ﺋﺎﺩﯞﻭﻛﺎﺗﻼﺭﺩﯨﻦ ﺑﯩﺮﯨﻨﯩﯔ ﯞﺍﺷﯩﻨﮕﯩﺘﻮﻥ ﭘﻮﭼﺘﯩﺴﯩﻐﺎ ﺑﯩﻠﺪﯛﺭﯛﺷﯩﭽﻪ، ﺋﺎﻣﯧﺮﯨﻜﯩﺪﯨﻜﻰ ﺋﯘﻳﻐﯘﺭﻻﺭﻧﯩﯔ ﮔﯘﺋﺎﻧﺘﺎﻧﺎﻣﻮﺩﯨﻜﻰ 17 ﻧﻪﭘﻪﺭ ﺋﯘﻳﻐﯘﺭﻏﺎ ﺗﯘﺭﻣﯘﺵ، ﺋﯚﮔﯩﻨﯩﺶ ﯞﻩ ﻫﺎﻳﺎﺕ ﻳﻮﻟﻰ ﻛﯚﺭﺳﯩﺘﯩﺶ ﺟﻪﻫﻪﺗﺘﻪ ﺋﯩﮕﻪ ﭼﯩﻘﯩﺸﻰ ﺳﻮﺩﯨﻴﻪﻧﯩﯔ ﻣﻪﺯﻛﯘﺭ ﻫﯚﻛﯜﻣﻨﻰ ﭼﯩﻘﯩﺮﯨﺸﯩﺪﺍ ﺋﺎﭼﻘﯘﭼﻠﯘﻕ ﺭﻭﻝ ﺋﻮﻳﻨﯩﻐﺎﻥ.

ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ ﮔﯘﺋﺎﻧﺘﺎﻧﺎﻣﻮﺩﯨﻜﻰ ﺋﯘﻳﻐﯘﺭﻻﺭﻧﯩﯔ ﮔﯘﻧﺎﻫﺴﯩﺰﻟﯩﻘﯩﻨﻰ ﺋﯧﺘﯩﺮﺍﭖ ﻗﯩﻠﻐﺎﻧﺪﯨﻦ ﻛﯧﻴﯩﻦ، ﻣﻪﻫﺒﯘﺳﻼﺭﻧﯩﯔ ﺋﺎﺩﯞﻭﻛﺎﺗﻠﯩﺮﻯ ﻣﻪﻫﺒﯘﺳﻼﺭﻧﯩﯔ ﺋﺎﻣﯧﺮﯨﻜﯩﻐﺎ ﻳﻪﺭﻟﻪﺷﻜﻪﻧﺪﯨﻦ ﻛﯧﻴﯩﻨﻜﻰ ﻫﺎﻳﺎﺗﻰ ﻫﻪﻗﻘﯩﺪﻩ ﺋﺎﻣﯧﺮﯨﻜﯩﺪﯨﻜﻰ ﺋﯘﻳﻐﯘﺭ ﺟﺎﻣﺎﺋﯩﺘﯩﻨﯩﯔ ﺋﯩﻨﻜﺎﺳﯩﻨﻰ ﺋﯩﮕﯩﻠﯩﮕﻪﻥ. ﻧﻪﺗﯩﺠﯩﺪﻩ ﺋﺎﻣﯧﺮﯨﻜﯩﺪﺍ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭﻻﺭﺩﯨﻦ 73 ﺋﺎﺋﯩﻠﻪ ﮔﯘﺋﺎﻧﺘﺎﻧﺎﻣﻮﺩﯨﻜﻰ ﻣﻪﻫﺒﯘﺳﻼﺭﻏﺎ ﺳﺎﻫﯩﭗ ﭼﯩﻘﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﯛﭖ، ﺋﺎﻣﯧﺮﯨﻜﺎ ﺋﯘﻳﻐﯘﺭ ﺟﻪﻣﺌﯩﻴﯩﺘﯩﮕﻪ ﺋﯩﻠﺘﯩﻤﺎﺱ ﺳﯘﻧﻐﺎﻥ.

ﺗﯜﻧﯜﮔﯜﻧﻜﻰ ﺳﻮﺗﻘﯩﻤﯘ ﻛﯚﭖ ﺳﺎﻧﺪﺍ ﺋﯘﻳﻐﯘﺭﻻﺭ ﻣﯩﻠﻠﯩﻲ ﻛﯩﻴﯩﻤﻠﯩﺮﻯ ﺑﯩﻠﻪﻥ ﻛﯧﻠﯩﭗ ﻗﺎﺗﻨﯩﺸﯩﭗ، ﮔﯘﺋﺎﻧﺘﺎﻧﺎﻣﻮﺩﯨﻜﻰ ﺋﯘﻳﻐﯘﺭﻻﺭﻏﺎ ﻗﺎﺭﯨﺘﺎ ﻫﯚﺭﻣﻪﺕ ﯞﻩ ﻫﯧﺴﺪﺍﺷﻠﯩﻘﯩﻨﻰ ﺋﯩﭙﺎﺩﯨﻠﯩﮕﻪﻥ ﺋﯩﺪﻯ. ﯞﺍﺷﯩﻨﮕﯩﺘﻮﻥ ﭘﻮﭼﺘﯩﺴﻰ ﮔﯧﺰﯨﺘﯩﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﺳﻮﺗﻘﺎ ﻗﺎﺗﻨﺎﺷﻘﺎﻥ ﺋﯘﻳﻐﯘﺭ ﺟﺎﻣﺎﺋﯩﺘﯩﺪﯨﻜﻰ ﻣﯩﻠﻠﯩﻲ ﻛﻪﻳﭙﯩﻴﺎﺕ ﺳﻮﺗﭽﯩﻨﯩﯔ ﻫﯚﻛﯜﻣﯩﮕﻪ ﻫﻪﻝ ﻗﯩﻠﻐﯘﭺ ﺗﻪﺳﯩﺮ ﻛﯚﺭﺳﻪﺗﻜﻪﻥ.

ﮔﯘﻩﻧﺘﺎﻧﺎﻣﻮ ﺋﯘﻳﻐﯘﺭﻟﯩﺮﯨﻨﯩﯔ ﺗﻪﻗﺪﯨﺮﻯ ﻣﻪﺳﯩﻠﯩﺴﻰ ﻳﯩﻠﻼﺭﺩﯨﻦ ﺑﯧﺮﻯ ﻣﯘﻫﺎﺟﯩﺮﻩﺗﺘﯩﻜﻰ ﺋﯘﻳﻐﯘﺭ ﺗﻪﺷﻜﯩﻼﺗﻠﯩﺮﯨﻨﯩﯔ ﺧﯩﺰﻣﻪﺕ ﻛﯜﻧﺘﻪﺭﺗﯩﭙﯩﺪﻩ ﻣﯘﻫﯩﻢ ﺋﻮﺭﯗﻥ ﺗﯘﺗﯘﭖ ﻛﻪﻟﮕﻪﻥ ﺋﯩﺪﻯ.