكتە.