ﺋﯘﻳﻐﯘﺭ > خەۋەرلەر > ﺑﯜﮔﯜﻧﻜﻰ ﻗﯩﺴﻘﺎ ﺧﻪﯞﻩﺭﻟﻪﺭ

ﺗﯩﺒﻪﺗﺘﯩﻜﻰ ﺧﯩﺘﺎﻱ ﻛﯚﭼﻤﻪﻧﻠﯩﺮﻯ ﺋﻪﻧﺪﯨﺸﻪ ﺋﯩﭽﯩﺪﻩ

مۇخبىرىمىز شۆھرەت ھوشۇر

2008-09-17

ﺧﯩﺘﺎﻱ، 14 ‏ - ﻣﺎﺭﺕ ﻻﺳﺎ ﯞﻩﻗﻪﺳﯩﺪﯨﻦ ﻛﯧﻴﯩﻦ، ﺗﯩﺒﻪﺗﺘﯩﻜﻰ ﺧﯩﺘﺎﻱ ﻛﯚﭼﻤﻪﻧﻠﯩﺮﯨﮕﻪ ﺑﯩﺨﻪﺗﻪﺭﻟﯩﻚ ﯞﻩﺩﯨﺴﻰ ﺑﻪﺭﻣﻪﻛﺘﻪ. ﻣﻪﺯﻛﯘﺭ ﯞﻩﻗﻪﺩﻩ ﺧﯩﺘﺎﻱ ﺋﺎﻫﺎﻟﯩﻠﯩﺮﻯ، ﺩﯗﻛﺎﻧﻠﯩﺮﻯ ﺋﺎﺳﺎﺳﻠﯩﻖ ﻫﯘﺟﯘﻡ ﻧﯩﺸﺎﻧﻰ ﺑﻮﻟﻐﺎﻥ ﺋﯩﺪﻯ.

ﺧﯩﺘﺎﻱ ﺗﯩﺒﻪﺕ ﭘﺎﺭﺗﻜﻮﻡ ﺳﯧﻜﺮﯨﺘﺎﺭﻯ ﺑﯘ ﻳﯩﻞ 2 ‏ - ﺳﯧﻨﺘﻪﺑﯩﺮ ﻛﯜﻧﻰ ﻛﯚﭼﻤﻪﻧﻠﻪﺭ ﺧﯩﺰﻣﯩﺘﻰ ﻳﯩﻐﯩﻨﯩﺪﺍ ﻗﯩﻠﻐﺎﻥ ﺳﯚﺯﯨﺪﻩ، ﺗﯩﺒﻪﺗﺘﯩﻜﻰ ﺧﯩﺘﺎﻱ ﻛﯚﭼﻤﻪﻧﻠﯩﺮﯨﻨﯩﯔ ﻣﻪﻧﭙﻪﺋﻪﺗﯩﻨﻰ ﻗﻮﻏﺪﺍﺷﻨﯩﯔ ﺋﻪﻫﻤﯩﻴﯩﺘﯩﻨﻰ ﺗﻪﻛﯩﺘﻠﯩﮕﻪﻥ. ﺋﯘ ﺳﯚﺯﯨﺪﻩ ﺗﯩﺒﻪﺗﻨﯩﯔ ﺧﯩﺘﺎﻳﻨﯩﯔ ﺩﯙﻟﻪﺕ ﺑﯩﺨﻪﺗﻪﺭﻟﯩﻜﯩﺪﯨﻜﻰ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﺋﻪﻫﻤﯩﻴﯩﺘﻰ ﻫﻪﻗﻘﯩﺪﻩ ﺋﺎﻻﻫﯩﺪﻩ ﺗﻮﺧﺘﺎﻟﻐﺎﻥ.

