ﮔﻪﺭﭼﻪ ﺋﺎﺭﯗﻧﺎﭼﺎﻝ ﭘﺎﺭﺍﺩﯨﺶ ﻫﺎﺯﯨﺮ ﻫﯩﻨﺪﯨﺴﺘﺎﻥ ﺋﯩﮕﯩﺪﺍﺭﭼﯩﻠﯩﻘﯩﺪﺍ ﺑﻮﻟﺴﯩﻤﯘ، ﺋﻪﻣﻤﺎ ﺧﯩﺘﺎﻱ ﺩﺍﯞﺍﻣﻠﯩﻖ ﻫﺎﻟﺪﺍ ﺑﯘ ﻳﻪﺭﺩﻩ ﺧﯩﺘﺎﻳﻨﯩﯔ ﺋﯩﮕﯩﻠﯩﻚ ﻫﻮﻗﯘﻗﻰ ﺑﺎﺭﻟﯩﻘﯩﻨﻰ ﺗﻪﻛﯩﺘﻠﻪﭖ ﻛﻪﻟﻤﻪﻛﺘﻪ. ﺷﯘﯕﺎ ﺧﯩﺘﺎﻱ ﺩﺍﻻﻱ ﻻﻣﺎﻧﯩﯔ ﺋﺎﺭﯗﻧﺎﭼﺎﻟﻨﻰ ﺯﯨﻴﺎﺭﻩﺕ ﻗﯩﻠﯩﺸﯩﻐﺎ ﻗﺎﺗﺘﯩﻖ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﻣﻪﻛﺘﻪ.

ﻣﻪﻟﯘﻡ ﺑﻮﻟﯘﺷﯩﭽﻪ، ﻫﺎﺯﯨﺮ ﻳﺎﭘﻮﻧﯩﻴﯩﺪﻩ ﺯﯨﻴﺎﺭﻩﺗﺘﻪ ﺑﻮﻟﯩﯟﺍﺗﻘﺎﻥ ﺩﺍﻻﻱ ﻻﻣﺎ ﺯﯨﻴﺎﺭﯨﺘﯩﻨﻰ ﺋﺎﻳﺎﻗﻼﺷﺘﯘﺭﻏﺎﻧﺪﯨﻦ ﻛﯧﻴﯩﻦ، ﻳﻪﻛﺸﻪﻧﺒﻪ ﻛﯜﻧﻰ ﺋﺎﺳﯩﻴﺎﺩﯨﻜﻰ ﺋﯩﻜﻜﯩﻨﭽﻰ ﭼﻮﯓ ﻻﻣﺎ ﺑﯘﺩﺧﺎﻧﯩﺴﻰ ﺟﺎﻳﻼﺷﻘﺎﻥ ﺋﺎﺭﯗﻧﺎﭼﺎﻟﻐﺎ ﻳﯧﺘﯩﭗ ﻛﯧﻠﯩﺪﯨﻜﻪﻥ.

ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﻫﯩﻨﯩﺪﯨﺴﺘﺎﻧﻨﯩﯔ ﺩﺍﻻﻱ ﻻﻣﺎﻧﯩﯔ ﺋﺎﺭﯗﻧﺎﭼﺎﻟﻨﻰ ﺯﯨﻴﺎﺭﻩﺕ ﻗﯩﻠﯩﺸﯩﻐﺎ ﺭﯗﺧﺴﻪﺕ ﻗﯩﻠﯩﺶ ﺋﺎﺭﻗﯩﻠﯩﻖ ﺳﯩﻴﺎﺳﯩﻲ ﺋﻮﻳﯘﻥ ﺋﻮﻳﻨﺎﯞﺍﺗﻘﺎﻧﻠﯩﻘﯩﻨﻰ، ﺩﺍﻻﻱ ﻻﻣﺎﻧﯩﯔ ﺯﯨﻴﺎﺭﯨﺘﯩﻨﻰ ﻛﻮﺯﯗﺭ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﻫﯩﻨﺪﯨﺴﺘﺎﻥ ﺩﺍﺋﯩﺮﯨﻠﯩﺮﻯ ﯞﻩ ﺗﯩﺒﻪﺗﻠﻪﺭ ﺩﺍﻻﻱ ﻻﻣﺎﻧﯩﯔ ﺑﯘ ﺯﯨﻴﺎﺭﯨﺘﯩﻨﯩﯔ ﺳﯩﻴﺎﺳﻪﺕ ﺑﯩﻠﻪﻥ ﻗﯩﻠﭽﯩﻠﯩﻚ ﺋﺎﻻﻗﯩﺴﻰ ﻳﻮﻗﻠﯘﻗﯩﻨﻰ، ﺋﯘﻧﯩﯔ ﭘﻪﻗﻪﺗﻼ ﻻﻣﺎ ﺑﯘﺗﺨﺎﻧﯩﺴﯩﻐﺎ ﻛﯧﻠﯩﭗ ﻣﯘﺭﺗﻠﯩﺮﯨﻐﺎ ﺩﻩﺭﺱ ﺑﯧﺮﯨﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺧﻪﯞﻩﺭﻟﻪﺭﺩﯨﻦ ﻗﺎﺭﯨﻐﺎﻧﺪﺍ، ﻫﺎﺯﯨﺮ ﺋﺎﺭﯗﻧﺎﭼﺎﻟﺪﺍ ﺗﻪﻳﻴﺎﺭﻟﯩﻖ ﺧﯩﺰﻣﻪﺗﻠﯩﺮﻯ ﺟﯩﺪﺩﯨﻲ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ ﺑﻮﻟﯘﭖ، ﻻﻣﺎ ﺑﯘﺩﺧﺎﻧﯩﺴﯩﻤﯘ ﺑﺎﻳﺮﺍﻡ ﻗﯩﺰﻏﯩﻨﻠﯩﻘﯩﻐﺎ ﭼﯚﻣﮕﻪﻥ. ﻫﻪﺭ ﻗﺎﻳﺴﻰ ﺟﺎﻳﻼﺭﺩﯨﻦ ﻛﻪﻟﮕﻪﻥ ﻳﯩﮕﯩﺮﻣﻪ ﻣﯩﯔ ﺑﯘﺩﺩﯨﺴﺴﺖ ﺩﺍﻻﻱ ﻻﻣﺎﻧﯩﯔ 3 ﻛﯜﻧﻠﯜﻙ ﻧﻮﻡ ﺳﯚﻫﺒﯩﺘﯩﻨﻰ ﺋﺎﯕﻼﺵ ﺋﯜﭼﯜﻥ ﺑﯘ ﻳﻪﺭﮔﻪ ﻳﯩﻐﯩﻠﻐﺎﻥ.