ﺋﯘ ﺗﯩﺒﻪﺗﺘﻪ ﻣﯘﻗﯩﻤﻠﯩﻘﻨﻰ ﻛﺎﭘﺎﻟﻪﺕ ﺋﺎﺳﺘﯩﻐﺎ ﺋﯧﻠﯩﺶ ﺋﯜﭼﯜﻥ ﺗﯩﺒﻪﺗﺘﯩﻜﻰ ﺧﯩﺘﺎﻱ ﻛﯚﭼﻤﻪﻧﻠﯩﺮﯨﻨﯩﯔ ﻫﻪﺭ ﺗﻪﺭﻩﭘﻠﯩﻤﻪ ﻣﻪﻧﭙﻪﺋﻪﺗﯩﮕﻪ ﻛﺎﭘﺎﻟﻪﺗﻠﯩﻚ ﻗﯩﻠﯩﻨﯩﺸﻰ ﻛﯧﺮﻩﻙ ﺩﻩﭖ ﻛﯚﺭﺳﻪﺗﻜﻪﻥ. ﭘﺎﺭﺗﻜﻮﻡ ﺳﯧﻜﺮﯨﺘﺎﺭﻯ ﺟﺎﯓ ﻳﯩﺠﻴﯘﯓ ﺧﯩﺘﺎﻱ ﻛﯚﭼﻤﻪﻧﻠﯩﺮﯨﮕﻪ ﺋﯩﺶ ﯞﻩ ﺑﯩﺨﻪﺗﻪﺭﻟﯩﻚ ﺟﻪﻫﻪﺗﺘﯩﻦ ﻳﯧﺘﻪﺭﻟﯩﻚ ﺋﯩﻤﻜﺎﻥ ﻳﺎﺭﯨﺘﯩﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ.

ﻣﻪﺯﻛﯘﺭ ﻳﯩﻐﯩﻨﻨﯩﯔ ﺋﺎﺳﺎﺳﻰ ﺗﯧﻤﯩﺴﻰ ﯞﻩ ﻳﯩﻐﯩﻨﺪﺍ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ ﭘﯩﻜﯩﺮﻟﻪﺭ، 14 ‏ - ﻣﺎﺭﺕ ﯞﻩﻗﻪﺳﯩﺪﯨﻦ ﻛﯧﻴﯩﻦ، ﺗﯩﺒﻪﺗﺘﯩﻜﻰ ﺧﯩﺘﺎﻱ ﻛﯚﭼﻤﻪﻧﻠﯩﺮﯨﺪﻩ ﺗﯩﺒﻪﺗﺘﯩﻦ ﺳﻮﯞﯗﺵ ﯞﻩ ﻗﻮﺭﻗﯘﺵ ﻛﻪﻳﭙﯩﻴﺎﺗﻰ ﺷﻪﻛﯩﻠﻠﻪﻧﮕﻪﻧﻠﯩﻜﯩﻨﻰ ﻛﯚﺭﺳﻪﺗﻤﻪﻛﺘﻪ.

ﺋﺎﻣﯧﺮﯨﻜﯩﺪﯨﻜﻰ ﺧﻪﻟﻘﺌﺎﺭﺍﻟﯩﻖ ﺗﯩﺒﻪﺕ ﻫﻪﺭﯨﻜﯩﺘﻰ ﺗﻪﺷﻜﯩﻼﺗﻰ،16 ‏ - ﺳﯧﻨﺘﻪﺑﯩﺮ ﻛﯜﻧﯩﺪﯨﻜﻰ ﺑﺎﻳﺎﻧﺎﺗﯩﺪﺍ ﺧﯩﺘﺎﻳﻨﯩﯔ ﺑﯘ ﺗﯜﺭ ﻛﯚﭼﻤﻪﻥ ﺳﯩﻴﺎﺳﯩﺘﻰ ﺗﯩﺒﻪﺗﻨﯩﯔ ﯞﻩﺯﯨﻴﯩﺘﯩﻨﻰ ﺗﯧﺨﯩﻤﯘ ﺟﯩﺪﺩﯨﻴﻠﻪﺷﺘﯜﺭﯛﯞﯦﺘﯩﺪﯗ ﺩﻩﭖ ﺋﺎﮔﺎﻫﻼﻧﺪﯗﺭﺩﻯ.