ﺩﺍﻻﻱ ﻻﻣﺎﻧﯩﯔ ﺑﯘ ﻗﯧﺘﯩﻤﻠﯩﻖ ﺋﺎﺭﯗﻧﺎﭼﺎﻝ ﺯﯨﻴﺎﺭﯨﺘﻰ ﭘﯜﺗﯜﻥ ﺩﯗﻧﻴﺎﻧﯩﯔ ﺩﯨﻘﻘﯩﺘﯩﻨﻰ ﺗﺎﺭﺗﯩﯟﺍﺗﻘﺎﻥ ﺑﻮﻟﯘﭖ، ﻫﻪﺭ ﻗﺎﻳﺴﻰ ﭼﻮﯓ ﺧﻪﻟﻘﺌﺎﺭﺍ ﺋﺎﺧﺒﺎﺭﺍﺕ ﯞﺍﺳﺘﯩﻠﯩﺮﻯ ﺩﺍﻻﻱ ﻻﻣﺎﻧﯩﯔ ﺋﺎﺭﯗﭼﺎﻝ ﺯﯨﻴﺎﺭﯨﺘﯩﻨﻰ ﺧﻪﯞﻩﺭ ﻗﯩﻠﯩﺶ ﺋﯜﭼﯜﻥ ﺑﯘ ﻳﻪﺭﮔﻪ ﻛﯧﻠﯩﺪﯨﻜﻪﻥ. ﺋﻪﻣﻤﺎ ﻫﯩﻨﺪﯨﺴﺘﺎﻥ ﺩﺍﺋﯩﺮﻟﯩﺮﻯ ﺑﻮﻟﺴﺎ ﭼﻪﺗﺌﻪﻝ ﺋﺎﺧﺒﺎﺭﺍﺕ ﯞﺍﺳﺘﯩﻠﯩﺮﯨﻨﯩﯔ ﺋﺎﺭﯗﻧﺎﭼﺎﻟﻐﺎ ﻛﯧﻠﯩﺸﯩﻨﻰ ﭼﻪﻛﻠﻪﺵ ﻗﺎﺭﺍﺭﻯ ﭼﯩﻘﺎﺭﺩﻯ.

ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﺋﯚﺯﯨﻨﯩﯔ ﺋﯩﮕﯩﻠﯩﻚ ﻫﻮﻗﯘﻗﻰ ﺑﺎﺭﻟﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﯛﯞﺍﺗﻘﺎﻥ ﺑﯘ ﺭﺍﻳﻮﻧﻐﺎ ﺩﺍﻻﻱ ﻻﻣﺎﻧﯩﯔ ﻛﯧﻠﯩﺸﯩﮕﻪ ﻗﺎﺗﺘﯩﻖ ﻧﺎﺭﺍﺯﻯ ﺑﻮﻟﯘﭖ، ﻫﯩﻨﺪﯨﺴﺘﺎﻥ ﺩﺍﺋﯩﺮﯨﻠﯩﺮﯨﻨﯩﻤﯘ ﻛﯚﭖ ﻗﯧﺘﯩﻢ ﺋﺎﮔﺎﻫﻼﻧﺪﯗﺭﻏﺎﻥ ﯞﻩ ﺩﺍﻻﻱ ﻻﻣﺎﻧﯩﯔ ﻳﺎﻟﻐﺎﻥ ﺳﯚﺯﻟﻪﭖ ﺧﯩﺘﺎﻱ ﺑﯩﻠﻪﻥ ﺑﺎﺷﻘﺎ ﺩﯙﻟﻪﺗﻠﻪﺭﻧﯩﯔ ﻣﯘﻧﺎﺳﯩﯟﯨﺘﯩﻨﻰ ﺑﯘﺯﯗﯞﺍﺗﻘﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ ﺋﯩﺪﻯ.